Përsosja e sezonit të pikut

Sezoni i pikut po afron. Ja disa mënyra se si mund të përdorësh mjetet e pritjes së klientëve në Airbnb për të shfrytëzuar sa më mirë kohën kur kërkesa e klientëve është më e lartë.

Përgatitu për sezonin e ngarkuar të zonës sate duke liruar net të tjera në kalendar. Kjo e ndihmon listimin tënd të shfaqet në më shumë rezultate kërkimi dhe mund të rrisë të ardhurat.

Kur të hapësh netët në kalendar, merr parasysh kohëzgjatjen minimale të udhëtimit. Duhet të qëndrosh brenda minimumit tënd ose të ulësh minimumin e kohëzgjatjes standarde të udhëtimit. Mund të krijosh gjithashtu një kohëzgjatje të personalizuar të udhëtimit për netët specifike që hap.

"Është veçanërisht e rëndësishme të sigurohesh që kalendari të jetë i lirë gjatë sezonit të ngarkuar", thotë Myranda, superpritëse në Little Rock, Arkansas. "Në vend që të bëj disa ditë pushim midis klientëve, sigurohem që të jem më fleksibël gjatë këtij sezoni, në mënyrë që të mund të pres edhe më shumë klientë".

Shko te kalendari i listimit dhe kërko për netët e bllokuara, të cilat shfaqen me ngjyrë gri. Hap çdo natë të bllokuar që mund të presësh klientë.

Zgjatja e periudhës së disponueshmërisë përtej minimumit të tre muajve u lejon klientëve të prenotojnë më tej. Mund ta lirosh kalendarin deri në 2 vjet paraprakisht. Listimi yt do të shfaqet në më shumë rezultate kërkimi dhe në një listë më të shkurtër rezultatesh nëse ka më pak vende të disponueshme në atë kohë.

Kalendari yt hapet ditë pas dite, pavarësisht nga periudha e disponueshmërisë. Për shembull, nëse periudha është 12 muaj, klientët mund ta prenotojnë ambientin tënd deri në një vit përpara datës së sotme.

"Përfito kur kërkesa është e lartë", thotë Jimmy, një superpritës në Palm Springs, Kaliforni. "Ndoshta pritësit e tjerë nuk janë gati dhe kalendarët e tyre nuk janë të lirë. Pra, duke qenë proaktiv, do të përfitosh nga ato periudha të kërkesës së lartë".

Për të qëndruar konkurrues gjatë sezonit të pikut, kontrollo çmimet e listimeve të ngjashme në zonën tënde për të njëjtat data dhe konsidero të rregullosh çmimin për natë. Nëse ofron të njëjtin çmim çdo natë, konsidero të ndryshosh çmimet gjatë ditëve të javës dhe fundjavës për t'iu përshtatur ndryshimeve të kërkesës. Vendosja e çmimeve në mënyrë dinamike mund të ndihmojnë në maksimizimin e prenotimeve.

Për të krahasuar listime të ngjashme, shko te kalendari i listimit dhe zgjidh një interval datash deri në 31 ditë.

Çmimet mesatare të listimeve të ngjashme në afërsi do të shfaqen në një hartë të zonës sate. Butonat në hartë të lejojnë të shfaqësh listime të prenotuara ose të paprenotuara. Faktorët që përcaktojnë se cilat listime janë të ngjashme, përfshijnë vendndodhjen, përmasat, veçoritë, shërbimet, vlerësimet, recensionet dhe listimet e tjera që shfletojnë klientët kur vizitojnë faqen e listimit tënd.

Listimet me çmime më të ulëta se listimet e ngjashme në afërsi kanë tendencën të renditen më lart në rezultatet e kërkimit.

"Nëse është një kohë e lirë dhe nuk kemi marrë ende prenotime, kontrolloj sërish pronat në zonën time", thotë Felicity, një superpritëse në Sidnei, Australi. "Duhet të kem çmime konkurruese".

