Shërbimet më të mira që mund të ofrosh në këtë periudhë

Sipas të dhënave të reja të Airbnb,* shpesh vizitorët i filtrojnë rezultatet e kërkimit sipas 10 shërbimeve më të kërkuara. Nëse ofron ndonjë nga këto shërbime të kërkuara, sigurohu që t'i përfshish ato në listimin tënd, në mënyrë që vizitorët të të gjejnë kur të kërkojnë.

Një shtëpi e dytë larg shtëpisë
Rezultatet e kërkimit të vizitorëve nëpër botë tregojnë se 10 shërbimet më të kërkuara për momentin nga vizitorët janë:

1. Pishinë
2. Wifi
3. Kuzhinë
4. Parkim falas
5. Xhakuzi
6. Lavatriçe ose tharëse rrobash
7. Ajër i kondicionuar ose ngrohje
8. Hyrje me vetëshërbim
9. Hapësirë pune për laptop
10. Lejohen kafshët shtëpiake

Ja se çfarë mund të bësh për t'u siguruar që disa nga këto shërbime të jenë sa më të përshtatshme për vizitorët:

• Wifi: Kontrollo edhe një herë nëse funksionon dhe nëse vizitorët dinë se si të hyjnë. Konsidero të vendosësh diku në ambient një tabelë të plastifikuar që pastrohet lehtë, me udhëzime të dobishme.
• Ajër i kondicionuar: E dimë se ajri i kondicionuar qendror nuk është i zakonshëm në disa rajone. Nëse e ke, tregoju vizitorëve se ku t'i gjejnë telekomandat dhe si t'i përdorin ato. Edhe për këtë mund të shërbejë një tabelë e plastifikuar me udhëzime. Nëse nuk e ke, konsidero të ofrosh një njësi portative për muajt e nxehtë të verës.
• Kuzhina: Vizitorët mund të duan të gatuajnë vetë gjatë qëndrimit të tyre, ndaj sigurohu që të vendosësh enë, tenxhere, tiganë dhe ene gatimi. Do të ishte mirë t'i përmendje këta artikuj në përshkrimin e listimit.
• Parkim: Nëse ke një vend parkimi për vizitorët, mos harro të japësh udhëzime para se të mbërrijnë dhe mos harro ta zgjedhësh parkimin si shërbim në listimin tënd.

Hapësira të jashtme
Shumë vizitorë duan të qëndrojnë në ambiente përreth të cilave organizohen aktivitete. Nëse në zonën tënde ka shtigje të shkëlqyera për ecje dhe aktivitete të tjera në natyrë, bëjua të ditur vizitorëve në udhëzuesin ose në manualin e shtëpisë.

Një mënyrë tjetër për t'i ndihmuar ata të shijojnë pak ajër të pastër është duke sistemuar ambientet e jashtme të hapësirës sate. Mbaje peizazhin të rregulluar mirë dhe konsidero të shtosh (ose përditësosh) shërbimet e mëposhtme:

• Mobilie oborri
• Skarë për pjekje
• Filxhanë dhe pjata për ambiente të jashtme
• Lojëra dhe argëtime të tjera

Produkte pastrimi
Shumë vizitorë do ta vlerësonin mundësinë për t'i mbajtur gjërat të pastra. Do të ishte ide e mirë të siguroje mjaftueshëm:

• Peceta letre
• Doreza njëpërdorimëshe
• Pastrues për sipërfaqe të ndryshme
• Peceta ose spërkatës dezinfektues
• Solucion dezinfektues antibakterial për duar
• Sapun duarsh

Familjet me fëmijë
Prindërve me fëmijë të vegjël mund t'u krijosh më shumë komoditet në hapësirën tënde, duke siguruar disa nga gjërat që u nevojiten më shumë, si:

• Krevate fëmijësh
• Karrige të larta
• Kangjella për bebe
• Filxhanë, pjata dhe takëme për fëmijë
• Tavolinë për ndërrimin e bebeve
• Monitorues bebesh
• Kapakë prizash

Duhet të sigurohesh gjithashtu që të kesh artikuj të mjaftueshëm bazë, si:

• Sapun
• Shampo
• Letër higjienike
• Shtroja dhe peshqirë rezervë

Mëso më shumë rreth pritjes së vizitorëve nga familjet

Udhëtarë me kafshë shtëpiake
Shumë vizitorë duan të marrin me vete në udhëtime familjarët e tyre me katër këmbë. E dimë se nuk është e mundur që disa pritës të ofrojnë një hapësirë të përshtatshme për kafshët shtëpiake. Por nëse mundesh, është momenti i duhur për ta bërë.

Vizitorët që udhëtojnë me kafshë shtëpiake mund të duan të dinë se çfarë të presin në hapësirën tënde, si p.sh. nëse ke një oborr të rrethuar apo një verandë private. Mund të ofrosh gjithashtu shërbime të përshtatshme për kafshët shtëpiake si:

• Tasa për ushqimin dhe ujin e kafshëve shtëpiake
• Mbulesa për mobiliet
• Peshqirë të posaçëm për pastrimin e putrave te dera
• Produkte rezervë për pastrimin

Do të ishte gjithashtu mirë që të përditësoje rregullat e shtëpisë. Mund t'u bësh të ditur vizitorëve gjëra të tilla si numri i kafshëve shtëpiake që lejon për qëndrim, llojet e kafshëve shtëpiake që pranon dhe nëse është e pranueshme që ta lësh kafshën shtëpiake pa mbikëqyrje në hapësirën tënde.

Mëso më shumë rreth pranimit të kafshëve shtëpiake

Punonjësit në distancë
Shumë njerëz vazhdojnë ta bëjnë punën e tyre në distancë dhe mund të vendosin të punojnë gjatë udhëtimit. Mund t'i ndihmosh ata të jenë produktivë duke përfshirë shërbimet e mëposhtme:

• Wifi i shpejtë: Vizitorët kanë pritshmëri më të larta për internet të shpejtë tani që shumë prej tyre po punojnë në distancë. Mund të testosh shpejtësinë e wifi duke përdorur aplikacionin e Airbnb dhe, nëse rezultatet janë të ngadalta, konsidero ta përmirësosh duke ofruar shërbim më të shpejtë.
• Një hapësirë pune e përshtatshme për laptop: Gjej një tavolinë pune ose të zakonshme pranë një burimi energjie, me një karrige të rehatshme (edhe më mirë nëse është ergonomike). Dëshiron të bësh edhe më tepër? Shto një kapëse letrash, një bllok me letra ngjitëse dhe një kuti plot me stilolapsa të rinj. Nëse ke printer ose fotokopje, sigurohu që t'i nxjerrësh në pah në përshkrimin e listimit tënd.
• Makinë kafeje dhe ibrik çaji: Ka shumë mundësi që këta vizitorë të vlerësojnë një ndihmë të vogël gjatë ditëve të tyre të ngarkuara.
Mëso se si të shtosh shërbime të reja

Mos harro të shfaqësh ndryshimet që ke bërë duke përditësuar shërbimet, përshkrimin e listimit dhe fotografitë. Shtimi i vetëm disa artikujve të kërkuar mund t'i bëjë vizitorët të ndihen më rehat në hapësirën tënde dhe mund të sjellë një recension të shkëlqyer.

*Sipas të dhënave të brendshme të Airbnb, për shërbimet më të kërkuara në gjithë botën nga data 1 janar deri më 31 dhjetor 2021.

Informacioni në këtë artikull mund të ketë ndryshuar që nga publikimi.