Si t'i organizosh fotografitë e listimit në prezantimin e banesës

Zgjidh, shfleto, prenoto. Kjo është ajo që do doje të bënte çdo udhëtar kur listimi yt shfaqet në rezultatet e kërkimit, apo jo? Shpesh mund të ndikosh në vendimin e tyre për të qëndruar në ambientin tënd ose që të vazhdojnë të shfletojnë imazhet që ke ngarkuar të hapësirës sate.

Përveç kohës së kushtuar shkrepjes së fotografive të shkëlqyera të listimit dhe zgjedhjes së më të mirave për të ndarë, çfarë tjetër mund të bësh për të joshur vizitorët? Provo ta shndërrosh galerinë fotografike në një prezantim virtual të organizuar.

Galeria e fotografive përbëhet nga të gjitha imazhet që ke ngarkuar në listim. Në ekrane më të vegjël si smartfonët, vizitorët mund të vizitojnë galerinë tënde të fotografive duke shtypur imazhin e kopertinës që ndodhet në krye të faqes së listimit tënd.

Në ekrane më të mëdha si tabletat dhe laptopët, një grupim me 5 fotografi zëvendëson imazhin e vetëm të kopertinës, duke i ndihmuar vizitorët të krijojnë një ide më të mirë të asaj që e bën ambientin tënd interesant. Ata mund të zgjedhin cilindo nga imazhet për të shfletuar pjesën tjetër të galerisë që shfaqet në një grupim më të madh vertikal.

Këtë grupim më të madh mund ta organizosh sipas dhomave ose zonave të hapësirës sate. Konsideroje sikur po u bën vizitorëve një prezantim virtual, një mundësi për t'u njohur me çdo cep të hapësirës sate para prenotimit.

Fillo duke ngarkuar imazhe të qarta dhe të ndriçuara mirë të çdo dhome dhe zone të ambientit që ke vënë në dispozicion të vizitorëve. Superpritësja Sarah nga Sayulita, Meksikë, sugjeron përfshirjen e "të paktën 2 fotografive të çdo dhome gjumi nga kënde të ndryshme, në mënyrë që vizitorët të dinë nëse ka një dollap, tavolinë ose gjithçka tjetër."

Më pas, nëse nuk e ke bërë ende, shto disa fotografi të shërbimeve të veçanta ose detaje të tjera. Ato mund të shfaqin një kuzhinë të pajisur mirë, një zyrë me derë ose një dhomë lojërash për fëmijë me gjithçka që nevojitet.

Fotografitë e kushteve lehtësuese, si një hyrje pa shkallë ose dyer të gjera, mund të ofrojnë gjithashtu informacione të rëndësishme. Vizitorët zakonisht duan të dinë se çfarë e bën hapësirën tënde unike dhe një vendqëndrim të shkëlqyer.

Pasi të kesh përfunduar me galerinë e fotografive, mund ta organizosh atë në një prezantim virtual. Përditëso listimin me këta dy hapa të thjeshtë:

1. Tek detajet e listimit, zgjidh Prona dhe dhomat, pastaj lëviz poshtë për të modifikuar Dhomat dhe hapësirat.
2. Do të shfaqet një listë e zonave ose dhomave që mund të përdorin vizitorët. (Për të shtuar ose hequr dhoma, shko te Modifiko dhomat dhe hapësirat.) Zgjidh një dhomë në listë, zgjidh butonin Shto fotografi dhe zgjidh fotografitë e kësaj dhome që janë në galerinë tënde të fotografive. Përsërit të njëjtin proces për çdo dhomë.

Renditja e çdo fotografie në galerinë fotografike sipas dhomave ose zonave specifike ndihmon në krijimin e një prezantimi tërheqës dhe të thjeshtë për t'u ndjekur nga vizitorët. Është normale të kesh edhe disa fotografi që nuk i përkasin asnjë grupi në veçanti, të cilat shkojnë automatikisht në seksionin "Fotografi të tjera" në fund të prezantimit. Thjesht sigurohu që këto imazhe të mos i përkasin ndonjë kategorie për të mos krijuar çrregullim.

Pasi të kesh përditësuar listimin, galeria organizohet sipas dhomave ose zonave. Vizitorët marrin një pamje të përgjithshme të pronës që u mundëson atyre të zbulojnë çdo zonë, ose mund të ndjekin gjithë prezantimin. Prezantimi fillon zakonisht me dhomën e ndenjjes, pastaj zhvendoset në kuzhinë, dhomat e gjumit, banjat, ambientet e jashtme dhe çdo hapësirë tjetër që ke në listim.

Është e rëndësishme të theksohet se organizimi i galerisë fotografike sipas dhomave apo zonave nuk do të ndikojë në fotografinë e kopertinës ose në grupimin me 5 fotografi në kreun e listimit. Kjo është thjesht një mënyrë tjetër për t'u dhënë vizitorëve kureshtarë informacionin dhe besimin që u duhet për të prenotuar një qëndrim në ambientin tënd.