Si ta zbatosh procesin e pastrimit me 5 hapa të Airbnb

Për shkak se pastërtia ka rëndësi më shumë se kurrë, pritësit e akomodimeve duhet të angazhohen me procesin e pastrimit të përparuar me 5 hapa të Airbnb dhe ne jemi këtu për të të ndihmuar ta zbatosh procesin. Ky artikull do të të shpjegojë 5 hapat, si dhe përmban udhëzime, sugjerime dhe praktika të tjera më të mira që të ndihmojnë të ndjekësh një standard të qëndrueshëm pastrimi. Këto janë praktikat më të mira dhe bazohen në manualin e pastrimit të përparuar, i cili është hartuar me ekspertë të shëndetësisë dhe të mikpritjes, duke pasur parasysh mirëqenien tënde.

Për të të ndihmuar të fillosh, po ndajmë praktikat më të mira rreth 5 hapave të procesit të pastrimit: përgatitu, pastro, higjienizo, kontrollo dhe bëj gati.

• Ajros dhomat para dhe gjatëpastrimit. Autoritetet rregullatore si Organizata Botërore e Shëndetësisë (OBSH) dhe Qendrat Amerikane për Kontrollin dhe Parandalimin e Sëmundjeve (CDC), rekomandojnë hapjen e dyerve të jashtme dhe të dritareve, si dhe përdorimin e ventilatorëve për të rritur qarkullimin e ajrit në ambient, para fillimit të pastrimit dhe higjienizimit. Ajrose hapësirën sa më gjatë të jetë e mundur para dhe gjatë pastrimit.

• Siguro produktet e duhura të pastrimit. Të rekomandojmë të përdorësh solucione dezinfektuese dhe higjienizuese që janë të regjistruara pranë agjencisë qeveritare përkatëse (p.sh.: Agjencia Evropiane e Kimikateve ose Agjencia Amerikane për Mbrojtjen e Mjedisit).

• Lexo udhëzimet e sigurisë për kimikatet e tua. Lexo gjithmonë etiketat e produkteve për të kuptuar përbërësit e tyre aktivë dhe si t'i përdorësh ato siç duhet.

• Laji duart për të paktën 20 sekonda me ujë dhe sapun. Nëse kjo nuk është e mundur, përdor një dezinfektues duarsh që përmban të paktën 60% alkool dhe referoju agjencisë qeveritare lokale për udhëzimet e fundit.

• Vish pajisje mbrojtëse. Para se të hysh në ambient, konsidero të veshësh pajisje mbrojtëse, si doreza njëpërdorimëshe dhe maska ose mbulesa fytyre prej lecke.

• Nxirri jashtë të gjitha plehrat. Duke e filluar procesin me këtë hap, shmang ndotjen e hapësirës tashmë të pastruar, nga plehrat. Vendos qese të pastra në gjithë koshat e plehrave, për të hedhur më kollaj pecetat e letrës dhe mbeturinat e tjera.

• Mblidhi të gjitha shtrojat e ndotura në të gjithë ambientin. Pritësit na kanë thënë se larja e rrobave është një nga aktivitetet që merr më shumë kohë gjatë përgatitjes së ambientit midis qëndrimeve. Mblidhi shtrojat e papastra sapo të hysh në ambient dhe mos i shkund, pasi mund të përhapen edhe më shumë mikrobet.

• Hiq prizën para pastrimit. Për sigurinë tënde dhe për të mbrojtur pajisjet fikse, mos harro t'i heqësh ato nga priza para pastrimit. Pajisjet që janë në prizë, edhe pse "të fikura”, vazhdojnë të jenë ende të lidhura me elektricitetin derisa të hiqen nga priza. Nëse dëshiron, mund ta shkëputësh energjinë edhe te kuadri elektrik.

Rikujtesë për sigurinë: Ki parasysh që të veshësh pajisje të pastra mbrojtëse para se të hysh në një hapësirë. Leximi i të gjitha etiketat e sigurisë mund të të ndihmojë gjithashtu të kuptosh se si përdoren kimikatet pastruese siç duhet.

