Pse është kaq e rëndësishme t'u përgjigjesh shpejt vizitorëve
Pritësit më të suksesshëm u përgjigjen mesazheve të vizitorëve sapo i marrin ato. Në fakt, nëse ke një nivel të mirë gatishmërie, listimi yt shfaqet më lart në rezultatet e kërkimit të vizitorëve.
Një përgjigje e shpejtë është veçanërisht e rëndësishme para prenotimit, kur vizitorët mund të kenë nevojë për më shumë informacion për të bërë një rezervim, dhe rreth kohës së regjistrimit dhe çregjistrimit, kur vizitorët mund të kenë nevojë për një përgjigje të shpejtë për pyetjet që kanë. U kërkuam pritësve që ruajnë një nivel gatishmërie të shpejtë të ndajnë disa sugjerime.
Si të jesh më aktiv në përgjigje
"Kontrollo mirë nëse i ke gjithnjë të aktivizuara lajmërimet nga aplikacioni i Airbnb, me SMS dhe ato që vijnë si njoftime me email, në mënyrë që kur të të vijë një mesazh i ri, të jetë i dukshëm në celularin tënd", thotë Omar, një superpritës në Qytetin e Meksikos.
Nga atje, provo mjetet e Airbnb për të automatizuar përgjigjet e tua. Kath, një pritëse në Albany, Australi, pëlqen të përdorë përgjigjet e shpejta. "Të kursejnë shumë kohë dhe nuk kam nevojë të shkruaj të njëjtën gjë vazhdimisht", thotë ajo.
Mesazhet e programuara janë gjithashtu të dobishme, veçanërisht për regjistrimin dhe çregjistrimin. Keshav, një anëtar i Bordit këshillimor të pritësve në Nju Delhi, Indi, dërgon një mesazh të programuar 24 orë para çdo regjistrimi që përfshin udhëzimet për të hyrë në ambient dhe informacione të tjera për mbërritjen.
"Nëse nuk e takoj vizitorin në momentin e regjistrimit, i dërgoj një mesazh ku i pyes ‘A i ke të gjitha informacionet? Po t'i nis sërish, nëse po mundohesh të gjesh vendndodhjen’", thotë Keshav
Si llogaritet niveli i gatishmërisë
Niveli i gatishmërisë është përqindja e mesazheve të reja të vizitorëve që u je përgjigjur brenda 24 orësh gjatë 30 ditëve të fundit.
Këtu përfshihen përgjigjet ndaj kërkesave të reja të vizitorëve për informacion dhe pranimi, miratimi paraprak ose refuzimi i kërkesave të rezervimit.
Nëse përgjigjesh pas 24 orëve, niveli i përgjithshëm i gatishmërisë do të bjerë, ndërsa koha mesatare e përgjigjes do të rritet.
Një pjesë kyçe e pritjes së vizitorëve është të qëndrosh i lidhur me llogarinë tënde të Airbnb dhe t'u përgjigjesh mesazheve shpejt. Kjo e përmirëson nivelin e gatishmërisë dhe e bën listimin të shfaqet më lart në rezultatet e kërkimit.