Vazhdo përpara për të hyrë në rezultatet e sugjeruara
    Kjo përmbajtje nuk është e disponueshme në gjuhën që ke zgjedhur, ndaj e kemi bërë të disponueshme në gjuhën më të ngjashme që disponojmë për momentin.

    Si të përmirësosh përshkrimin e listimit

    Një listim i krijuar në mënyrë transparente dhe të detajuar i ndihmon vizitorët ta imagjinojnë veten në ambientin tënd.
    Nga Airbnb, më 18 nën 2020
    Lexim 12-minutësh
    Përditësuar më 7 korr 2022

    Veçantitë

    • Fokusohu në atë që e bën hapësirën tënde unike

    • Jep detaje të sakta për hapësirën tënde, për të krijuar pritshmëritë e duhura

    • Përditëso detajet e listimit
    • Zbulo më shumë në udhëzuesin e plotë se si të krijosh një listim të suksesshëm

    Përshkrimi i mirë i listimit është një nga mjetet më të mira për të siguruar prenotime dhe për të përcaktuar pritshmëritë e vizitorëve. Kemi mësuar nga superpritësit se prona nuk duhet të jetë detyrimisht e përkryer, por është shumë e rëndësishme t'u thuash vizitorëve se çfarë do të gjejnë saktësisht kur të mbërrijnë. Ja se si t'i entuziazmosh udhëtarët që të qëndrojnë në hapësirën tënde.

    Nxirr në pah karakteristikat e veçanta

    Ka miliona listime në Airbnb. Për të përcjellë atë që listimi yt ka të veçantë, merr disa minuta kohë për të menduar karakteristikat tërheqëse dhe unike që e bëjnë atë të spikatë. Kjo mund të nënkuptojë theksimin e vendndodhjes ose të shërbimeve unike që ofron në hapësirën tënde. "Ndodhemi 5 deri 10 minuta më këmbë larg restoranteve dhe birrarive më të mira të Bendit," - thonë superpritësit Mike dhe Jill nga Bend, Oregon. "Shtigjet [tona] malore shumë të preferuara për biçikleta, janë vetëm 15 minuta larg me biçikletë ose 5 minuta larg me makinë."

    Shkruaj një titull tërheqës

    Titulli i listimit tënd dhe imazhi kryesor janë ato që i nxisin vizitorët të hapin listimin tënd, prandaj është e rëndësishme t'i përdorësh ato për të theksuar pikat e forta të hapësirës që ofron. Mendo se çfarë e bën ambientin tënd tërheqës dhe unik dhe vendose këtë cilësi në titullin tënd.

    Një titull i shkurtër me 32 karaktere ose më pak, duke përfshirë hapësirat, është më i përshtatshëm për vizitorët që kërkojnë nga telefonat celularë. Përpiqu të përdorësh fjalë të thjeshta dhe përshkruese dhe mos përdor emoji apo simbole që mund të nënkuptojnë gjëra të ndryshme në pjesë të ndryshme të botës.

    Gjithashtu duhet të synosh të shmangësh fjalë me shkronjë të madhe te titulli (ku i shkruan me shkronja të mëdha shumicën e fjalëve) ose me të gjitha shkronjat të mëdha, përveç nëse është emër i përvetshëm apo shkurtim standard si "MB". Shkrimi i titujve sipas drejtshkrimit të një fjalie, ku vetëm germa e parë e fjalës së parë shkruhet me të madhe, mund të lexohet më lehtë nga vizitorët.

    Këtu ke disa shembuj titujsh të shkëlqyer listimesh:

    • Vend i rehatshëm në mal për shefa kuzhine
    • Studio ekologjike pranë LAX
    • Vilë luksoze buzë plazhit me pishinë

    Për më shumë detaje, lexo këto udhëzime për shkrimin e titullit të listimit.

    Trego historinë e hapësirës tënde

    Listimi yt është vendi ku promovon ambientin tënd dhe rrëfimi i historive është një element kyç i një marketingu të shkëlqyer. Shpesh, historia që tregon është përvoja që u ofron vizitorëve. Prandaj ndihmoji ata ta imagjinojnë veten si heronj në historinë e aventurës së tyre. A ke një apartament në katin e fundit me një pemë jashtë? "Do të ndihesh sikur je në një shtëpi mbi pemë!" Edhe një dhomë modeste në qendër të qytetit mund të jetë "një bazë e përkryer për eksplorim." Për më shumë frymëzim, zbulo këshillat e superpritësve Tereasa dhe David se si ta tregosh historinë tënde në mënyrë që të bëjë efekt.

    Mendo si udhëtar

    Nuk është nevoja të jesh shkrimtar i madh për të hartuar një përshkrim tërheqës, por gjuha e përdorur duhet të jetë e përmbledhur dhe bindëse. Fillo të shkruash, duke menduar si një udhëtar: filloje përshkrimin me informacionet e domosdoshme, duke theksuar njëherësh pikat e forta.

