Si të mirëpresësh vizitorët e tu të parë në Airbnb

Mund të ndihesh pak nervoz ndërsa je në pritje të mbërritjes së vizitorëve të tu të parë. Por ne do të të ndihmojmë në çdo hap. Dëshiron të krijosh një përvojë fantastike për vizitorët e parë dhe jo vetëm? Lexo këtë udhëzues me pesë hapa.

Mirëpritja e vizitorëve fillon që përpara se të hyjnë në derë. Duke iu përgjigjur shpejt mesazheve të vizitorëve, u bën atyre të ditur se interesohesh për nevojat e tyre.

Këto biseda paraprake janë gjithashtu një mundësi për të përcaktuar pritshmëritë. Disa sugjerime të dobishme:

• Sinqeriteti mbi gjithçka. Vizitorët mund të kenë humbur detaje të rëndësishme në përshkrimin e listimit tënd. Do të ishte mirë t'ia kujtoje nëse ti, familja jote, vizitorë të tjerë apo kafshë shtëpiake do të ndani ndonjë hapësirë me ta.
• Bëhu kurioz. Mund t'i hapësh dyert gjithëpërfshirjes thjesht duke i pyetur vizitorët: Çfarë ju duhet për t'u ndierë rehat dhe të mirëpritur në ambientin tim?
• Përgjigju në mënyrë sa më të thjeshtë. Mund të përdorësh mesazhet e Airbnb ose aplikacionin për t'iu përgjigjur vizitorëve, qoftë nga shtëpia apo në lëvizje.
• Mendo paraprakisht. Nëse ke ndërmend t'u dërgosh informacione të ngjashme shumë vizitorëve të ndryshëm, kurse kohë duke përdorur mjetet tona të mesazheve.

Mund t'iu përgjigjesh pyetjeve të zakonshme dhe të ofrosh një mbërritje të qetë për vizitorët duke plotësuar të gjitha fushat në seksionin Informacioni për vizitorët në skedën "Listimet", duke përfshirë udhëzimet për të arritur në hapësirën tënde, udhëzimet e regjistrimit dhe informacionin e wifi. Kjo do të ndahet në skedat "Udhëtimet" të vizitorëve, 48 orë para regjistrimit.

Vizitorët, veçanërisht ata nga komunitetet historikisht të margjinalizuara, kanë thënë se hyrja me vetëshërbim mund t'i bëjë të ndihen më rehat. Por nëse je në afërsi, mund t'i pyesësh vizitorët nëse preferojnë t'i regjistrosh personalisht.

Lexo udhëzuesin për pritjen gjithëpërfshirëse të vizitorëve

Kur vizitorët prenotojnë në Airbnb, ata presin të gjejnë një hapësirë të pastër. Nëse vizitorët gjejnë shenja pluhuri në dhomën e gjumit ose thërrime në kuzhinë, kjo mund të jetë gjithçka që do të mbajnë mend nga ambienti yt.

Qimet e rëna janë një zhgënjim i madh, prandaj kushtoji vëmendje të veçantë vendeve ku ato mblidhen shpesh, si çarçafët, peshqirët, dyshemetë dhe banjat. Edhe shumë sende personale do ta bëjnë hapësirën tënde të duket rrëmujë, ndaj përpiqu t'i mbash disa prej tyre në dollap ose në një ambient të ngjashëm të veçuar

Çdo vizitor është i ndryshëm, por shumica presin të kenë në dispozicion menjëherë disa artikuj dhe informacione të caktuara. Mund të marrësh parasysh:

• Të furnizosh ambientin me artikujt bazë, si peshqirë, shtroja, sapun dhe letër higjienike
• Të përditësosh manualin e shtëpisë për t'u ofruar vizitorëve informacion të rëndësishëm rreth hapësirave që nuk duhet t'i përdorin, udhëzime për wifi etj.
• Të krijosh një udhëzues me restorantet, dyqanet ushqimore, kafenetë e tua të preferuara dhe të tjera
• Të tregosh disponueshmërinë tënde me mesazhe, me telefon ose me email në rast se diçka shkon keq
• Të vësh në dispozicion numrat e telefonit të personave me rëndësi, të tillë si hidrauliku, ustai, agjenti i asistencës së internetit dhe kabllorit ose të fqinjëve

Pas largimit të vizitorëve, ata do të kenë mundësinë të lënë një recension për hapësirën tënde. Recensionet e para janë vendimtare për suksesin tënd në Airbnb. Vlerësimi mesatar me yje do të shfaqet në listim pasi të kesh marrë tre recensione dhe mund të ndikojë në mënyrën se si renditesh në rezultatet e kërkimit.