Sugjerime të dobishme për mirëpritjen e vizitorëve ndërkombëtarë

Përshëndetje të gjithëve,

Jam Shinya, një superpritës nga Osaka në Japoni dhe anëtar i Bordit këshillimor të pritësve. Me rastin e përvojave olimpike dhe paralimpike online në Airbnb, ku njerëz nga e gjithë bota mblidhen për organizimet e Tokios 2020, doja të promovoja komunitetin e larmishëm të Airbnb.

Lexo për të zbuluar se çfarë kam mësuar rreth pritjes së vizitorëve dhe këshillat e mia për mënyrën se si pritësit mund të mirëpresin njerëz nga kultura të ndryshme.

Airbnb e kam përdorur për herë të parë në vitin 2015 gjatë një udhëtimi biznesi në Shangai, Kinë. Një kompani e madhe organizonte një event të rëndësishëm dhe hotelet e zonës ishin prenotuar, kështu arrita të gjej akomodime në Airbnb.

Sapo mbërrita, pata një bisedë të këndshme me pritësin i cili më foli për ambientin. Ishte shumë ndryshe nga një hotel, por më pëlqeu. Kjo përvojë më mësoi se lidhja që krijohet mes pritësit dhe vizitorëve e bën qëndrimin unik dhe më mbresëlënës.

Doja të bëhesha pritës për të mësuar më shumë rreth botës dhe t'u ofroja vizitorëve momente dhe lidhje të veçanta, siç kanë bërë edhe me mua pritësit më parë.

Më pëlqen Osaka dhe kam pesë vjet që pres vizitorë. Hapësira ime promovon stilin japonez dhe filozofinë Zen.

Punoj me orar të plotë për biznesin e familjes sime, por pritja e vizitorëve është me të vërtetë puna e jetës sime dhe më duket më shumë si një hobi sesa punë e mirëfilltë.

Ja disa këshilla nga përvojat e udhëtimeve të mia nëpër botë dhe pritja e qindra vizitorëve:

Përkthimi i përshkrimit të listimit në gjuhë të tjera
Duke e përkthyer listimin e Airbnb në gjuhën e një vizitori, mund ta ndihmojë atë të ndihet më i mirëpritur. Unë e fillova me 6 gjuhë dhe gradualisht kam shtuar edhe të tjera.

Nëse dëshiron të zbulosh gjuhët e zakonshme që flasin vizitorët në zonën tënde, mund të interesohesh pranë Klubit të pritësve ose organizatës lokale të turizmit. Më pas mund të përdorësh një mjet përkthimi online falas për përshkrimin e listimit.

Komunikimi para udhëtimit
Unë besoj se komunikimi para udhëtimit është thelbësor dhe një mundësi shumë e mirë për përmirësimin e përvojës midis pritësit dhe vizitorëve dhe shmangien e keqkuptimeve. Në këtë mënyrë kuptoj edhe arsyen pse po vijnë vizitorët, çfarë duan të bëjnë dhe si mund t'i ndihmoj.

Organizimi i një regjistrimi pa probleme
Ka udhëtarë që stresohen nga ideja e të vizituarit të një shteti të ri. Për t'i ndihmuar vizitorët të ndihen më rehat, u jap informacione praktike për biletat e trenave, oraret dhe çmimet.

Përpiqem gjithashtu t'i përshëndes vizitorët personalisht apo edhe t'i takoj në stacionin e afërt të trenit. Nëse nuk jam i disponueshëm, i kërkoj dikujt nga familja ime të më ndihmojë. Vetë vizitorët më kanë thënë se u ka bërë shumë përshtypje fakti që i mirëprisja personalisht.

Ofrimi i një mikpritjeje të ngrohtë
Mendoj se një nga aspektet thelbësore të mikpritjes është t'u tregosh vizitorëve se mund të kenë vërtet besim tek ti si pritës. Kjo nuk ka të bëjë vetëm me ofrimin e një ambienti të sigurt brenda banesës, por edhe me një qetësi mendore jashtë saj.

Pasi flas me vizitorët për udhëtimin e tyre, u jap shpesh rekomandime specifike për aktivitete sipas dëshirës së tyre dhe udhëzime për itinerarin që duhet të ndjekin. Përpiqem gjithashtu t'u jap informacione të dobishme për qytetet e tjera, jo vetëm për Osakën, e madje edhe udhëzime për akomodimin e tyre të ardhshëm.

Prezantoji me kulturën tënde
Vizitorëve të mi u jap mundësinë ta njohin thellësisht kulturën japoneze. Dua që të kenë një qëndrim të jashtëzakonshëm që u jep një perspektivë tjetër dhe krijon një lidhje të thellë me Japoninë dhe njerëzit këtu. Kështu, i ndihmoj ata të kuptojnë komunitetin lokal, dallimet kulturore dhe etiketën e mirësjelljes, në mënyrë që të mund të ndërveprojnë me banorët dhe bizneset lokale.

Mëso më shumë për punën që ka bërë Bordi këshillimor i pritësve dhe ndiq përditësimet mujore dhe sugjerimet nga anëtarët e bordit.

Informacioni në këtë artikull mund të ketë ndryshuar që nga publikimi.