Si të krijosh një faqe listimi tërheqëse

Mundësia e parë për të tërhequr vëmendjen e vizitorëve të mundshëm është faqja e listimit tënd, e cila përfshin titullin, përshkrimin, fotografitë, shërbimet dhe më shumë. Kur përgatit listimin, është e rëndësishme të zgjedhësh me kujdes kalendarin dhe cilësimet e çmimeve, gjë që të ndihmon të marrësh vetëm prenotimet që dëshiron, kur i dëshiron dhe me çmimin e duhur.

Si pritës, mund të vendosësh vetë se kur dhe si ta rezervojnë vizitorët ambientin tënd. Ja disa veçori që duhen marrë parasysh:

• Cilësimet e kalendarit: Cakto numrin minimal dhe maksimal të netëve që një vizitor mund të prenotojë, shmang kërkesat për prenotim brenda së njëjtës ditë, e të tjera si këto tek cilësimet e kalendarit. Ki parasysh që ta mbash kalendarin të përditësuar duke bllokuar datat kur nuk ndodhesh aty ose kur nuk mund të presësh vizitorë.
• Kërkesat për prenotim: Ky funksion të mundëson të shqyrtosh një kërkesë për prenotim para se ta pranosh. Vetëm sigurohu që t'i përgjigjesh vizitorit brenda 24 orësh.
• "Prenoto në çast": Vizitorët kërkojnë shpesh listime me funksionin "Prenoto në çast", gjë që u mundëson ta prenotojnë listimin tënd pa miratim paraprak. Kjo sinjalizon gjithashtu se je gati të presësh këdo që përmbush kriteret e prenotimit, një pjesë e rëndësishme e të qenit një pritës gjithëpërfshirës.

Këto sugjerime mund të të ndihmojnë që listimet e tua të spikatin në rezultatet e kërkimit në Airbnb për vizitorët e mundshëm.

• Krijo një përshkrim të detajuar. Sigurohu që titulli dhe përshkrimi të përfshijnë çdo gjë që duhet të dinë vizitorët për hapësirën tënde, si p.sh. afërsia me atraksionet natyrore vendase. Për shembull, një pritës që ka një hapësirë të rehatshme pranë detit mund të shkruajë "Pushime të rehatshme pranë plazhit" si titull të listimit të tij.
• Përdor gjuhë gjithëpërfshirëse. Bëje të qartë në përshkrimin e listimit se mirëpret njerëz të të gjitha prejardhjeve.
• Rendit shërbimet që ofron. Shërbimet më të kërkuara janë wifi, hyrja me vetëshërbim, një hapësirë pune për laptop, parkim falas dhe një hapësirë e përshtatshme për kafshë shtëpiake, ndaj sigurohu që të renditësh çdo gjë që ofron.
• Ndaj rregullat e shtëpisë. Këto përcaktojnë pritshmëritë për vizitorët dhe u japin atyre një ide paraprake të stilit tënd të mikpritjes. Përdor rregullat e shtëpisë për të ndarë me vizitorët e mundshëm informacione thelbësore si p.sh. rregullorja e mospirjes së duhanit.

Imazhet tërheqëse të ndihmojnë të nxjerrësh në pah personalitetin dhe stilin tënd, prandaj është mirë t'i përditësosh shpesh fotografitë dhe të mos harrosh të shfaqësh detaje të caktuara.

• Kushtoji vëmendje të veçantë fotografisë së parë. Bashkë me titullin e listimit, ajo është gjëja e parë që do të vënë re vizitorët në rezultatet e kërkimit. "Kur kërkoj një ambient në Airbnb, shkoj gjithmonë drejt e te fotografitë. Prandaj mendo se çfarë e dallon ambientin tënd nga të tjerët ", thotë Candida, një pritëse në Joshua Tree, Kaliforni.
• Përdor imazhe nga e gjithë hapësira. Duke shtuar rreth tre fotografi nga kënde të ndryshme të secilës dhomë, u mundëson vizitorëve një shëtitje virtuale në hapësirën tënde.
• Shkruaj diçitura përshkruese. Diçiturat janë një vend i shkëlqyer për t'u treguar vizitorëve detaje të rëndësishme. Për shembull, mos harro të tregosh tavolinën e bilardos ose vaskën çlodhëse.
• Vër në dukje kushtet lehtësuese. Shumë vizitorë kërkojnë kushte lehtësuese, prandaj është e rëndësishme t'i shtosh ato tek detajet dhe fotografitë e listimit.

Shuma që tarifon për hapësirën tënde është plotësisht në dorën tënde. Ja disa gjëra që duhen mbajtur parasysh:

• Kur kërkojnë një hapësirë, vizitorët shpesh i japin përparësi çmimit, prandaj është e rëndësishme që të sigurohesh që çmimi të jetë në raport të drejtë me vendndodhjen dhe shërbimet që ofron në hapësirën tënde. Për të zbuluar se sa vlen ambienti yt, mund të provosh mjetin tonë.
• Kur vendos tarifën tënde për natë, do të të ndihmonte të merrje parasysh tarifat shtesë,si tarifat e pastrimit, tarifat për vizitorë shtesë, tarifat e shërbimit dhe taksat vendore dhe si do të ndikojnë ato në çmimin total që do të paguajnë vizitorët.
• Si pritës i ri, mund të duash të fillosh me një tarifë fillestare për natë derisa të marrësh një ose dy recensione pozitive.
• Funksioni Çmimet inteligjentetë ndihmon të caktosh një çmim konkurrues duke e përshtatur automatikisht çmimin bazuar në kërkesën për listime të ngjashme me tëndin.

Gati për ta shfrytëzuar sa më mirë listimin? Ja një listë e shkurtër kontrollesh për të të ndihmuar të fillosh:

• A i ke përditësuar cilësimet e kalendarit?
• Ke aktivizuar funksionin "Prenoto në çast"?
• A është i qartë dhe angazhues përshkrimi dhe titulli i listimit?
• A është e qartë në përshkrim se mirëpret njerëz të të gjitha prejardhjeve?
• I ke shtuar të gjitha shërbimet që ofron?
• A ke shumëllojshmëri fotografish cilësore dhe diçitura të goditura?
• Ke vendosur një çmim konkurrues për natë?

Pasi të kesh filluar të presësh vizitorë dhe të kesh marrë përshtypjet e tyre, është mirë ta përditësosh listimin rregullisht, duke u siguruar që përshkrimi dhe fotografitë të nxjerrin në pah me të vërtetë atë që është unike në ambientin tënd.

Lexo udhëzuesin për të mësuar më shumë se si të krijosh një listim të suksesshëm

Informacioni në këtë artikull mund të ketë ndryshuar që nga koha e publikimit.