Bëj fotografi të shkëlqyera të ambientit me telefon

Para se të fillosh, gjej ndriçimin më të mirë dhe organizo ambientin duke përdorur strategji nga udhëzimet tona të fotografimit. Cakto kohë për të bërë nga pesë deri në gjashtë fotografi për çdo dhomë.

Ndërsa bën fotografi, është e rëndësishme të kuptosh se si shfaqen fotografitë e listimit tënd në Airbnb:

• Imazhi yt i parë është fotografia jote e kopertinës, fotografia kryesore në faqen e listimit tënd dhe ajo që shfaqet në rezultatet e kërkimit.
• Pesë fotografitë e para, duke përfshirë fotografinë e kopertinës, shfaqen si një kolazh në krye të faqes së listimit tënd dhe priten në formë katrore, ndaj mos harro që fotografitë e tua të jenë në qendër.
• Galeria e imazheve përmban të gjitha fotografitë që vizitorët mund të shfletojnë.

Shumë telefona mund të bëjnë foto fantastike. Ja disa karakteristika të dobishme dhe si t'i përdorësh ato.

Aktivizo rrjetëzat
Rrjetëzat mund të të ndihmojnë të kornizosh një imazh dhe ta kuptosh nëse është në pozicion të drejtë. Për të rregulluar rrjetëzat:

• Për iPhone: Shko te Cilësimet > Kamera dhe ndrysho rrjetëzën e telefonit në Aktive.
• Për Android: Hap aplikacionin e kamerës, shko te Cilësimet, lëviz poshtë dhe ktheje funksionin Vijat e rrjetëzës në Aktive.

Për më shumë sugjerime mbi përdorimin e rrjetëzave, lexo seksionin e rregullit të të tretave më poshtë.

Çaktivizo blicin
Përdorimi i një blici mund të krijojë një pamje të theksuar, kështu që drita e ndritshme dhe natyrore është ideale. Nëse ambienti yt ka dritare, provo ta fotografosh gjatë kohës më të ndritshme të ditës. Nëse hapësira nuk ka dritare, ndezja e llambave mund të krijojë një atmosferë të rehatshme.

Për të fikur blicin, hap aplikacionin e kamerës, gjej ikonën e rrufesë dhe zgjidh Çaktivizo.

Kontrollo rezolucionin e imazhit
Fotografitë më të qarta kanë një rezolucion prej të paktën 1024 x 683 piksel. Cilësimet e tua mund të optimalizohen për të ruajtur vetëm imazhe me rezolucion të ulët, ndaj kontrollo nëse po ruan imazhe me rezolucion të lartë për sesionin fotografik. Mund të kthehesh pas dhe ta ndryshosh këtë pasi të kesh bërë fotografitë.

Ja disa gjëra që mund të bësh dhe mund të mos bësh për kapjen e imazheve cilësore.

Mbaji vijat drejt
BËJ: Mbaje telefonin drejt dhe paralel me dyshemenë. Për të vendosur në qendër mobilien kryesore, mund të të duhet të ngresh apo të ulësh duart. Në dhomat e gjumit, fokusohu te krevati, në dhomat e ndenjjes, ndoshta te divani. Një rregull i mirë është që kamera të jetë gjithmonë lart për të kapur pjesën e sipërme të krevateve, tavolinave dhe banakëve.

MOS: Mos e ngri telefonin lart mbi kokë për të marrë një pamje më të mirë apo ta mbash me kënd, pasi shpesh rezulton në shtrembërim të padëshiruar.

Ndiq rregullin e të tretave
Rregulli i të tretave është një parim fotografik që ndan një imazh në tre pjesë horizontalisht dhe vertikalisht, në mënyrë që të ketë nëntë katrorë dhe katër vende ku kryqëzohen linjat. Aktivizimi i funksionit të rrjetëzës në telefon dhe përdorimi i rregullit të të tretave, mund të të ndihmojnë të sigurohesh që fotografitë e tua të jenë të drejta dhe të kenë një kompozim të mirë.

BËJ: Vendos subjektin e imazhit aty ku kryqëzohen linjat e rrjetëzës (që është pak jashtë qendrës). Për shembull, vendose telefonin në mënyrë të tillë që fokusi i fotografisë, si divani, krevati ose tavolina, të jetë aty ku vijat kryqëzohen në të majtë ose në të djathtë të ekranit.

