Çfarë është funksioni "Prenoto në çast"

Funksioni "Prenoto në çast" u mundëson vizitorëve ta prenotojnë në çast banesën tënde për datat e disponueshme, në mënyrë që të mos kesh nevojë të kontrollosh dhe të pranosh çdo kërkesë për prenotim individualisht. Vizitorëve u pëlqen mundësia për të përdorur funksionin "Prenoto në çast" dhe shumë pritës thonë se fitojnë më shumë nëse e përdorin këtë mjet. Për më tepër, ata vlerësojnë komoditetin që ai ofron.

Mbajtja e kalendarit të përditësuar është thelbësore për përdorimin me sukses të funksionit "Prenoto në çast". Nëse nuk e përditëson kalendarin, mund të marrësh prenotime të papritura ose të anulosh një rezervim për shkak të një gabimi në planifikim, çka mund të rezultojë në një tarifë anulimi. Për t'u siguruar që kalendari yt në Airbnb të jetë gjithmonë i përditësuar, është mirë ta sinkronizosh atë me kalendarin tënd kryesor (iCal, Google etj.).

Disa pritës fillimisht mund të ngurrojnë të përdorin funksionin "Prenoto në çast" sepse kanë merak që nuk do të kenë shumë informacion për vizitorët e mundshëm para prenotimit. Para se vizitorët të mund të përdorin funksionin "Prenoto në çast", ata duhet të plotësojnë të gjitha kërkesat për vizitorin dhe të pajtohen me rregullat e shtëpisë.

Mund të vendosësh te kriteret e tua ta ofrosh funksionin "Prenoto në çast" vetëm për vizitorët që kanë një historik pozitiv, që do të thotë se kanë pasur të paktën një qëndrim dhe nuk kanë marrë asnjë recension negativ, si dhe për vizitorët që kanë kaluar procesin e verifikimit të identitetit me shumë hapa të Airbnb.

E kemi zgjeruar verifikimin e identitetit për të gjithë vizitorët që prenotojnë dhe udhëtojnë në 35 shtetet dhe rajonet më të preferuara në Airbnb, duke përfaqësuar 90% të të gjitha rezervimeve. Ne do ta bëjmë këtë globale në fillim të vitit 2023. Nëse kërkon një dokument identifikimi zyrtar nga vizitorët e tu për arsye personale, ose nëse është një kërkesë për zonën ku ndodhet prona jote, mund ta kërkosh këtë nga vizitorët duke u dërguar mesazhe përmes kutisë së mesazheve të pritjes së vizitorëve.

Edhe me aktivizimin e funksionit "Prenoto në çast", ka raste kur mund të marrësh kërkesa prenotimi nga vizitorët. Kjo mund të ndodhë nëse nuk e ke përditësuar kalendarin prej kohësh ose nëse ke anuluar një rezervim kohët e fundit. Vizitorët që nuk i plotësojnë kriteret e tua për të prenotuar në çast, mund të dërgojnë kërkesa për rezervim. Për çdo kërkesë që vjen, duhet të përgjigjesh duke e pranuar apo refuzuar rezervimin ose duke u dërguar mesazh vizitorëve të ardhshëm brenda 24 orësh.

Pavarësisht përfitimeve që sjell funksioni "Prenoto në çast", disa pritës kanë kuptuar se kërkesa për rezervim është më mirë për ta:

• Ata ofrojnë vetëm qëndrime më të gjata. Annie, një pritëse në Sonoma, Kaliforni, përdor kërkesat për rezervim sepse ofron qëndrime vetëm për 30 ditë e lart, në përputhje me rregulloret e pritjes së vizitorëve në zonën e saj. "Do doja shumë ta përdorja funksionin "Prenoto në çast", por ka shumë më tepër aspekte logjistike që duhen menaxhuar kur pret vizitorë aq gjatë," thotë ajo.
• Ata kanë kërkesa personale unike. Nichola, një pritëse në Guelph, Kanada, është e ndjeshme ndaj aromave, prandaj i duhet të mos përdorë asnjë produkt me aromë në hapësirën e saj. Për këtë arsye, ajo i përdor kërkesat për rezervim për t'u siguruar që vizitorët të jenë të gatshëm të bien dakord me rregullat e saj shumë specifike të shtëpisë. "Më zë migrena nga produktet aromatike, prandaj duhet të sigurohem që vizitorët e mi të kuptojnë se ç'do të thotë të kesh alergji nga aromat" - thotë ajo.
• Hapësira e tyre ka karakteristika të veçanta ose paraqet vështirësi. Për shembull, një dhomë private në një banesë që ka kafshë shtëpiake ose fëmijë, ose një hapësirë tepër rustike që mund të paraqesë vështirësi për vizitorë të caktuar. Kërkesat për prenotim mund të jenë një zgjedhje e mirë për t'u siguruar që vizitorët të jenë të vetëdijshëm për të gjitha aspektet unike të banesës para se të vijnë.

Nëse zgjedh të përdorësh ose jo funksionin "Prenoto në çast" është në dorën tënde, por mos harro se besueshmëria është një pjesë thelbësore e të qenit një pritës i shkëlqyer. Respekto rregulloret e anulimit të pritësit të Airbnb dhe përpiqu të shmangësh anulimin sa herë të jetë e mundur.

Megjithatë, nëse përdor funksionin "Prenoto në çast" dhe nuk ndihesh rehat me një rezervim pasi është bërë (për shembull, sepse vizitorët e tu të ardhshëm të pyesin nëse mund t'i thyejnë rregullat e shtëpisë), mund të anulosh një prenotim pa penalitet me ndihmën e mjetit të anulimit online deri në tre herë për çdo vit kalendarik.

Ki parasysh që nuk mund të anulosh asnjëherë për arsye që bien ndesh Rregulloren e mosdiskriminimit të Airbnb. Nëse anulon një rezervim, kjo tregon që funksioni "Prenoto në çast" mund të mos jetë shumë i përshtatshëm për ty në këto momente, prandaj Airbnb mund të dërgojë kërkesa prenotimi për disa nga rezervimet e tua të ardhshme.