Një udhëzues për pritësit për mënyrat e mbështetjes së turizmit të ndërgjegjshëm për mjedisin

Pjesë e të qenit pritës i ndërgjegjshëm për mjedisin është të ftosh gjithashtu klientët e tu që të përfshihen. Për shkak se ndërgjegjësimi për mjedisin mund të jetë diçka e re për ta, është e dobishme të shpjegosh mënyrat se si ata mund të sjellin një ndryshim.

Për të të mbështetur në edukimin e klientëve të tu rreth udhëtimit në mënyrë të ndërgjegjshme për mjedisin, kemi përpiluar sugjerime nga komuniteti ynë global i pritësve dhe kemi punuar me Programin e Kombeve të Bashkuara për Mjedisin, një autoritet mbrojtës për mjedisin global dhe Fondin Botëror të Kafshëve të Egra, organizatën kryesore botërore të ruajtjes së tyre.

Lexo për të mësuar se si mund të promovosh udhëtime në mënyrë të ndërgjegjshme për mjedisin.

Udhëtimet e shkurtra me makinë janë shkak për tre të katërtat* e emetimeve ndotëse të transportit, kështu që inkurajimi i klientëve për të përdorur transportin publik mund të ketë ndikim të madh.

Duke qenë se endja nëpër vende të reja mund të jetë e ngatërruar për udhëtarët, ndihmoji klientët duke shtuar informacion për autobusin, metronë ose trenin në udhëzuesin tënd, duke përfshirë tarifat e përllogaritura dhe rrugët më të mira për në atraksionet lokale dhe në aeroport. Gjithashtu mund të ofrosh biçikleta për klientët ose të rekomandosh një biznes ku jepen me qira.

Materialet plastike krijojnë shumë mbeturina dhe shpesh nuk riciklohen. Për shkak se produktet plastike janë shumë të dëmshme për planetin, është e rëndësishme të shmangësh blerjen e tyre sa herë të mundesh.

Që klientët të shmangin blerjen e artikujve plastikë gjatë qëndrimit të tyre, superpritësja Tiffany në Hollywood Beach, Kaliforni, u vë në dispozicion klientëve artikuj shumëpërdorimësh të tilla si gota dhe shishe uji. Në Chiang Mai, Tajlandë, superpritësi Nutth gjithashtu u tregon klientëve se ku të rimbushin shishet e ujit ndërkohë që janë duke eksploruar.

Pjatat shumëpërdorimëshe, serviset e argjendit dhe kutitë për ruajtjen e ushqimeve u mundësojnë klientëve të kënaqen me ushqimet në ambiente të jashtme, ndërsa minimizojnë mbetjet.

Përdor manualin e shtëpisë ose udhëzuesin për t'u treguar klientëve restorantin, tregun e fermerëve ose dyqanin tënd të preferuar që ofron prodhime lokale dhe ekologjike. Nëse ka prodhime sezonale në zonën tënde, përmende edhe këtë. “Në udhëzuesin tonë kemi shumë sugjerime restorantesh përrallore që ndajnë pasionin tonë për ndërgjegjshmërinë ndaj mjedisit," thotë superpritësja Ana në Pembrokeshire, Uells.

Madje mund të theksosh produktet lokale që klientët mund të dëshirojnë të provojnë ose të marrin në shtëpi si suvenir. Në Tasmani, Australi, superpritësja Merrydith lë mjaltë dhe sapun livandoje artizanal për klientët që ta përdorin ose ta marrin me vete në shtëpi.

Në rregullat e shtëpisë ose në manualin e shtëpisë, mund t'u kërkosh klientëve të minimizojnë mbeturinat, të bëjnë dushe më të shkurtra, të pijnë ujë të filtruar rubineti dhe ta përdorin kondicionerin me kujdes. Mund të vendosësh gjithashtu shënime rreth hapësirës tënde për t'u kujtuar klientëve të fikin dritat para se të largohen dhe të mbyllin ujin kur lajnë dhëmbët.

Superpritësi Omar në qytetin e Meksikos krijon video që klientët i ndjekin me skanimin e një kodi QR dhe që shpjegojnë procesin e riciklimit në apartamentet e tij dhe efektet e dëmshme të plastikës njëpërdorimëshe.

Këto praktika jo vetëm që mund të të kursejnë para, por mund të tërheqin edhe klientë që përpiqen të udhëtojnë në mënyrë të ndërgjegjshme për mjedisin.

Komunitetet anembanë botës preken nga probleme mjedisore si zjarret, përmbytjet dhe moti ekstrem. Duke përmendur problemet e zonës sate në manualin e shtëpisë, mund t'i edukosh klientët se si të jenë udhëtarë të përgjegjshëm dhe t'i informosh ata për rreziqet që mund të mos i kenë në vendet e tyre, si ndotja e ajrit ose thatësira.

Për shembull, në zonat me cilësi të dobët të ajrit, është më mirë të shmangësh aktivitete në natyrë në ditë me ndotje të lartë ose të mos përfshihesh në aktivitete që shtojnë ndotjen si lëvizja me makinë, barbekjutë ose hedhja e fishekzjarreve.

Duke theksuar hapat që po ndërmerr në përshkrimin e listimit dhe manualin e shtëpisë, mund t'u bësh të ditur klientëve se të intereson mjedisi.

Nëse u ofron klientëve gjëra të tilla si sapun dore të degradueshëm biologjikisht ose shishe uji shumëpërdorimshe, mos harro ta theksosh edhe në listimin tënd.

Përfshirja e këtyre ideve në rutinën tënde të pritjes së klientëve mund të ndikojë pozitivisht në planet dhe t'u mundësojë klientëve të ndihen si vendasit. E dimë se zbatimi i praktikave të ndërgjegjshme për mjedisin kërkon kohë, ndaj po përgatisim më shumë materiale burimore për të të ndihmuar përgjatë rrugës.

MË PAS:Mëso se si një superpritës po bëhet më i ndërgjegjshëm për mjedisin

*Nga 60 Nismat për Planetin të Fondit Botëror të Kafshëve të Egra, botuar më 5 mars 2021

Informacioni në këtë artikull mund të ketë ndryshuar që nga publikimi.