Harto një manual të shtëpisë ku të ndash informacione për hapësirën tënde

"Si të lidhem me wifi? Ku është termostati? Për çfarë përdoret secila telekomandë? " Këto janë vetëm disa nga pyetjet që vizitorët mund të kenë gjatë qëndrimit në ambientin tënd. Përmes manualit të shtëpisë mund t'i ndihmosh ata të gjejnë përgjigjet që u duhen dhe të sigurohesh që pajisjet dhe pajimet e tjera të banesës do të përdoren siç duhet.

Manuali i shtëpisë është një mjet që të mundëson t'u ofrosh vizitorëve udhëzime të qarta hap pas hapi dhe t'u shpjegosh se ku t'i gjejnë gjërat e rëndësishme, si pajisjet e sigurisë ose ruterin e wifi. Krijoje një herë manualin tënd e nuk do të të duhet të rishkruash ose të ridërgosh emaile për çdo prenotim, gjë që të kursen shumë kohë. E duke qenë se vizitorët mund ta hapin direkt nga aplikacioni, mund ta lexojnë kudo e në çdo kohë. Pritësit Neil nga Mountain View, Kaliforni, i pëlqen se si e ndihmon ky mjet të shmangë "mesazhet në orët e vona të natës, telefonatat e vazhdueshme dhe më e keqja: recensionet e këqija.”

Shfrytëzoje sa më mirë manualin e shtëpisë me këto sugjerime të vëna në jetë nga pritës si ti.

Është një nga gjërat e para që kërkojnë vizitorët kur mbërrijnë, prandaj shumë pritës e vendosin në krye të manualit të tyre të shtëpisë. "Duan të gjithë kodin e wifi, ndaj e përdor këtë fakt që t'i bëj të hapin manualin e shtëpisë e mundësisht ta lexojnë", thotë Marit Anne nga Troms, Norvegji.

Një vend i dukshëm për fjalëkalimin e wifi është diçka veçanërisht praktike për punonjësit në distancë, të cilëve mund t'u duhet të marrin pjesë në një takim virtual, të dërgojnë një email ose të përfundojnë shkrimin e një raporti menjëherë pasi të mbërrijnë në ambientin tënd.

Rregullat dhe tabelat për parkimin në rrugë mund të jenë të paqarta, veçanërisht nëse vizitorët flasin një gjuhë tjetër. Do të ishte mirë të jepje udhëzime të qarta, si pritësit Ben dhe Angel nga Wellington, Zelanda e Re: "Mund të parkosh përballë gardhit të bardhë në anën e djathtë të rrugicës, pranë shkurres."

Nëse mirëpret kafshë shtëpiake ose fëmijë në hapësirën tënde, mund të jetë me vend të përmendësh gjithë kushtet e posaçme për t'i akomoduar, veçanërisht duke qenë se mund t'ua dërgosh manualin e shtëpisë vizitorëve përpara se të mbërrijnë, për t'u dhënë mundësinë të planifikojnë paraprakisht. Manualin mund ta përdorësh:

• Për të shpjeguar se ku ndodhen tasat për ushqimin dhe ujin e kafshëve shtëpiake
• Për të specifikuar se cilët peshqirë janë për putrat e pista
• Për të përmendur kushtet e përshtatshme për fëmijë, si një krevat fëmijësh apo karrige e lartë
• Për të listuar dhomat që kanë alarme tymi dhe monoksidi karboni

Pas një udhëtimi të gjatë, mund të jetë e vështirë të gjesh e të përdorësh disa artikuj bazë shtëpiakë. Ja disa shembuj nga pritësit Joh dhe Gian nga San Francisko:

• "Ngrohja: Termostatin e gjen në mur, afër televizorit. Mos harro ta fikësh kur të ikësh.
• Tualeti: Të lutem, mos hidh në tualet asgjë tjetër përveç letrës higjienike. Për gjithçka tjetër ka një kosh plehrash.
• Artikujt e kuzhinës: Enët dhe gotat mund t'i gjesh në dollapët e sipërm në të dyja anët e mikrovalës. Serviset janë në sirtarin në të majtë të furrës dhe tiganët janë në dollap. Përdori pa problem të gjitha për të përgatitur vaktet e tua të shijshme, sipas nevojës. Kur të mbarosh, enët e papastra mund t'i futësh në enëlarëse. Kur të mbushet plot, do ta ndezim pajisjen."

Pritësit që nuk jetojnë në pronë ose pranë saj rekomandojnë gjithashtu përfshirjen e udhëzimeve për plehrat, ujin dhe detajet e tjera unike për zonën:

• "Plehrat: Hidhi plehrat në koshin 125-litërsh të plehrave në bodrum. Të lutem mos i hidh plehrat jashtë ose në verandë, ku mund të afrohen zogjtë, rakunët dhe krijesa të tjera”. — Kim, Upson, Wisconsin
• "Uji dhe energjia: Të lutem, përdore ujin dhe energjinë në mënyrë të përgjegjshme. Uji i nxehtë është me sasi të kufizuar". — Fred, Placencia, Belize

Është shumë e rëndësishme që udhëzimet të jenë të detajuara, thonë pritësit Joh dhe Gian. Ja se si e shpjegojnë ata përdorimin e shërbimeve të transmetimit:

"Si të lidhesh me Netflix, Prime Video dhe shërbime të tjera transmetimi:

1. Ndize televizorin në dhomën e gjumit dhe prit një moment. Gjatë kësaj kohe, në ekran do të shfaqet vetëm efekti i dëborës.
2. Pas një minute, shtyp butonin shumëngjyrësh në formë diamanti.
3. Zgjidh aplikacionin me të cilin dëshiron të lidhesh dhe shtyp butonin kryesor. Për Netflix, të ftojmë të përdorësh llogarinë e vizitorit që kemi krijuar vetëm për ty."

Shumë pritës theksojnë rëndësinë e hartimit në mënyrë të përmbledhur të manualit të shtëpisë. "Sigurisht që nuk do doje që vizitorët të ndihen sikur u duhet të ecin mbi një fushë të minuar për t'i bërë qejfin pritësit", thotë pritësja Tina nga Nanaimo, Kanada. "Gjej ekuilibrin e duhur midis nevojave të tua dhe ndjesisë së mikpritjes që u krijon vizitorëve në banesën tënde.”

Pasi të kesh hartuar manualin e shtëpisë, mund të konsiderosh të vendosësh diku në ambient një tabelë të plastifikuar që pastrohet lehtë, me udhëzime të qarta se si të hysh në wifi. Është thjesht një mënyrë tjetër për t'ua lehtësuar informacionin vizitorëve. Si dhe për të frymëzuar recensione të shkëlqyera në çdo qëndrim.

Mëso se si të shtosh një manual të shtëpisë