Vazhdo përpara për të hyrë në rezultatet e sugjeruara

    A është hapësira ime e përshtatshme për Airbnb?

    Për çdo ambient ekziston një vizitor perfekt. Çelësi është të përcaktosh pritshmëri të qarta.
    Nga Airbnb, më 6 jan 2020
    Lexim 4-minutësh
    Përditësuar më 12 tet 2021

    Veçantitë

    • Mund të ofrosh një dhomë private ose të përbashkët, një banesë të plotë ose një hapësirë unike

    • Minimumi i domosdoshëm është një zonë gjumi e rehatshme dhe një banjë

    • Tregohu transparent për të mirat dhe të këqijat e listimit tënd

    • Vendos një çmim të drejtë. Vizitorët nuk i kanë problem kushtet modeste nëse çmimi është i mirë

    Mund të mendosh që një varkë e rehatshme me vela ose një apartament mbi një lokal muzike në qendër mund të mos pëlqehen aq shumë në Airbnb, por e vërteta është që vizitorët tërhiqen nga lloje të ndryshme ambientesh, edhe nga ato unike apo modeste. Gjithë marifeti qëndron në krijimin e detajuar dhe transparent të një listimi që tregon se çfarë e bën hapësirën tënde tërheqëse, qoftë ajo luksoze, e çuditshme apo e thjeshtë dhe ekonomike.

    Fillo me gjërat bazë

    Çfarë të duhet për një hapësirë në Airbnb? Minimumi që presin vizitorët është një ambient i pastër e i rehatshëm për gjumë dhe një banjë. Jo të gjitha listimet ofrojnë kuzhinë, por është e rëndësishme të specifikosh nëse vizitorët do të kenë një hapësirë gatimi.

    Përcakto llojin e pronës

    Hapësirat e Airbnb janë nga më të ndryshmet, prandaj është e rëndësishme të specifikosh me saktësi llojin e saktë të pronës në listim. Është shtëpi? Apartament? Strukturë me fjetje dhe mëngjes apo hotel boutique? Disa listime madje janë kategorizuar si "hapësira unike", si shtëpitë mbi pemë, yurtet, kampet, varka me vela, mullinjtë e erës, rulotat etj.

    Zgjidh se ku mund të hyjnë vizitorët

    Mund t'u thuash vizitorëve se do të kenë qasje private në të gjithë pronën tënde, në një dhomë private ose se do të ndajnë hapësira të tilla si zona e gjumit, kuzhina ose banja me njerëz të tjerë si familja jote, shokët e dhomës ose vizitorë të tjerë. Varet nga ti nëse ua kushton plotësisht hapësirën vizitorëve apo mban aty edhe sendet e tua. Ajo që ka rëndësi është që ta mbash hapësirën të pastër dhe të komunikosh me vizitorët për atë që duhet të presin.

    Tregohu transparent për të mirat dhe të këqijat

    Pritësja Joy nga San Francisko ka një hapësirë me pozicion të mirë në qendër të qytetit, gjë që e bën shumë praktike, por ndonjëherë pak të zhurmshme. Ajo kuptoi se të qenit e sinqertë në listimin e saj për të mirat dhe të këqijat ishte shumë e rëndësishme dhe kjo ka ndikuar në qindra recensionet e mira që ka marrë. "Prakticiteti më i madh i hapësirës sime është pozicioni qendror në qytet," thotë Joy. "Nëse nuk je tip që të pëlqen frenezia e qytetit, kjo mund të mos jetë hapësira që bën për ty."

    Trego detaje

    Abhay, pritës i një dhome private në San Francisko, e ka shtuar qenin e tij të madh e të bardhë, Kodin, si një veçori të spikatur të listimit të tij. Duke e specifikuar qartë faktin që ka një qen, ka bërë që ky i fundit të jetë pjesë e mikpritjes së vizitorëve të tij në Airbnb. "Ajo që kuptova ishte se personat që qëndrojnë tek unë i kanë qejf qentë," thotë Abhay. "Ata që nuk i pëlqejnë qentë shkojnë diku tjetër."

    Qartësia është thelbësore: nëse përmend kafshë shtëpiake në një listim është një fillim i shkëlqyer, por fotografitë vlejnë sa një mijë fjalë, pasi ka vizitorë që prenotojnë pa lexuar gjithçka deri në fund. Nëse hapësira jote ka veçori unike (si kafshë shtëpiake), do të ishte mirë të konfirmoje gjatë procesit të prenotimit nëse vizitorët e kanë lexuar plotësisht përshkrimin e listimit.

    Informo paraprakisht

    Tim, pritës në Kaliforninë Veriore, e përshkruan hapësirën e tij si një "ambient pushimi rustik" pa e hiperbolizuar aspak. Vizitorët duhet të ngjiten në një shkallë druri të pjerrët deri te hyrja dhe e vetmja vaskë e disponueshme është jashtë, gjë që për disa vizitorë mund të jetë një luks. Ai tregon që në fillim për natyrën e thepisur të pronës dhe ka kuptuar se vizitorët e prenotojnë hapësirën e tij pikërisht për afërsinë me natyrën dhe për faktin që nuk është si gjithë të tjerat.

    Vendos një çmim realist për ambientin tënd

    Nëse hapësira jote nuk është Taj Mahal, çfarë pastaj! Shumë vizitorëve u pëlqen të qëndrojnë në një ambient modest për aq kohë sa raporti çmim-cilësi është i duhuri për ta. Për pritësit e rinj, konsidero të fillosh me një çmim pak më të ulët se ai që synon. Kjo do të të ndihmojë të tërheqësh vizitorë dhe pasi të kesh marrë një disa recensione të shkëlqyera, mund ta rivlerësosh dhe ta rritësh çmimin nëse nevojitet.

    Një hapësirë për të gjithë

    Kushdo që ka një hapësirë të lirë për të dhënë me qira, mund të korrë sukses si pritës në Airbnb. Nuk ekziston listimi "ideal". Mjafton të tregohesh transparent dhe të japësh sa më shumë detaje përmes përshkrimit dhe fotografive, për t'i ndihmuar vizitorët të kuptojnë se çfarë të presin. Ekziston një hapësirë perfekte për të gjithë në Airbnb, duke filluar nga dhomat modeste, ambientet rustike të pushimit e deri te pronat luksoze.

    Veçantitë

    • Mund të ofrosh një dhomë private ose të përbashkët, një banesë të plotë ose një hapësirë unike

    • Minimumi i domosdoshëm është një zonë gjumi e rehatshme dhe një banjë

    • Tregohu transparent për të mirat dhe të këqijat e listimit tënd

    • Vendos një çmim të drejtë. Vizitorët nuk i kanë problem kushtet modeste nëse çmimi është i mirë

    Airbnb
    6 jan 2020
    A ishte e dobishme kjo?