Të pastrosh do të thotë të heqësh mikrobet dhe papastërtitë nga sipërfaqet, për shembull, të përdorësh një leckë me sapun për të pastruar tavolinën e kuzhinës ose syprinën e furrës. Është e rëndësishme ta përfundosh këtë hap para se të higjienizosh ambientin.

• Lajishtrojat në temperaturën më të lartë të rekomanduar nga prodhuesi. Mos harro të lash duart para se të prekësh shtrojat e pastra.

• Laji të gjitha enët dhe boshatis enëlarësen. Për të garantuar standardet e higjienës, është e rëndësishme që të lash enët. Nëse nuk ke enëlarëse, laji enët me ujë të nxehtë dhe sapun enësh antibakterial. Për të parandaluar transmetimin e infeksionit, fillo të kontrollosh gjithë ambientin dhe mblidh enët nga çdo dhomë.

• Fshi pluhurat e ambientit dhe fshi dyshemenë me fshesë ose fshesë korrenti. Kur fshin pluhurat, fillo nga lart-poshtë për t'u siguruar që nuk kanë mbetur shenja të dukshme papastërtie. Fshi me fshesë gjithë dyshemetë e forta dhe përdor fshesën e korrentit për tapetet.

• Pastro me ujë dhe sapun sipërfaqet e forta. Fërko me leckë çdo sipërfaqe për të hequr pisllëkun, yndyrën, pluhurin dhe mikrobet. Sipërfaqet e forta përfshijnë banakët e kuzhinës, tavolinat, lavamanët, dollapët dhe dyshemetë. Kur lan dyshemenë, fillo nga qoshja më e largët e dhomës duke vazhduar drejt derës dhe ujin e ndotur hidhe në një lavaman që nuk është pastruar ende.

• Pastro sipërfaqet e buta sipas udhëzimeve të prodhuesit. Sipërfaqet e buta përfshijnë tapetet, shtrojat e krevatit dhe tapicerinë. Hiq me kujdes çdo papastërti ose grimcë të dukshme e më pas pastroji me produktet e posaçme. Nëse është e mundur, laji teshat në lavatriçe sipas udhëzimeve të prodhuesit.

Rikujtesë për sigurinë: Për të parandaluar përhapjen e mikrobeve, mos e prek fytyrën gjatë pastrimit.

Të higjienizosh do të thotë të përdorësh substanca kimike që reduktojnë sasinë e mikrobeve dhe baktereve. Gjatë këtij hapi, kërkojmë që pritësit t'i higjienizojnë të gjitha zonat që preken vazhdimisht. Për shembull, pritësit mund të higjienizojnë dorezat e derës, çelësat e dritës dhe dollapët duke i spërkatur këto sipërfaqe me dezinfektues kimik.

• Pasi ta keni pastruar një sipërfaqe e fortë, spërkateni atë me dezinfektues. Përqendrohu në higjienizimin e gjithë sipërfaqeve që preken më shpesh (siç janë dorezat e derës dhe çelësat e dritës). Higjienizo aparaturat elektronike sipas udhëzimeve të prodhuesit.

• Lëre dezinfektuesin të qëndrojë i lagur për kohëzgjatjen e caktuar. Në etiketën e produktit specifikohet koha që u duhet kimikateve të veprojnë për higjienizimin e sipërfaqeve në mënyrë efektive. Një gjë e tillë u jep kohën e duhur kimikateve të asgjësojnë sa më shumë mikrobe.

• Lëri sipërfaqet të thahen në ajër. Nëse sipërfaqja thahet para kohës së nevojshme të kontaktit, nuk ka garanci që produkti t'i asgjësojë patogjenët, siç specifikohet në etiketë.

Rikujtesë për sigurinë: Duke iu referuar gjithë etiketave të sigurisë, mund të sigurohesh se po i përdor siç duhet kimikatet pastruese.

