Vazhdo përpara për të hyrë në rezultatet e sugjeruara

    Versioni i verës 2022 i Airbnb: Çfarë duhet të dinë pritësit

    Po krijojmë mënyra të reja për zbulimin e listimeve të tua dhe po shtojmë AirCover për vizitorët.
    Nga Airbnb, më 11 maj 2022
    Video 8-minutëshe
    Përditësuar më 11 maj 2022

    Veçantitë

    Mesazh nga Brian Chesky, Drejtor Ekzekutiv dhe Bashkëthemelues i Airbnb

    Secila nga banesat e tua në Airbnb është unike. Por gjatë 25 viteve të fundit, kërkimi tradicional i udhëtimeve e ka bërë të vështirë gjetjen e tyre. Kjo ndodh sepse njerëzit duhet të vendosin vendndodhjen dhe datat në një kuti kërkimi dhe u shfaqen vetëm rezultatet që përputhen me ato që shkruajnë në kuti.

    Duke filluar nga sot, po e bëjmë më të lehtë se kurrë që njerëzit t'i zbulojnë banesat e tua në Kategoritë e Airbnb. Tani kur vizitorët të hapin Airbnb, do t'u shfaqen menjëherë mbi 50 kategori me 4 milionë banesa që specifikojnë ato gjëra që i bëjnë pronat të shkëlqyera, duke përfshirë stilin dhe shërbimet e tyre; vendndodhjen dhe aktivitetet në afërsi si golf, sërf dhe ski.

    Edhe nëse vizitorët kërkojnë një destinacion specifik, do t'u shfaqim atyre kategori me banesa të tjera që mund të mos i kishin gjetur dot kurrë më parë. Do të shtojmë edhe më shumë kategori me kalimin e kohës, sepse mendojmë se mund të ketë një kategori për çdo banesë dhe çdo pritës. Dhe nuk mbaron me kaq.

    Gjithnjë e më shumë njerëz po qëndrojnë për kohë më të gjatë, ndaj donim të ofronim edhe më shumë alternativa për këto udhëtime. Për këtë arsye po prezantojmë qëndrimet e ndara, një veçori e re novatore që lidh dy banesa në një udhëtim të vetëm. Kjo do të thotë se vizitorëve do t'u shfaqen mesatarisht deri 40% më shumë nga banesat e tua kur të kërkojnë qëndrime më të gjata. Po shtojmë gjithashtu mbrojtjet e AirCover, të cilat ua prezantuam pritësve vjeshtën e kaluar, për vizitorët e tu.

    Me të gjitha këto veçori në një përditësim të vetëm, ky prezantim përbën ndryshimin më të madh të një dekade në Airbnb.

    —Brian Chesky

    Kategoritë e Airbnb

    Po prezantojmë një mënyrë të re kërkimi të krijuar rreth kategorive të Airbnb. Kur vizitorët shfletojnë Airbnb, u shfaqen mbi 56 kategori që grupojnë banesat në koleksione të përpunuara në bazë të stilit unik, vendndodhjes ose afërsisë me një aktivitet udhëtimi.

    Kategoritë paraqesin vende me pamje të mrekullueshme ose dizajn frymëzues, prona të vendosura pranë një liqeni ose një parku kombëtar dhe banesa që janë pranë qyteteve ikonike ose fushave të golfit. Këto janë vetëm disa nga kategoritë që përfshijnë 4 milionë banesa unike të mundësuara nga ju.

    Kur vizitorët kërkojnë sipas një destinacioni të caktuar, do të zbulojnë listime brenda një kategorie të quajtur "Të gjitha banesat". Gjithashtu, do t'u shfaqen kategori të tjera në bazë të vendndodhjes, duke e bërë më të thjeshtë zbulimin e banesave të mahnitshme brenda ose jashtë zonës së kërkimit. Gjithashtu, listimet mund të shfaqen në disa kategori. Pra, nëse banesa jote pranë liqenit Tahoe përfshin një kuzhinë shefi, listimi mund të shfaqet në kategorinë "Pranë liqenit" dhe në kategorinë "Me kuzhinë shefi", krahas rezultateve të kërkimit pranë liqenit Tahoe.

    Përfitimet janë edhe më të mëdha për ata nga ju që kanë listime jashtë destinacioneve kryesore turistike. Kategoritë e bëjnë më të lehtë për vizitorët të zbulojnë qëndrime unike në vende që përndryshe nuk do t'i kishin kërkuar. Për shembull, një muzikant aspirant që kërkon në kategorinë "Hapësira krijuese" mund të gjejë një banesë në Xhorxhia, me një studio të kompletuar regjistrimi.

    Kategoritë mund të ndihmojnë gjithashtu për t'i frymëzuar vizitorët që të qëndrojnë në vendndodhje të reja. Me mënyrat e mëparshme të kërkimit, dikush që prenoton një pushim në Mbretërinë e Bashkuar mund të ketë menduar vetëm për të qëndruar në Londër ose në vendet që njeh. Sot, ata mund të kërkojnë në kategoritë që u interesojnë dhe të frymëzohen për të qëndruar në një shtëpi fshati jo larg Oksfordit, ose në një shtëpizë pranë Mançesterit.

