Bazat për komunikimin me vizitorët

Komunikimi efektiv me vizitorët është hapi i parë drejt një përvoje pozitive për ta. Si pritës, i ndihmon vizitorët të ndihen rehat dhe mund t'i inkurajosh të shkruajnë recensione të mira, duke komunikuar qartë dhe shpejt, që nga momenti që ata shprehin interes për ambientin tënd, deri në momentin pasi të jenë larguar.

Ji transparent. Daniel, një pritës në San Francisko, thotë se është gjithmonë transparent për ambientin e tij. "Ajo që u thua vizitorëve se ofron dhe ajo që gjejnë kur mbërrijnë në listimin tënd duhet të përputhen" - thotë ai. "Është më mirë të mos e mbivlerësosh listimin tënd, në mënyrë që vizitorët të gjejnë një ambient edhe më të këndshëm se ç'e prisnin, se sa e kundërta."

Bëhu kurioz. Mund t'ia hapësh derën gjithëpërfshirjes thjesht duke i pyetur vizitorët: Çfarë të duhet për t'u ndier rehat dhe i mirëpritur në ambientin tim? Është shumë e rëndësishme që të jesh empatik dhe të mos bësh supozime.

Trego disponueshmëri. Anette, një superpritëseje në San Francisko, i pëlqen t'u thotë vizitorëve: “Mos u përpiq të bësh vetë asnjë riparim, sado i vogël qoftë. Na kontakto menjëherë dhe do të kujdesemi ne për këtë.” Për çështje rutine, pritësit me përvojë përdorin përgjigjet e shpejta për të qëndruar në kontakt me vizitorët.

Trego përkushtim. Gjestet e vogla të mirësjelljes e shndërrojnë një qëndrim në një përvojë edhe më të mirë për ty dhe vizitorët. Nëse lind ndonjë problem, vizitorët shpesh thonë se gjëja më e rëndësishme për ta është mënyra se si pritësit u përgjigjen.

Kërkesë për prenotim: Vizitorët e vlerësojnë një përgjigje të shpejtë kur kontaktojnë për të prenotuar ambientin tënd. Përpiqu t'u përgjigjesh të gjitha kërkesave të vizitorëve brenda 24 orësh.

Gatishmëria për t'u përgjigjur nuk është e rëndësishme vetëm për të kënaqur vizitorët, por është edhe një nga kriteret për t'u bërë superpritës. Përdorimi i mesazheve të programuara mund të të ndihmojë të planifikosh paraprakisht ndarjen e informacioneve me vizitorët e tu.

Në momentin e prenotimit: Vizitorët e vlerësojnë kur pritësit u dërgojnë një mesazh, si "faleminderit që prenotove".

Mund ta personalizosh mesazhin e mirëseardhjes me informacione nga profili i vizitorit tënd. Mund të shtosh pyetje rreth interesave të tyre, qytetit të lindjes dhe hobit që kanë. Kjo është gjithashtu një mundësi për t'u bërë më shumë pyetje, si qëllimi i vizitës së tyre dhe me kë do të vijnë.

Para mbërritjes: Udhëzimet e qarta dhe detajet e regjistrimit janë thelbësore për t'i ndihmuar vizitorët të kenë një mbërritje pa stres.

Përgjigju pyetjeve të zakonshme duke plotësuar të gjitha fushat në seksionin Informacion për vizitorët në skedën "Listimet", duke përfshirë udhëzimet se si të mbërrijnë në ambientin tënd, udhëzimet e regjistrimit dhe wifi. Kjo do të ndahet në skedat "Udhëtimet" të vizitorëve, 48 orë para orarit të programuar të regjistrimit.

Regjistrimi: Vizitorët, veçanërisht ata nga komunitetet historikisht të margjinalizuara, kanë thënë se hyrja me vetëshërbim mund t'i bëjë të ndihen më rehat. Mund të krijosh gjithashtu një manual shtëpie që përfshin informacione rreth mënyrës së përdorimit të sistemeve dhe pajisjeve të ndryshme në ambientin tënd.

Pas qëndrimit të natës së parë: Shumë pritës thonë se u pëlqen të qëndrojnë në kontakt me vizitorët gjatë udhëtimit të tyre. Është e dobishme të jesh proaktiv dhe të pyesësh se si po shkon çdo gjë.

Para çregjistrimit: Specifiko se çfarë duhet të bëjnë vizitorët para çregjistrimit. Të dërgojmë një rikujtesë me orarin e çregjistrimit dhe udhëzimet një ditë përpara largimit të programuar të tyre.

Pas largimit: Gjëja më e mirë është t'iu lësh një recension vizitorëve menjëherë. Bëj një vlerësim respektues dhe përdor të njëjtat standarde për çdo vizitor. Disa pritësve u pëlqen gjithashtu të dërgojnë një shënim për të falënderuar vizitorët për qëndrimin e tyre.