Thjeshtimi i procesit të regjistrimit

Të sigurohesh se vizitorët mund ta gjejnë dhe mund të hyjnë lehtësisht në ambientin tënd është thelbësore për çdo qëndrim të suksesshëm. Kur krijon një plan regjistrimi, çelësi është të sigurohesh që të jetë i thjeshtë dhe i besueshëm. Testoje për të konfirmuar se do të funksionojë për çdo vizitor, çdo herë.

Mbi të gjitha, komunikimi me vizitorët është çelësi për një regjistrim pa probleme. "Para se vizitorët të mbërrijnë, u shkruaj për t'i falënderuar", thotë Ann, një pritëse në Penobscot, Maine. Me mesazhin e saj, ajo dërgon udhëzimet për regjistrimin dhe udhëzimet rrugore.

"Vizitorëve u dërgojmë një listë kontrollesh për regjistrimin", thotë Juliette, një anëtare e Bordit këshillimor të pritësve në Nairobi, Kenia. "Kështu, mund t'i menaxhojmë pritshmëritë e tyre".

Provo këto sugjerime gjatë krijimit të një procesi të lehtë regjistrimi:

• Shto udhëzime regjistrimi në aplikacionin e Airbnb. Do të të kërkohet të dërgosh fotografi të procesit dhe shënime të shkurtra udhëzuese.

• Vendos adresën dhe vendndodhjen e saktë të shënjuesit. Nëse ambienti yt është jashtë rruge ose nuk ka shërbim celular në afërsi, jep udhëzime të sakta për të shmangur konfuzionin.
• Dërgo udhëzime për regjistrimin tre ditë përpara. Konfirmo me vizitorët se i kanë marrë ato dhe interesohu nëse kanë ndonjë pyetje.
• Qëndro në dispozicion në momentin e regjistrimit. Nëse diçka shkon keq, është mirë të qëndrosh në dispozicion për t'u kontaktuar për zgjidhjen e problemeve.
• Qëndro në kontakt me vizitorët. Mjeti më i mirë, në rast të ndonjë problemi të papritur gjatë udhëtimit, është komunikimi i qartë mes teje dhe vizitorëve të tu.
  

Pasi të shtosh udhëzimet për regjistrimin, vizitorët mund t'i gjejnë ato në skedën "Udhëtime", tre ditë para mbërritjes së tyre. Udhëzimet do të përfshihen edhe në udhëzuesin e mbërritjes së vizitorëve, 48 orë para regjistrimit, së bashku me udhëzimet rrugore për në ambientin tënd dhe të dhënat e wifi.

Mund t'i mirëpresësh vizitorët personalisht ose virtualisht. Pritësit e suksesshëm shpesh ofrojnë hyrje me vetëshërbim, duke përdorur pajisje si tastiera numerike, brava inteligjente ose kuti çelësash me kod dhe kanë një plan rezervë në rast se diçka nuk shkon mirë.

Nëse ofron hyrje me vetëshërbim, "jepu atyre një kontakt shtesë për çdo rast", sugjeron Juliette. "U dhashë atyre kontaktin e personit që kujdeset për pastrimin". Në këtë mënyrë, nëse kanë pyetje dhe ti nuk mund të përgjigjesh, vizitorët do të mund të hyjnë gjithsesi në ambientin tënd.

Pasi vizitorët të regjistrohen, ata duhet të ndihen të mirëpritur. "Do të doje që vizitorët të kishin një përvojë më të ngrohtë sesa ajo që do të kishin po të qëndronin në një hotel tradicional", thotë Chris, një pritës në Cleveland. "Unë qëndroj gjithmonë në dispozicion për t'iu përgjigjur të gjitha pyetjeve sa më shpejt të jetë e mundur."

Provo këto sugjerime për t'i kënaqur vizitorët gjatë regjistrimit:

• Sigurohu që ambienti të mos ketë njolla. Sigurohu që të gjitha sipërfaqet, dyshemetë dhe pëlhurat të jenë të pastra dhe pa pluhur. Kontrollo nëse kanë mbetur flokë pas pastrimit apo shenja papastërtie dhe pluhuri. Edhe nëse ambienti yt është fantastik, duhet të jetë i pastër për të marrë recensione me pesë yje.
• Ofro diçka më shumë si shenjë vlerësimi për vizitorët e tu. Mund të jetë një shënim i thjeshtë mirëseardhjeje ose një kuti me biskota.
• Vendos në një vend të dukshëm në ambient rrjetin wifi dhe fjalëkalimin. Mund ta shtosh edhe këtë drejtpërdrejt në listimin tënd, te Informacioni për vizitorët.
• Lër një manual shtëpie për vizitorët në ambient, me informacione të tilla si udhëzime për parkimin, detaje për shërbimet e tua dhe sugjerime për pajisjet në përdorim.
• Krijo një udhëzues që përfshin restorantet, ekskursionet lokale dhe aktivitetet me kushte lehtësuese për të paraqitur vendet e tua të preferuara.
• Kontakto me vizitorët pasi të mbërrijnë për t'u siguruar që kanë çdo gjë që u nevojitet. Mund ta bësh lehtësisht me anë të mesazheve të programuara.

Informacioni në këtë artikull mund të ketë ndryshuar që nga publikimi.