Do të kesh qasje në listat e personalizuara të kontrolleve për pastrimin, sipas detajeve të listimit tënd. Sigurohu që t'u referohesh praktikave më të mira në çdo listë kontrollesh të secilës dhomë dhe t'i ndash me ekipin e pritjes së vizitorëve ose me profesionistët e pastrimit.

• Kontrollo dy herë nëse janë higjienizuar të gjitha sipërfaqet që preken shpesh. Rregullo çdo gjë që mund të të ketë shpëtuar.

• Shëno çdo problem me mirëmbajtjen ose artikull që mungon. Gjatë kontrollit pas përfundimit, shëno çdo artikull që duhet zëvendësuar, rimbushur ose furnizuar.

Për të shmangur infektimin nga njëri vizitor te tjetri, është e rëndësishme të përfundohet pastrimi dhe higjienizimi i një dhome para se të jetë gati për vizitorin e ardhshëm.

• Hidh dhe laj produktet e pastrimit. Hidh produktet njëpërdorimëshe, siç janë pecetat dezinfektuese. Pastro gjithashtu çdo mjet tjetër që ke përdorur. Laj çdo leckë pastrimi në temperaturën më të lartë të mundshme, që është e përshtatshme për materialin përkatës.

• Pasi të kesh mbaruar me pastrimin, hiq me kujdes çdo pajim mbrojtës. Hidh ose laj çdo pajim mbrojtëse në përputhje me udhëzimet e përdorimit të tyre.

• Laji duart për të paktën 20 sekonda me ujë dhe sapun. Nëse kjo nuk është e mundur, përdor një dezinfektues duarsh që përmban të paktën 60% alkool dhe referoju agjencisë qeveritare lokale për udhëzimet e fundit.

• Bëj një kontroll përfundimtar në çdo dhomë për t'u siguruar që gjithçka është gati për vizitorin e ardhshëm. Imagjino sikur të ishe një vizitor që hyn në ambient për herë të parë.

• Vër në dispozicion të vizitorëve produkte pastrimi. Vizitorët janë shprehur se duan të kenë mundësinë të pastrojnë vetë ndërsa qëndrojnë në ambientin tënd. Jepua atyre këtë mundësi duke u vënë në dispozicion mjete pastrimi që mund të përdorin, si solucion dezinfektues për duart, peceta letre njëpërdorimëshe, spërkatës dezinfektues ose peceta të lagura dhe sapun duarsh rezervë.

• Furnizo me produkte pastrimi. Kontrollo gjithmonë datat e skadimit dhe rimbush çdo produkt që ke përdorur, në mënyrë që të jetë gjithçka gati për qëndrimin tjetër.

Rikujtesë për sigurinë: Produktet kimike mbaji gjithmonë larg fëmijëve.

Tani që e njeh procesin e pastrimit me 5 hapa, është momenti të modifikosh rutinën aktuale dhe t'i zbatosh këto teknika në çdo dhomë të ambientit tënd. E dimë që është e vështirë të zbatosh një rutinë të re pastrimi, prandaj kemi përgatitur një manual pastrimi gjithëpërfshirës me udhëzime të mbështetura nga ekspertë, sugjerime sigurie dhe lista kontrollesh për të të ndihmuar të zbatosh procesin e pastrimit të përparuar me 5 hapa të Airbnb. Po kërkojmë që pritësit e qëndrimeve të ndjekin procesin e pastrimit të përparuar me 5 hapa të Airbnb pas çdo qëndrimi.

Ki parasysh se kriteret e pastrimit mund të përditësohen me kalimin e kohës në përputhje me ndryshimet e udhëzimeve të ekspertëve. Bazuar në zhvillimet shkencore, procesi i pastrimit të përparuar me 5 hapa të Airbnb dhe manuali i detajuar i pastrimit synojnë t'i japin përparësi shëndetit dhe mirëqenies së pritësve dhe vizitorëve.

NË VIJIM: Udhëzime pastrimi për pritësit e dhomave private