Shtimi i zbritjeve është një mënyrë tjetër për të spikatur te klientët gjatë sezonit të ngarkuar. Mund të kujdesesh për udhëtarë me nevoja të ndryshme duke ofruar:

• Zbritjet javore dhe mujore. Ofro zbritje javore për qëndrime për shtatë net ose më shumë ose zbritje mujore për qëndrime për 28 net ose më shumë. Kjo mund të ndihmojë në përmirësimin e renditjes në rezultatet e kërkimit, në plotësimin e boshllëqeve në kalendarin tënd dhe në reduktimin e sistemimeve ndërmjet qëndrimeve.
• Zbritje për prenotimet e hershme. Duke shtuar një zbritje për prenotimet e hershme të bëra 1 deri në 24 muaj para regjistrimit, mund të tërheqësh klientë që planifikojnë përpara në kohë.

Klientëve iu shfaqet një thirrje e veçantë në rezultatet e kërkimit dhe në faqen e listimit për zbritjet javore ose mujore prej 10% ose më shumë dhe për zbritjet për prenotimet e hershme prej 3% ose më shumë. Çmimi i zbritur shfaqet së bashku me atë fillestar, i cili është i vijëzuar.

Ki parasysh se zbritja për prenotimet e hershme nuk është e disponueshme kur është i aktivizuar funksioni "Çmimet inteligjente" dhe se zbritjet për kohëzgjatjen e qëndrimit duhet të ndjekin rregullat dhe rregulloret lokale.

"Zbritjen për prenotimet e hershme e përdor kur konfiguroj kalendarin tim për vitin", thotë Anne, një superpritëse në Tarragona, Spanjë. "Kjo ka tendencën ta mbushë shpejt kalendarin tim dhe njerëzit që marrin zbritjen zakonisht nuk anulojnë."

Kërko mënyra për të thjeshtuar mbërritjen dhe largimin e klientëve të tu. Përfshi udhëzimet e regjistrimit për t'i ndihmuar ata të kuptojnë si ta gjejnë ambientin tënd dhe të hapin derën e përparme kur të mbërrijnë.

• Shto detaje të rëndësishme. Mund të vendosësh dhe të përshtatësh mënyrën, orën dhe udhëzimet e regjistrimit në udhëzuesin e mbërritjes. Sigurimi i hyrjes me vetëshërbim me një bravë inteligjente, tastierë numerike ose kuti çelësash i lejon klientët të zhbllokojnë hyrjen me një kod, edhe nëse mbërrijnë natën vonë.
• Trego mënyrën për të hyrë brenda. Përfshi fotografi ose një video për t'i ndihmuar klientët të kuptojnë procesin. Kërkoji një miku të testojë udhëzimet e tua për t'u siguruar që të jenë të qarta.

Mendo për çregjistrimin si përshtypja e fundit e klientëve për ambientin tënd. Duke e mbajtur atë të thjeshtë mund t'ua kujtojë atyre se sa qëndrim të shkëlqyer kanë pasur.

• Jep udhëzime të qarta çregjistrimi. Zgjidh nga një listë detyrash në udhëzuesin e mbërritjes. Shpjego cilat janë gjërat kryesore që klientët duhet të bëjnë para se të largohen, si fikja e pajisjeve dhe mbyllja e banesës me çelës. Çdokush mund t'i lexojë këto para se të prenotojë.
• Thjeshtoje sa më shumë që të jetë e mundur. Konsidero nëse është e nevojshme që klientët të bëjnë detyra të caktuara, si mbledhja e peshqirëve të përdorur dhe hedhja e plehrave.

"Është me rëndësi që klientët të kenë vetëm një ose dy udhëzime të thjeshta sepse po përpiqen të lirojnë pronën tënde", thotë Karen, një superpritëse në Nelson, Kanada. "E bën përvojën shumë më të lehtë".

Çmimet dhe cilësimet e tjera i kontrollon gjithmonë ti. Rezultatet e tua mund të ndryshojnë. 

Pritësit u paguan për pjesëmarrjen e tyre në intervista.

Sugjerimet për pritjen e klientëve janë subjekt i ligjit vendor.

Informacioni në këtë artikull mund të ketë ndryshuar që nga publikimi.