Sekrete nga një superpritës me përvojë

Niki ishte një nga pritëset e para në Airbnb që fitoi statusin e superpritësit kur filloi programi për herë të parë në vitin 2014. Ajo e mbajti këtë status për më shumë se 16 tremujorë të njëpasnjëshëm.

Si e bën këtë Niki? Ajo mësoi të presë vizitorë nga zeroja, duke filluar me një vilë të vogël fshati në oborrin e saj të pasmë në San Francisko. Ai listim pati aq sukses sa ajo u frymëzua të japë me qira gjithë shtëpinë e saj me tre dhoma gjumi gjatë pushimeve familjare.

Këtu, Niki tregon sekretet e suksesit të saj si superpritëse.

"Gjashtë vjet më parë, qëndrova për herë të parë me Airbnb në Provence, Francë dhe më pëlqeu. Ishte një studio e vogël në qytetin e vjetër Aix. I përmbushte më së miri nevojat tona, por pritësit nuk ishin përpjekur shumë për ta bërë tërheqëse apo diçka të tillë. Kuptova se po të investoja ca para, mund të bëja diçka shumë të veçantë me shtëpinë e vogël të miqve 200 metra katrorë në oborrin tim. Mendoja se do të prenotohej rrallë, por u habita kur mora menjëherë një prenotim për një javë të plotë."

"Sa herë që nxjerr një listim të ri online, filloj me një çmim fillestar që është vetëm 50 – 70% e çmimit të tregut, derisa të marr të paktën tre recensione (ose derisa të marr aq kërkesa prenotimi sa të mund ta ngre çmimin në nivelet e tregut). Këtë e bëj që të mund të kujdesem për detajet pa sakrifikuar recensione të mira dhe sepse është e rëndësishme të marrësh një sërë recensionesh sa më shpejt të jetë e mundur, në mënyrë që listimi të shfaqet më lart në renditjen e kërkimit."

"Gjithçka fillon me një hapësirë të mirë. Duhet të jetë e pastër. Më pëlqen t'i kem hapësirat të hapura dhe të ajrosura. Duhet të jenë shumë të rregullta, por me pika kyçe që ofrojnë pamje çlodhëse. Duhet të jenë gjithashtu të rehatshme, sidomos krevatet. Kam investuar në dyshekët memory, të cilët njerëzit i duan. Në fund të fundit është një ushtrim ndjeshmërie. Lëviz nëpër ambient dhe mendo se si do ta përdorin atë vizitorët, për të përshtatur kështu konceptin tënd të arredimit."

"Fotografitë e mira bëjnë gjithë ndryshimin. Fotografitë profesionale janë domosdoshmëri. Mendoj nëse hapësira është e përshtatshme për familje apo ideale për një lloj të caktuar udhëtari, dhe këtë element e vendos në titull. Shkruaj një përshkrim shumë të mirë, të detajuar dhe tërheqës, në mënyrë që të tërheqësh dikë në listim. Përshkruaj krevatet, çarçafët, përmend markat e llojeve të sapunëve apo shërbimeve që ofron."

"Sigurohu që të përshkruash në listim edhe gjërat disi të pazakonta të pronës tënde. Shpjegoji ato në një mënyrë të sinqertë dhe të qartë, por pa i cilësuar si defekte. Ideja është që të ofrosh transparencë të mjaftueshme për t'i ndihmuar vizitorët të zgjedhin pronën që duan."

"Për mua, komunikimi është rregulli nr. 1 i pritjes së mirë të vizitorëve. Komunikimi i drejtpërdrejtë me një vizitor fillon me kërkesën e parë për informacion. Gjithmonë u bëj vizitorëve të mundshëm disa pyetje pas çdo kërkese për prenotim, jo për të qenë e pasjellshme ose e bezdisur, por vetëm për t'u siguruar që listimi është i përshtatshëm për ta. Është pikërisht ai moment që shënon fillimin e procesit që mund të të sigurojë një recension me 5 yje."

"Surpriza më e madhe për mua ishte kur kuptova se sa të mrekullueshëm ishin vizitorët. Njerëzit kanë qenë kaq të sinqertë, të sjellshëm dhe mirëkuptues. Edhe në aspektin ekonomik, u habita nga të ardhurat. Nuk e mendoja që do të më ecte kaq mirë, e jo më që do ta ktheja në karrierë. Jam fokusuar në aspektet që më pëlqejnë në pritjen e vizitorëve dhe i kam shfrytëzuar mundësitë kur më janë paraqitur dhe ja që gjithçka shkoi shumë mirë."