Udhëzime të reja për të shkruar titullin e listimit

Kohët e fundit bëmë ndryshimin më të madh në Airbnb në një dekadë dhe si pjesë e rikonceptimit tonë, hoqëm nga rezultatet e kërkimit titujt e listimeve të shkruara nga pritësit. Synimi ishte që t'i paraqisnim të gjithë titujt në një format konsistent, në mënyrë që vizitorët ta kishin më të lehtë t'i lexonin, pavarësisht gjuhës ose pajisjes që preferonin.

Ke dhënë mjaft përshtypje rreth ndryshimeve dhe ke bërë shumë kërkesa për të rikthyer sërish titujt e listimeve në rezultatet e kërkimit të vizitorëve. E kuptojmë se pse e ke kaq për zemër këtë çështje: Titulli i listimit tënd është një nga gjërat e para që vizitorët lexojnë në rezultatet e kërkimit dhe një mundësi për theksuar se çfarë e bën unik ambientin tënd.

Duke filluar nga data 30 qershor, titujt e listimeve të shkruara nga pritësit do të kthehen në rezultatet e kërkimit të vizitorëve. Po japim gjithashtu udhëzime të reja për shkrimin e një titulli efektiv që mund ta ndihmojë listimin tënd të spikatë në rezultatet e kërkimit, të përcaktojë pritshmëritë për vizitorët dhe të ngjallë interes për të prenotuar hapësirën tënde.

Vizitorët kërkojnë në Airbnb me të gjitha llojet e pajisjeve me ekrane të madhësive të ndryshme. Një titull që do të ishte mirë për një shfletues interneti, do të ishte shumë i gjatë për vizitorët që kërkojnë listime përmes aplikacionit celular.

Titujt më të gjatë se ç'duhet shkurtohen automatikisht në rezultatet e kërkimit dhe pjesa e mbetur e titullit zëvendësohet me tre pika. Për shembull, "Kabinë fshati me pamje nga liqeni, gropë e madhe zjarri, rampë për varka" bëhet "Kabinë fshati me pamje nga liqeni..."

Kufizimi i karaktereve bën që titulli të shfaqet plotësisht si në desktop ashtu edhe në pajisjet celulare. Vizitorët në lëvizje priren të kërkojnë duke përdorur telefonat celularë, që do të thotë se atyre u shfaqen vetëm 32 karaktere. Nëse titulli është më i gjatë se 32 karaktere, vendos informacionin më të rëndësishëm në fillim.

Ja tre shembuj të mirë të titujve të shkurtër të listimeve:

• Loft modern me pamje nga qendra e qytetit
• Vend i rehatshëm në mal për shefa kuzhine
• Vilë buzë plazhit pranë Año Nuevo

Përdor drejtshkrimin e fjalisë, duke vendosur në titull vetëm germën e parë të fjalisë të madhe. Stili i shkrimit të titullit (ku shumica e fjalëve fillojnë me germë të madhe) mund të tingëllojë shumë zyrtar, ndërsa TË GJITHA GERMAT TË MËDHA duken si ulëritëse.

Për t'u dhënë vizitorëve një përvojë më të mirë kërkimi, mos përdor shkronja të mëdha në fjalë të tjera të titullit, përveç rastit kur është një emër i përveçëm, siç janë emrat e qyteteve. Mund të bësh edhe përjashtime për shkurtime, si MB ose një kod aeroporti, si LHR.

Ja një shembull se si nuk duhet të përdoren germat e mëdha në titullin e një listimi:

• Mobilie TË REJA PISHINË E MADHE Pamje të mrekullueshme

Ja tre shembuj të mirë të shkrimit të titujve sipas drejtshkrimit të një fjalie:

• Kabinë buzë detit në plazhin Bondi
• Dhomë vizitorësh në një shtëpi romantike të stilit viktorian
• Studio ekologjike pranë LAX

Emojit dhe simbolet mund të nënkuptojnë gjëra të ndryshme për njerëz të ndryshëm në botë, ndaj përdorimi i tyre mund t'i ngatërrojë apo hutojë ata. Për shembull, një gisht lart mund të interpretohet si shenjë miratimi, si numri një ose si gjest ofendues.

Për ta bërë titullin e listimit më miqësor dhe më të lehtë për t'u lexuar, përdor fjalë të thjeshta dhe përshkruese për ambientin tënd. Përdorimi i karaktereve të veçanta (si !, #, ose *) është i pranueshëm, por jo përsëritja e tyre për të theksuar mendimin (si !!! ose ***). Për të ndarë mendimet, përdor presje me hapësira ose vetëm një vizë të pjerrët pa hapësira.

Ja një shembull se çfarë nuk duhet të bësh:

• ****Chalet për skijim dhe golf****!!!

Ja një mënyrë më e mirë për ta shkruar këtë:

• Chalet për skijim/golf, me oborr privat

Në shumicën e rasteve, nuk është e nevojshme të rivendosësh informacionet që u shfaqen tashmë vizitorëve në rezultatet e kërkimit, si qyteti apo qyteza jote dhe numri total i krevateve. Përkundrazi, përdore titullin e listimit për të shtuar detaje unike që mund të tërheqin vëmendjen.

Për shembull, nëse listimi është në Buenos Aires, mund ta shkruash lagjen tënde, si "Recoleta", në titullin e listimit. Nëse ndodhet në Firence, Itali, mund të specifikosh "pranë Uffizi" ose një pikë tjetër referimi në afërsi të ambientit tënd. Kjo të ndihmon të qartësosh vendndodhjen e ambientit për vizitorët. Ose, nëse ke një hapësirë të dedikuar për zyra, mund të duash të theksosh në titull që është "e përshtatshme për punë".

Mund të heqësh gjithashtu fjalën "i ri" nga titulli i një listimi të ri, sepse ky informacion u është komunikuar tashmë vizitorëve përmes një distinktivi në rezultatet e kërkimit.

Lexo Rregulloren e përmbajtjes së Airbnb

Informacioni në këtë artikull mund të ketë ndryshuar që nga publikimi.