Një udhëzues fillestarësh për pritjen e vizitorëve në mënyrë të ndërgjegjshme

Të jesh një pritës i përgjegjshëm për mjedisin nuk është mirë vetëm për planetin, por edhe për biznesin tënd të pritjes së klientëve. Në vitin 2019, numri i qëndrimeve në banesa ekologjike u rrit me 141 për qind* në krahasim me vitin e mëparshëm.

Për të të ndihmuar të bëhesh një pritës më i ndërgjegjshëm për mjedisin, kemi punuar ngushtë me Programin e Kombeve të Bashkuara për Mjedisin, autoritetin kryesor global për mjedisin në Kombet e Bashkuara dhe Fondin Botëror të Faunës dhe Florës, organizatën kryesore botërore të ruajtjes së tyre, për të marrë informacione nga ekspertët. Kemi mbledhur gjithashtu këshilla nga pritës anembanë botës që kanë ndërmarrë hapa të thjeshtë por me ndikim, për të bërë ndryshimin.

Lexo për të mësuar se si mund të krijosh një qëndrim për klientët që është më pak i dëmshëm për mjedisin.

Duke e bërë ambientin tënd më efikas në energji, mund të zvogëlosh sasinë e burimeve që përdor, të ulësh shpenzimet dhe të zvogëlosh gjurmën e karbonit. Ja disa ide për të kursyer energji:

• Kujtoju klientëve të heqin nga priza pajisjet kur nuk janë në përdorim: Deri në 50%** e energjisë së përdorur nga telefonat celularë vjen nga karikuesit që janë në prizë kur nuk janë në përdorim.
• Rregullo ngrohësin e ujit: Ndërsa temperatura standarde për një ngrohës uji është 140 gradë Fahrenheit (60 gradë Celsius), ulja e saj në 120-130 gradë Fahrenheit (48-54 gradë Celsius) mund të ndihmojë në kursimin e energjisë.
• Kontrollo llambat: Përdorimi i fuqisë më të ulët të mundshme mund të prodhojë më pak nxehtësi dhe të ulë konsumin e energjisë me kalimin e kohës. Llambat me efikasitet energjetik, si CFL dhe LED, përdorin gjithashtu më pak energji dhe zgjasin më shumë** sesa alternativat inkandeshente.
• Mbro ambientin tënd nga kushtet e motit: Instalo shirita izolues në dyer dhe izolo dritaret për të kursyer në kostot e ngrohjes dhe ftohjes.
• Bli termostate inteligjente me kontrollues të automatizuar: Termostatet me Wifi mund të të lejojnë të rregullosh temperaturën në bazë të mbërritjes dhe largimit të klientëve.
• Vlerëso pajisjet e tua: Kur të vijë koha për të blerë pajisje të reja, zgjidh ato me vlerësime të larta të efikasitetit energjetik.

Produktet e ripërdorshme të pastrimit dhe produktet me rimbushje janë një mundësi e shkëlqyer për shumicën e njerëzve për të zvogëluar ndikimin e tyre në mjedis. Konsidero këto sugjerime për të qenë më ekologjik:

• Zëvendëso produktet njëpërdorimëshe të pastrimit: Superpritësja Anna nga Pembrokeshire, Uells, ka sfungjerë që lahen dhe ripërdoren dhe lecka pastrimi me mikrofibra në kuzhinë në vend të pecetave njëpërdorimëshe.
• Përdor produkte letre të ricikluara: Për çdo produkt letre që ofron, si peceta fytyre ose letër higjienike, zgjidh letër 100% të ricikluar për të respektuar më shumë mjedisin.
• Redukto kimikatet e forta: Bli sapun enësh, detergjent rrobash dhe produkte higjienike që nuk janë toksike ose janë me toksicitet të ulët, natyrale ose të biodegradueshme. Në Bordeaux, Francë, superpritësi Pascale blen produkte organike për dush dhe trup nga dyqanet lokale.
• Kalo në tekstile organike: Kur të vijë koha për të zëvendësuar çarçafët dhe peshqirët, zgjedhja e pëlhurave organike mund të të ndihmojë të shmangësh pesticidet, insekticidet dhe toksinat e tjera që janë të dëmshme për njerëzit dhe ekosistemet.

Meqenëse uji i freskët dhe i pastër është burim i kufizuar, ka shumë rëndësi që ti dhe klientët e tu të jeni të vetëdijshëm për sasinë që përdorni, veçanërisht pasi kriza klimatike shkakton edhe më shumë thatësira. Ja disa mënyra të dobishme për të kursyer ujë:

• Lër rikujtesa për klientët: Duke shkurtuar një minutë nga koha që kalon në dush, mund të kursesh mbi një litër** ujë çdo minutë. Antonella, superpritëse në Milano, Itali, vendos shënime pranë rubinetëve për t'i inkurajuar klientët të mbyllin ujin kur lajnë dhëmbët. Gjithashtu, mund t'iu sugjerosh klientëve të bëjnë dushe më të shkurtra.
• Kontrollo për rrjedhje: Inspektimi rutinë i zonave rreth tualeteve, lavamanëve, vaskave dhe pajisjeve që përdorin ujë mund të të ndihmojë të zbulosh rrjedhjet. Një matës inteligjent i ujit mund të gjurmojë sasinë e ujit që po përdor dhe të të njoftojë nëse ka aktivitet të pazakontë, për shembull, nëse harron të mbyllësh rubinetin e kuzhinës ose ka një rrjedhje në enëlarëse.
• Përdor cilësime dhe pajisje efikase: Lavatriçet dhe enëlarëset përdorin shumë ujë. Nëse i ke në ambientin tënd, inkurajoji klientët të përdorin cilësimet e larjes së shpejtë ose ato ekologjike. Dhe kur të vijë koha për të zëvendësuar pajisjen, zgjidh një me efikasitet energjetik që përdor më pak ujë.
• Instalo pajisje me rrjedhje të ulët: Mund të bësh një ndryshim edhe duke instaluar rubinetë dhe tualete me rrjedhje të ulët ose tualete me dy shkarkime. Në Tasmani, Australi, superpritësja Merrydith ka një kokë dushi të veçantë që zvogëlon rrjedhën e ujit ndërsa ende ndihet presion i lartë.

*Bazuar në të dhënat e brendshme të Airbnb për rritjen nga viti në vit të mbërritjeve të klientëve në listime që përfshijnë fjalë kyçe specifike (ekologjike etj.) në titujt dhe përshkrimet e listimeve nga gushti 2018 deri në gusht 2019

**Nga 60 Nismat për Planetin të Fondit Botëror të Faunës dhe Florës, botuar më 5 mars 2021

Informacioni në këtë artikull mund të ketë ndryshuar që nga publikimi.