Praktika gjithëpërfshirëse për të ndihmuar çdo vizitor të ndihet i mirëpritur

Të presësh vizitorë në Airbnb do të thotë t'ua hapësh ambientin tënd njerëzve nga e gjithë bota, ku gjithëpërfshirja është thelbësore.

Çelësi i një pritësi të suksesshëm është të kuptuarit se si të bësh që njerëz të të gjitha prejardhjeve të ndihen rehat dhe të qëndrojnë si në shtëpinë e tyre. Si komunitet, jemi të angazhuar të mirëpresim vizitorë të çdo race, feje, kombësie, etnie, aftësie të kufizuar, gjinie, identiteti gjinor, orientimi seksual apo moshe, me respekt dhe pa gjykim apo paragjykim.

Mikpritja gjithëpërfshirëse është një pjesë thelbësore e të qenit një pritës i suksesshëm. Kjo do të thotë:

• Të pranosh dhe të mirëpresësh gjithë vizitorët e të gjitha prejardhjeve

• Të garantosh një përvojë të barabartë dhe të plotësosh nevojat e vizitorëve

• Të krijosh lidhje përmes pikave dalluese dhe atyre të përbashkëta

• Të kesh një mendësi të hapur dhe gatishmëri për të bërë pyetje, që të dish se çfarë mund t'u nevojitet vizitorëve për qëndrimin e tyre

Airbnb ka mbledhur informacione nga pritësit, vizitorët dhe ekspertët, në mënyrë që të integrosh praktika gjithëpërfshirëse në rutinën tënde të pritjes së vizitorëve dhe të ofrosh një mikpritje të ngrohtë për çdo vizitor. Nga organizimi i listimit deri te lënia e një recensioni, këto veprime të rekomanduara mund të ndihmojnë në pakësimin e paragjykimeve të nënkuptuara dhe në mundësimin e lidhjes.

Duke e bërë të qartë një gjë të tillë, mirëpret njerëz të të gjitha prejardhjeve, mund të ndihmosh vizitorë nga komunitetet e margjinalizuara historikisht që të ndihen rehat dhe të inkurajohen për ta prenotuar ambientin tënd. Nga bisedat me vizitorët kemi mësuar se para prenotimit, njerëzit nga këto komunitete kërkojnë veçanërisht sinjale për gjithëpërfshirjen në listime.

Ja disa nga gjërat që mund të bësh për të sinjalizuar se je pritës gjithëpërfshirës:

• Bëje të qartë brenda fjalive të para të përshkrimit të listimit tënd se mirëpret njerëz të të gjitha prejardhjeve (shembujt më poshtë).

• Përshkruaj saktë kushtet lehtësuese të pronës sate dhe përditëso fotografitë.

• Shto përemrat që përdor (shembuj: ajo/asaj, ai/atij, ata/atyre) në profilin tënd. Kjo është një mënyrë për të treguar se si të pëlqen të të drejtohen dhe se interesohesh për përdorimin e përemrave të preferuar edhe të vizitorëve të tu.

• Aktivizo funksionin "Prenoto në çast" për t'u mundësuar vizitorëve ta prenotojnë listimin tënd pa miratim paraprak. Kjo sinjalizon gjithashtu se je i gatshëm të presësh këdo që përmbush kriteret e tua të prenotimit.

• Ofro miratime paraprake dhe inkurajim për vizitorët që të kontaktojnë para se të prenotojnë. Kemi mësuar se ndonjëherë vizitorët kontaktojnë me pritësit para se të prenotojnë, për të kuptuar nëse do të pranohen dhe mirëpriten.

• Para se të refuzosh kërkesën e një vizitori për prenotim, mendohu mirë për arsyen. A do të ndiheshe rehat t'ia shpjegoje këtë vizitorit ballë për ballë?

Mund të provosh të përshtatësh deklaratat gjithëpërfshirëse që përdorin pritësit e tjerë në listimet e tyre. Kemi biseduar me anëtarët e Bordit këshillimor të pritësve për të marrë këta shembuj:

1. Peter nga San Francisko shkruan: "Shtëpia ime është një ambient i sigurt për njerëz nga të gjitha pakicat dhe grupet e margjinalizuara. Mirëpres vizitorë nga të gjitha racat, besimet, gjinitë dhe orientimet seksuale."