MOS BËJ: Mos e vendos fokusin qëndror në fund apo në pjesën e tretë sipër, pasi mund të lësh jashtë informacione të rëndësishme.

Bëj fotografi të fokusuara

BËJ: Përdor fokusin automatik që të mos kesh nevojë ta rregullosh manualisht fokusin.

Kupto kur të rregullosh largësinë
Telefonat e rinj shpesh kanë modalitete të paracaktuara për disa cilësime, si formati portret, horizontal dhe me plan të gjerë. Nëse kamera e celularit i ka këto alternativa, përdor ato në vend që ta lëvizësh kamerën fizikisht.

Përdorimi i zmadhimit është më i suksesshëm kur fotografon pjesë të stiluara me kujdes të hapësirës tënde, si kornizimi i imazhit për t'u fokusuar në vetëm një pjesë të tavolinës së kafesë, divanit dhe një pikture të varur sipër.

Nëse telefoni yt nuk i ofron këto modalitete, përdor cilësimet standarde për të fotografuar dhomën në tërësi dhe rregullo largësinë vetëm për imazhet nga pozicion i afërt, të tilla si një zbukurim me lule në komodinën pranë krevatit ose divani me punim artistik të varur mbi të.

Trego pse vizitorët duhet të emocionohen për qëndrimin në ambientin tënd. Ndërsa përshkrimi i listimit ofron detaje të rëndësishme, një fotografi vërtet vlen sa një mijë fjalë në Airbnb.

Vër në dukje shërbimet
Vizitorët e vlerësojnë informacionin rreth gjërave të veçanta në ambientin tënd, ndaj sigurohu t'i kesh fotografuar shërbimet e vlefshme. Vlejnë më shumë po t'i fotografosh në kontekstin e një hapësire më të madhe, si një imazh me plan të gjerë i peshqirëve të palosur mbi një stol pranë një vaske, sesa një pamje nga afër e pajisjeve të vaskës.

Ja disa shembuj të shërbimeve që mund të fotografosh dhe të përmendësh në diçiturat e tua:

• Hapësirë pune për laptop
• Artikuj të përshtatshëm për familjen, si një karrige e lartë ose një krevat fëmijësh
• Hapësirë e jashtme, si oborri, kopshti ose ballkoni
• Një makinë ekspresi kafeje, kafetierë ose komplet çaji
• Produkte cilësore tualeti, si peshqirë banje, rrobdeshambër ose pantofla

Oriento kamerën tënde
Përdor imazhe horizontale për pesë fotografitë e para, sepse ato shfaqen më mirë në rrjetëzën në faqen e listimit.

BËJ: Përdor fotografi vertikale për hapësirat e ngushta, të tilla si dhomat gardërobë, banjat e vogla ose ballkonet.

MOS BËJ: Mos përdor një imazh vertikal si një nga pesë fotografitë në rrjetëz, pasi do të pritet për t'iu përshtatur dizajnit horizontal.

Ndrysho kompozimin
Mund t'i ndihmosh vizitorët ta imagjinojnë veten në ambientin tënd duke shfaqur jo vetëm zonat ku flihet, hahet dhe pushohet, por duke përfshirë edhe fotografi të detajeve interesante.

Syno të kesh një miks kompozimesh për secilën dhomë, një shumëllojshmëri fotografish me plan të gjerë, në largësi mesatare dhe nga afër, disa horizontale dhe të tjera vertikale. Ja se kur duhet përdorur secili format kompozimi:

• Fotografitë me plan të gjerë shërbejnë si imazhe bazë, për t'i ndihmuar njerëzit të kuptojnë madhësinë e një dhome dhe gjithçka që ajo ka për të ofruar.
• Imazhet në largësi mesatare funksionojnë mirë nga një perspektivë e drejtpërdrejtë dhe jo nga një kënd. Ky imazh i ndihmon vizitorët të krijojnë një ide të veçorisë kryesore të dhomës.
• Fotografitë nga afër ndihmojnë në ilustrimin e personalitetit të dhomës, si p.sh. librat në një tavolinë pranë shtratit. Kur bën fotografi nga afër, kushtoji vëmendje të shtuar asaj që gjendet në kornizë: Mos harro të shkrifërosh jastëkët, të fshehësh telat dhe të sistemosh çarçafët.