    Banesat në çdo kategori i nënshtrohen një procesi përzgjedhjeje. Miliona listime aktive në Airbnb vlerësohen duke përdorur mësimin automatik për të analizuar titujt, përshkrimet, diçiturat e fotografive, të dhënat e strukturuara nga pritësit dhe recensionet.

    Këto kategori të reja janë vetëm fillimi i kësaj mënyre të re eksplorimi. Me kalimin e kohës do të prezantojmë edhe më shumë kategori që tregojnë karakteristikat unike dhe vendndodhjet e veçanta të pronave të tua.

    Çfarë mund të bësh si pritës:

    • Listimet vazhdojnë të renditen në bazë të një sërë faktorësh, duke përfshirë cilësinë, çmimin, popullaritetin, afërsinë në rastin e kërkimeve të vendndodhjeve dhe cilësinë e fotografive. Prandaj sigurohu që listimi të jetë i përditësuar, i plotë dhe i saktë.
    • Fotografitë e listimit që përfaqësojnë një kategori dhe kanë potencialin për të frymëzuar, kanë tendencë të shfaqen më lart në kategori. Sigurohu që të shtosh fotografi të shkëlqyera në listimin tënd.
    • Thekso karakteristikat unike të ambientit tënd, si rëndësia e tij historike ose veçoritë e arredimit, brenda cilësimeve të listimit.
    • Mëso më shumë rreth kategorive të Airbnb.

    Qëndrime të ndara

    Ndërsa gjithnjë e më shumë vizitorë kërkojnë qëndrime më të gjata, ata mund të gjejnë disponueshmëri të kufizuar të ambienteve të disponueshme për gjithë udhëtimin e tyre.

    Si rezultat, nëse listimi yt nuk do të ishte i disponueshëm për gjithë kohëzgjatjen e dëshiruar të qëndrimit të një vizitori, nuk do të ishte shfaqur. Për këtë arsye krijuam qëndrimet e ndara, një veçori e re novatore që u mundëson vizitorëve të ndajnë një udhëtim midis dy shtëpive, duke bërë kështu që vizitorët të gjejnë deri në 40% më shumë listime kur kërkojnë një qëndrim prej 14 netësh e lart.*

    Kur një vizitor kërkon një udhëtim prej një jave a më shumë, qëndrimet e ndara shfaqen automatikisht brenda rezultateve të kërkimit. Më pas vizitori do të mund të zgjedhë midis listimeve të veçanta të disponueshme për kohëzgjatjen e qëndrimit të tij ose alternativave që e ndajnë udhëtimin midis dy listimeve në të njëjtin destinacion.

    Në të kaluarën, nëse një vizitor kërkonte një udhëtim njëmujor, por ke pasur disponueshmëri vetëm për dy javë gjatë asaj kohe, ambienti yt nuk do të shfaqej në rezultatet e kërkimit. Me qëndrimet e ndara, listimi yt mund të lidhet me një listim tjetër për të mbuluar gjithë udhëtimin, duke u kthyer kështu në një alternativë për më shumë vizitorë.

    Çdo qëndrim i ndarë lidh dy prona që përputhen me vendndodhjen, llojin e pronës dhe shërbimet që rezultojnë nga kërkimi. Për shembull, nëse një familje kërkon një ambient me kushte lehtësuese, si hyrje pa shkallë për vizitorët ose dyer më të gjera, funksioni "Qëndrime të ndara" do të përfshijë dy listime që përmbajnë këto karakteristika.

    Kur hyn në qëndrimet e ndara në një hartë, një vijë e animuar do të lidhë vizualisht dy ambientet për t'u treguar vizitorëve distancën mes tyre dhe renditjen e qëndrimeve. Pasi një vizitor të zgjedhë një qëndrim të ndarë, ai udhëzohet përmes një ndërfaqeje lehtësisht të përdorshme për të prenotuar secilin qëndrim, një nga një, në të njëjtën mënyrë siç prenotohet sot listimi yt.

    Çfarë mund të bësh si pritës:

    • Listimet do të kualifikohen për t'u përfshirë në kategorinë e qëndrimeve të ndara nëse kanë një disponueshmëri minimale prej tre netësh, ndaj mund të duash ta përshtatësh kalendarin përkatësisht.
    • Për t'u kualifikuar për më shumë qëndrime të ndara, të rekomandojmë ta rrisësh kohëzgjatjen maksimale të qëndrimit në të paktën shtatë net.
    • Tani është gjithashtu momenti i duhur për të theksuar shërbimet më të kërkuara për qëndrime më të gjata, si wifi i shpejtë dhe i besueshëm, një hapësirë pune praktike për laptop dhe kushte lehtësuese.
    • Mëso më shumë se si të tërheqësh vizitorë të interesuar që të qëndrojnë më gjatë.