    Për shembull, pritësi Ryan nga Santa Marta, Kolumbi, thotë se u jep gjithmonë kontekst vizitorëve të tij që përpara. "Duke qenë se është një vendndodhje mjaft e largët, ka shumë informacione që duam t'i ndajmë me klientët tanë," - thotë ai. "Kemi energji elektrike, por jemi në një zonë shumë rurale. Kur ndërpritet energjia, mund të zgjasë disa ditë." Për aq kohë sa vizitorët e tij e dinë këtë që përpara se të prenotojnë, ata e kuptojnë se nuk do të kenë një përvojë tipike udhëtimi dhe mund të marrin masat në përputhje me rrethanat.

    Nëse nuk e di se nga t'ia nisësh, fol me një mik dhe përshkruaj se si është të qëndrosh në banesën tënde. Shpesh detajet më të mira dalin në pah menjëherë, në një mënyrë tërheqëse dhe në formë bashkëbisedimi, gjë që krijon një përshkrim tërheqës të listimit.

    Përshkruaj me kujdes dhe në mënyrë specifike

    "Dalje e drejtpërdrejtë në plazh dhe pamje mahnitëse të oqeanit nga çdo dhomë". Kështu e fillon përshkrimin pritësi Matthew për listimin e tij në Nicaragua.

    Për listimin e saj në Mammoth Lakes, Kaliforni, Olga thekson parkimin e volitshëm, sepse e di nga përvoja që skiatorëve u pëlqen t'i marrin pajisjet e tyre të skijimit lehtësisht në pronë. Ajo thekson gjithashtu se banesa e saj ka një oxhak me dru, sepse e di që skiatorëve u pëlqen të çlodhen pranë zjarrit pas një dite të tërë në shpatet me dëborë.

    Shkruaj sa më shkurt

    Zakonisht, njerëzit i lexojnë përshkrimet e listimeve për karakteristikat që kërkojnë, pa i lexuar të gjitha hollësisht. Të shkruash në internet do të thotë të shkruash për lexime filtruese, prandaj shkruaj sa më shkurt. Përmend aspekte që nuk janë përshkruar diku tjetër në faqen e listimit dhe përdor listën e kontrolleve të shërbimeve për të ndarë informacione rreth gjithë shërbimeve që ofron, si wifi, parkim dhe ajër të kondicionuar. Kështu, listimi yt do të shfaqet kur vizitorët të filtrojnë pikërisht ato shërbime.

    Shkruaj me vërtetësi dhe sinqeritet

    Edhe pse mund të duash të tregosh se sa i veçantë është ambienti yt, mos e tepro dhe mos ekzagjero. Informacionet e qarta për përfitimet unike dhe për çdo gjë të pazakontë, i ndihmojnë vizitorët e mundshëm të vendosin menjëherë nëse hapësira jote është e duhura për ta.

    Është veçanërisht e rëndësishme të shtosh kushte lehtësuese dhe të theksosh çdo aspekt të pronës tënde që mund të përbëjë një problem për disa vizitorë. Në seksionet "Gjëra të tjera për t'u pasur parasysh” dhe "Hapësira" ke mundësi t'i shtosh këto informacione.

    "Në listimin tënd, sigurohu që të përfshish edhe gjërat disi të pazakonta të pronës tënde," - thotë superpritësi Nikki nga San Francisko. "Shpjegoji ato në një mënyrë të sinqertë dhe të qartë, por pa i cilësuar si defekte. Ideja është që të ofrosh transparencë të mjaftueshme për t'i ndihmuar vizitorët të zgjedhin pronën që duan."

    Shpalose personalitetin tënd

    Pavarësisht nëse publikon një dhomë private në banesën tënde apo ofron disa prona, vizitorët do të donin të dinin më shumë rreth teje. Mos ki frikë ta shpalosësh personalitetin tënd.

    Shfrytëzoji në maksimum diçiturat e fotografive

    Fotografitë janë një nga faktorët kryesorë që i shtyn vizitorët të prenotojnë hapësirën tënde, ndërsa diçiturat janë një mundësi për të lidhur pamjet me përjetimet reale të vizitorëve. Nëse nuk di se çfarë diçiture t'i vendosësh një fotografie, mendo të shtosh atë që nuk arrin të kapësh me kamera.

    Nëse po shfaq një krevat, tregoju vizitorëve përmasat e tij dhe llojin e dyshekut, nëse e sheh të arsyeshme. A ke një fotografi të një qosheje të rehatshme pranë dritares? Mund të përmendësh se është vendi i përkryer për t'u strukur me një libër, nën perëndimin e diellit.

    Lexo përshkrimet e listimeve të tjera për frymëzim

    Lexo përshkrimet e listimeve të pronave interesante për t'u frymëzuar dhe kontrollo recensionet e pritësve të tjerë për të kuptuar llojet e momenteve dhe detajet që u pëlqejnë vizitorëve. Pavarësisht nga lloji i hapësirës që ke, identifikimi i mundësive për të befasuar vizitorët, do t'i japë jetë listimit tënd.

    Informacioni në këtë artikull mund të ketë ndryshuar që nga publikimi.

    Veçantitë

    • Fokusohu në atë që e bën hapësirën tënde unike

    • Jep detaje të sakta për hapësirën tënde, për të krijuar pritshmëritë e duhura

    • Përditëso detajet e listimit
    • Zbulo më shumë në udhëzuesin e plotë se si të krijosh një listim të suksesshëm

    Airbnb
    18 nën 2020
    A ishte e dobishme kjo?