BËJ: Shfaq se si dhomat lidhen me njëra-tjetrën brenda fotografive të tua, për shembull, trego dhomën e ndenjjes në sfondin e një imazhi nga afër. Trajtoje galerinë e imazheve si një shëtitje me guidë për t'u dhënë vizitorëve një ide të planimetrisë së katit.

Fotografo më shumë se ç'të duhet
Ke bërë gjithë punën për përgatitjen e hapësirës tënde, prandaj sigurohu që të fotografosh gjithçka. Më vonë mund të vendosësh se cilat fotografi duhet të ndash.

Kur të bësh përzgjedhjen, ki parasysh se fotografitë e tua duhet të tregojnë historinë e ambientit tënd dhe t'u tregojnë vizitorëve se çfarë të presin. Ja disa sugjerime:

• Paraqit fotografi të mjaftueshme për të ndihmuar në caktimin e pritshmërive të vizitorëve
• Përfshi dy deri në katër fotografi të çdo dhome që mund të përdorin vizitorët
• Fotografo nga qoshe të ndryshme të secilës dhomë për të ofruar një pamje të plotë
• Bëj fotografi nga afër për të treguar personalitetin e ambientit tënd
• Fotografo qartë çdo kusht lehtësues

Përdor këtë listë kontrolli
Për të të ndihmuar të fillosh me sesionin e fotografive, kemi krijuar një listë rekomandimesh për fotografitë dhe këndet.

Dhoma gjumi

• Fotografi me plan të gjerë për çdo dhomë gjumi
• Ndrysho këndet e dhomave për më shumë kontekst
• Imazh në largësi mesatare i elementëve kryesorë, si krevati dhe komodina
• Fotografi nga afër që shfaqin personalitetin, si një libër ose lule në një tavolinë në anë

Dhoma e ndenjjes

• Fotografi me plan të gjerë e të gjithë ambientit të ndenjjes (duke përfshirë dritën nga një dritare nëse është e mundur)
• Imazh në largësi mesatare i një divani ose zone për t'u ulur
• Fotografi nga afër që nxjerr në pah personalitetin, si p.sh një oxhak

Banja

• Fotografi me plan të gjerë e banjës kryesore
• Imazh në largësi mesatare i një banjoje dytësore, me një vaskë ose dush dhe lavaman
• Fotografi nga afër e peshqirëve të grumbulluar ose një pamje nga dritarja

Kuzhina

• Fotografi me plan të gjerë e të gjithë kuzhinës ose këndit të kuzhinës
• Imazh në largësi mesatare i furrës, pranë banakëve të mirëorganizuar
• Fotografi nga afër i një saksie lulesh në qendër të tavolinës
• Fotografi nga afër i një shporte mirëseardhjeje me produkte pastrimi për vizitorët

Ambienti i jashtëm

• Fotografi me plan të gjerë e ballkonit, kopshtit, oborrit ose e gjithë verandës
• Imazh në largësi mesatare duke përfshirë çdo zonë të jashtme për t'u ulur (dhe mundësisht pamjen e tyre)
• Fotografi nga afër e çdo dekori të sistemuar me kujdes, si bimë në vazo pranë një mobilie për ambjente të jashtme
• Një fotografi me plan të gjerë të rruginës drejt hyrjes tënde

Ti e njeh hapësirën tënde më mirë se kushdo, prandaj sigurohu të fotografosh të gjitha detajet e tua të preferuara dhe çdo gjë që vizitorët vlerësojnë në recensionet e tyre. Dhe para se të përfundosh sesionin fotografik, merr disa minuta për të kontrolluar me imtësi të gjitha imazhet që ke fotografuar për t'u siguruar që ke adresuar çdo gjë në listën tënde.

Eksploro udhëzuesin e fotografive:

• Pjesa 1: Përgatit hapësirën tënde për një sesion fotografish me smartfon
• Pjesa 2: Bëj fotografi cilësore me telefonin tënd
• Pjesa 3: Zgjidh dhe modifiko fotot për listimin tënd