Si të shkruash një përshkrim efektiv të ambientit tënd

Kemi mësuar nga superpritësit se nuk është e thënë që ambienti të jetë i përkryer për t'u pëlqyer, por duhet t'u tregosh vizitorëve se çfarë do të gjejnë saktësisht kur të mbërrijnë.

Të shkruash një përshkrim të shkëlqyer të ambientit tënd është një nga mënyrat më të mira për të përcaktuar pritshmëritë dhe për të siguruar rezervime. Ja se si t'i entuziazmosh udhëtarët që të qëndrojnë në hapësirën tënde.

Titulli i përshkrimit është gjëja e parë që lexojnë vizitorët dhe së bashku me fotografinë e kopertinës, i shtyn ata të eksplorojnë faqen e listimit tënd. Përdore për të tërhequr vëmendjen ndaj pikave më të forta të ambientit tënd.

Ja disa shembuj titujsh të shkëlqyer listimesh:

• Kabinë e rehatshme me kuzhinë shefi
• Studio e përshtatshme edhe për qentë, pranë LAX
• Vilë buzë plazhit me kajakë

Ke 32 karaktere, duke përfshirë hapësirat, për të nxitur interesin e vizitorëve që të mësojnë më shumë rreth ambientit tënd. Pse kaq pak? Titujt më të shkurtër janë më të përshtatshëm në smartfonë dhe tableta, që përdoren në 75% të të gjitha kërkimeve në Airbnb.

Mos përdor emoji ose simbole dhe shkruaj me germë të madhe vetëm emrat e përveçëm (si "Yellowstone") dhe shkurtimet standarde (si "LAX").

Lexo udhëzimet tona për shkrimin e titujve

Ka miliona vendqëndrime në Airbnb. Për të nxjerrë në pah atë që listimi yt ka të veçantë, merr disa minuta kohë për të menduar karakteristikat që e bëjnë atë të spikatë, si vendndodhja ose shërbimet.

Në varësi të situatës, mund të specifikosh:

• "Ndodhemi 10 minuta më këmbë larg dy prej birrarive më të mira artizanale në qytet."
• "Shtigjet legjendare malore të biçikletave në zonë, janë vetëm 15 minuta larg me biçikletë ose pesë minuta larg me makinë."

Për frymëzim, provo të lexosh përshkrimet e listimeve të shkruara nga pritës të tjerë dhe lexo recensionet e tyre. Do të kesh mundësi të mësosh se çfarë lloj informacioni dhe shërbimesh vlerësojnë vërtet njerëzit në një listim.

Përshkrimi shërben për të promovuar ambientin dhe strategjia më efektive e marketingut është që ta bësh këtë duke rrëfyer historinë që fshihet pas tij. Nuk është nevoja të jesh shkrimtar i madh për të shkruar një përshkrim tërheqës, por duhet të përdorësh një gjuhë të qartë dhe bindëse.

Nëse nuk di ende se si të fillosh, bisedo me një mik duke i përshkruar se si është qëndrimi në ambientin tënd. Kështu mund të dalin në pah menjëherë detajet më të rëndësishme dhe forma bisedimore e bën tërheqës përshkrimin e listimit.

Historia që tregon mund të ketë të bëjë me përvojën që u ofron vizitorëve. Ke një apartament në katin e fundit, të rrethuar nga pemë që bëjnë hije? "Do të ndihesh sikur je në një shtëpi mbi pemë!" Një dhomë e thjeshtë në qendër të qytetit mund të jetë "vendi i përkryer për të eksploruar qytetin."

Tereasa dhe David, superpritës në Elkhorn, Wisconsin, thonë se ndarja e historisë së pronës së tyre i ka "goditur" veçanërisht vizitorët e tyre. Ata rekomandojnë që të njohësh komunitetin tënd dhe të zbulosh se çfarë ka interesante banesa ose qyteti yt, ndërsa krijon historinë tënde.

Shpesh, vizitorët që kërkojnë një vendqëndrim nuk e lexojnë përshkrimin e listimit fjalë për fjalë, por përqendrohen në karakteristikat kryesore. Prandaj bëj në përshkrim sa më të përmbledhur të listimit, duke i vendosur informacionet e rëndësishme në fillim, në mënyrë që vizitorët e mundshëm t'i gjejnë ato sa më shpejt.

Gjithashtu, përpiqu të mos përsërisësh detaje që i ke ndarë një herë. Për shembull, në listën e kontrolleve të shërbimeve mund të përfshish gjithë karakteristikat që ofron hapësira jote, si wifi, parkim dhe ajër të kondicionuar. Në këtë mënyrë përshkrimi është i përmbledhur dhe listimi do të shfaqet kur vizitorët të filtrojnë ato shërbimet në kërkimet e tyre.

Ki parasysh se teprimet apo ekzagjerimet në përshkrimet e ambientit mund të çojnë në zhgënjime dhe recensione negative. Duke qenë realist i ndihmon vizitorët që të kuptojnë përpara se të bëjnë rezervimin, nëse hapësira jote i plotëson ose jo nevojat e tyre.

"Sigurohu që të përfshish edhe gjërat disi të pazakonta të pronës sate," - thotë Nikki, një superpritëse në San Francisko. "Shpjego gjithçka në mënyrë të sinqertë dhe të qartë, por pa i cilësuar si defekte. Ideja është që të ofrosh transparencë të mjaftueshme për t'i ndihmuar vizitorët të zgjedhin pronën që duan."

Fotografitë e tua kanë shumë ndikim në vendimin e një vizitori për të prenotuar hapësirën tënde, ndërsa diçiturat janë një mundësi për të lidhur pamjet me përjetimet reale të vizitorëve. Nëse nuk di se çfarë diçiture t'i vendosësh një fotografie, mendo të shtosh atë që nuk arrin të kapësh me kamera.

Nëse shfaq një krevat, tregoju vizitorëve përmasat e tij dhe llojin e dyshekut, nëse e sheh të arsyeshme. Ke një fotografi të një qosheje të rehatshme pranë dritares? Mund të përmendësh që është një vend ideal për t'u strukur me një libër, nën perëndimin e diellit.

Lexo udhëzuesin për të mësuar më shumë se si të krijosh një listim të suksesshëm