    Mbrojtja nga AirCover për çdo pritës dhe vizitor

    Forca e Airbnb bazohet në angazhimin e pritësve për t’u ofruar vizitorëve qëndrime të shkëlqyera. Ndërsa gjithnjë e më shumë vizitorë zbulojnë më shumë ambiente në Airbnb, duam që ata ta dinë se nëse diçka nuk shkon mirë, do të punosh me ta për të gjetur një zgjidhje.

    Në rastin e rrallë që ndodh diçka jashtë kontrollit tënd dhe nuk je në gjendje ta zgjidhësh problemin, Airbnb është aty për të ndihmuar. Prandaj po shtojmë edhe më shumë mbrojtje nga AirCover për të përfshirë çdo pritës dhe çdo vizitor. Kjo do të sigurojë që të gjithë të kenë besim për të pritur vizitorë dhe për të qëndruar në Airbnb.

    Në nëntor të vitit 2021, prezantuam AirCover për pritësit, mbrojtje nga A-ja te Zh-ja falas për çdo pritës dhe vetëm në Airbnb. AirCover për pritësit ofron Mbrojtjen e pritësit nga dëmtimet deri në 1 milion dollarë dhe Sigurimin për përgjegjësinë e pritësit deri në 1 milion dollarë.**

    Tani, nëse lind një problem serioz gjatë qëndrimit të një vizitori që ti nuk je në gjendje ta zgjidhësh, AirCover ofron katër mbrojtje për çdo vizitor në çdo qëndrim:

    1. Garancia e mbrojtjes së prenotimit: Në rast se të duhet ta anulosh prenotimin e një vizitori deri në 30 ditë para mbërritjes, do të të gjejmë një banesë të ngjashme ose më të mirë, ose do ta rimbursojmë vizitorin me shpenzimet e Airbnb.
    2. Garancia e regjistrimit: Nëse një vizitor nuk mund të regjistrohet në ambientin tënd dhe nuk mund ta zgjidhësh problemin, për shembull, nëse vizitori nuk mund të hyjë në pronën tënde dhe nuk mund të të kontaktojë, do t'i gjejmë atij një banesë të ngjashme ose më të mirë për kohëzgjatjen e qëndrimit të tij fillestar, ose do ta rimbursojmë me shpenzimet e Airbnb.
    3. Garancia e konformitetit të prenotimit: Nëse kurdo qoftë gjatë qëndrimit të një vizitori, hapësira nuk është siç është reklamuar, për shembull, frigoriferi nuk funksionon më dhe nuk mund ta rregullosh lehtësisht, ose ka më pak dhoma gjumi se ç'është publikuar, vizitori ka tre ditë kohë për ta raportuar, ndërkohë që ne do t'i gjejmë një banesë të ngjashme ose më të mirë, ose do ta rimbursojmë me shpenzimet e Airbnb.
    4. Linjë sigurie 24 orë: Nëse vizitori ndihet i pasigurt, do të ketë qasje me përparësi ditë e natë, tek agjentët e sigurisë të trajnuar posaçërisht.

      Merr detajet e plota se si e mbron AirCover prenotimin e çdo vizitori dhe çdo përjashtim të vlefshëm.

      Për rikujtesë, AirCover është gjithmonë i përfshirë dhe gjithmonë falas si për ty ashtu edhe për vizitorët e tu. Veçoritë e tij janë gjithashtu të disponueshme drejtpërdrejt në aplikacionin dhe faqen e internetit të Airbnb, duke e bërë më të lehtë për vizitorët të të kontaktojnë ose të marrin ndihmë nga Asistenca e komunitetit, nëse është e nevojshme.

      Çfarë mund të bësh si pritës:

      • Vazhdo të jesh i gatshëm t'u përgjigjesh vizitorëve të tu, sepse ti je gjithmonë personi më i përshtatshëm për të zgjidhur shqetësimet e vizitorëve.
      • Gjej përgjigje për pyetjet rreth AirCover për vizitorët.
      • Nëse nuk e ke bërë ende, shqyrto përfitimet falas që të janë vënë në dispozicion me AirCover për pritësit.

      *Sipas të dhënave të testit të brendshëm të Airbnb më 14/4/2022.

      ** Mbrojtja e pritësit nga dëmtimet, Sigurimi për përgjegjësinë e pritësit dhe Sigurimi për përgjegjësinë gjatë përvojave nuk i mbulojnë pritësit që ofrojnë qëndrime nëpërmjet Airbnb Travel, LLC, ose pritësit me qëndrime në Kinën kontinentale dhe Japoni, ku zbatohen Plani i mbrojtjes së pritësve në Kinë,Sigurimi për pritësit në Japoni dhe Sigurimi për mbrojtjen gjatë përvojave në Japoni. Mbrojtja e pritësit nga dëmtimet nuk lidhet me Sigurimin për përgjegjësinë e pritësit. Ki parasysh se të gjitha shumat limit të mbulimit jepen në USD dhe aplikohen kushte të përgjithshme dhe përjashtime të tjera.

      Informacioni në këtë artikull mund të ketë ndryshuar që nga publikimi.

      Veçantitë

      Airbnb
      11 maj 2022
      A ishte e dobishme kjo?