2. "Fotografia e dytë në listimin tim tregon një monument që thotë: ‘Ti përket’", thotë Shinya nga Osaka, Japoni. Madje Shinya ka vendosur qëllimisht një fotografi që thotë: "Respektoj diversitetin dhe gjithëpërfshirjen". Këtë mund ta shkruash edhe si diçiturë.

Pasi të kenë prenotuar ambientin tënd, dërgoju një mesazh të ngrohtë dhe mikpritës vizitorëve të tu. Është shumë e rëndësishme që të jesh empatik dhe të mos bësh supozime.

• Personalizo mesazhin e mirëseardhjes me informacione nga profili i vizitorit tënd. Mund të përfshish pyetje rreth interesave të tyre, qytetit të tyre të lindjes dhe hobeve që kanë.

• Përdor gjuhë neutrale ndaj gjinisë dhe orientimit seksual kur i drejtohesh vizitorëve të tu. Është më mirë t'i shmangësh supozimet për gjininë ose statusin e marrëdhënies së dikujt.

• Nëse një vizitor pyet rreth nevojave për kushte lehtësuese, sigurohu që t'i përgjigjesh pyetjeve dhe ta pyesësh se çfarë mund t'i duhet tjetër.

Nëse ke nevojë për frymëzim, bazohu në mesazhet e pritësve të tjerë për vizitorët. Ja dy shembuj:

1. Michael nga Falcarragh, Irlandë, thotë se i jep përparësi krijimit të një raporti të ngrohtë paraprakisht. "I falënderoj gjithmonë vizitorët që kërkojnë të qëndrojnë në listimin tonë" - thotë ai. "Pastaj u them se do t'i kontaktoj kur të afrojë vizita e tyre, u uroj një ditë të këndshme dhe [u them që] nëse u nevojitet diçka ndërkohë, mos hezitojnë të më kontaktojnë."

2. Susan nga Denver shkruan: "Shtëpia jonë është shtëpia jote. Rehatohu plotësisht. Ndihu si të ishe në ambientin tënd. Nëse ke ide se si mund ta përmirësojmë përvojën e vizitorëve, na thuaj."

Vizitorët, veçanërisht ata nga komunitetet e margjinalizuara historikisht, kanë thënë se këto gjëra mund t'i bëjnë ata të ndihen më të mirëpritur:

• Aktivizo hyrjen me vetëshërbim nëse mundesh, por pyeti vizitorët nëse preferojnë t'i regjistrosh personalisht.
• Mos i vizito vizitorët pa qenë nevoja. Përkundrazi, jepu atyre privatësi dhe bëjua të qartë se je në dispozicion të tyre (personalisht ose virtualisht) nëse kanë nevojë për ty.

Recensionet janë themeli i komunitetit të besuar të Airbnb. Lënia e një recensioni për vizitorët e tu është një mundësi për të shfaqur mirënjohjen tënde dhe për të ofruar sugjerime të dobishme.

• Përdor të njëjtat standarde për vlerësimin e çdo vizitori.

• Prit vizitorë të rinj në Airbnb sa herë të mundesh dhe recensoji ata pas qëndrimit të tyre. Një recension ka shumë rëndësi, pasi i ndihmon vizitorët për prenotimet e ardhshme.

• Inkurajoji vizitorët të lënë recensione. Kemi mësuar se udhëtarët nga komunitetet e margjinalizuara historikisht shpesh lexojnë recensione para se të prenotojnë, për të mësuar nëse vizitorë të tjerë si ata janë ndier të mirëpritur.

Sigurohu që po i ndjek këto praktika gjithëpërfshirëse, veçanërisht nëse je i ri në pritjen e vizitorëve. Mos harro se gjërat më të rëndësishme kur vjen puna tek mirëpritja e gjithë vizitorëve janë t'i pyesësh vizitorët për nevojat e tyre dhe t'i mbash rrugët e komunikimit të hapura.

Mund ta hapësh derën ndaj gjithëpërfshirjes thjesht duke i pyetur vizitorët e tu "Çfarë ju duhet për t'u ndier rehat dhe të mirëpritur në hapësirën time? Dhe duke e bërë këtë, shpresojmë që vizitorët ta kenë më të lehtë ta hapin derën tënde në jetën reale dhe të kenë një përvojë të shkëlqyer qëndrimi në ambientin tënd.