Mënyra të reja që vizitorët të zbulojnë listimin tënd

Udhëtimet më të paharrueshme shpesh fillojnë nga dëshira e thjeshtë për t'u larguar. Për të gjetur se ku dhe kur të shkojnë, udhëtarët shpesh kërkojnë ide në internet ndërsa përpiqen të krijojnë një plan të përkryer. Prandaj po prezantojmë një mënyrë krejtësisht të re që vizitorët të eksplorojnë Airbnb dhe të zbulojnë listime të shkëlqyera si të tuat.

Versioni i verës 2022 i Airbnb përbën ndryshimin më të madh të një dekadë në Airbnb. Dizajni tërësisht i ri shfaq listimet e 56 Kategorive të në Airbnb, duke e bërë më të lehtë për vizitorët të gjejnë dhe të prenotojnë ambiente që nuk e dinin se ekzistonin dhe një veçori novatore e quajtur "Qëndrime të ndara" që u mundëson vizitorëve të ndajnë qëndrime më të gjata midis dy banesave.

Si pritës, mund të përfitosh nga këto veçori fantastike duke u siguruar që listimi yt të ketë detaje të plota dhe aktuale, disponueshmëri të përditësuar dhe fotografi me cilësi të lartë.

Dizajni i ri i Airbnb e ndihmon listimin tënd, qoftë një dhomë e përbashkët, një dhomë private apo një ambient i plotë, të zbulohet nga një numër më i madh vizitorësh më herët, gjatë planifikimit të udhëtimit.

Vizitorët mund ta gjejnë listimin tënd me:

• Kategoritë e Airbnb. Sa herë që vizitorët hapin aplikacionin, u shfaqen qëndrime të mrekullueshme të disponueshme në të ardhmen e afërt, të cilat mund t'i prenotojnë menjëherë.
• Qëndrime të ndara. Rezultatet e kërkimit për qëndrime prej shtatë netësh e lart tani përfshijnë mundësinë që vizitorët ta ndajnë udhëtimin e tyre midis dy ambientesh.
• Fleksibilitet më i madh. Vizitorët mund të kërkojnë qëndrime duke përdorur data dhe vendndodhje pa afat, duke përdorur veçoritë që kemi publikuar vitin e kaluar,ose mund të ngushtojnë rezultatet e tyre për të përmbushur nevojat specifike.

Kur vizitorët hapin Airbnb, në krye u shfaqen kategoritë që grupojnë listimet në koleksione të organizuara në bazë të stilit unik, vendndodhjes ose aktiviteteve në afërsi. Kategoritë paraqesin qëndrime me veçori të tilla si pamje të mrekullueshme ose kuzhinë shefi, afërsi me një liqen ose park kombëtar, ose mundësi për golf ose sërf.

Kur vizitorët kërkojnë qëndrime në një destinacion të caktuar, ata marrin rezultate të ngjashme me ato më parë në një kategori të quajtur "Të gjitha banesat". Gjithashtu, tani ata do të gjejnë kategori të tjera në bazë të vendndodhjes, duke e bërë më të thjeshtë zbulimin e shtëpive të mahnitshme brenda ose jashtë zonës së kërkimit.

Njoftimet mund të shfaqen edhe në disa kategori. Nëse shtëpia jote pranë liqenit përfshin një kuzhinë shefi, listimi mund të shfaqet në kategorinë Pranë liqenit dhe në kategorinë Me kuzhinë shefi, krahas shfaqjes në rezultatet e kërkimit në vendndodhjen tënde.

Një nga kategoritë më të veçanta është kategoria "Me stil", një koleksion me mbi 20 000 banesa, të zgjedhura për arkitekturën e tyre ikonike dhe estetikën frymëzuese të arredimit. Kategoria "Me stil" përfshin banesat nga arkitektë të famshëm, si Fran Lloyd Wright dhe Zaha Hadid, banesat që janë botuar në publikime kushtuar dizajnit dhe hapësirat e ofruara nga pritësit që kanë bërë një punë të jashtëzakonshme në zbatimin praktik të parimeve të tyre të dizajnit.

Këtu janë vetëm disa nga kategoritë e Airbnb: Pamje të mrekullueshme, Plazhe, Kamping, Me kuzhinë shefi, Në fshat, Hapësira krijuese, Golf, Banesa historike, Qytete ikonike, Parqe kombëtare, Ski, Sërf, Tropikale dhe Vreshta.

Këto kategori janë vetëm fillimi i kësaj mënyre të re kërkimi, e cila u mundëson vizitorëve të zbulojnë më shumë ambiente se kurrë më parë. Me kalimin e kohës do të prezantojmë edhe më shumë kategori që tregojnë karakteristikat unike dhe vendndodhjet e veçanta të pronave të tua. Ne besojmë se kategoritë janë e ardhmja e kërkimit dhe ka një kategori për çdo banesë dhe çdo pritës në Airbnb.

Banesat në çdo kategori i nënshtrohen një procesi kurimi. Miliona listime aktive në Airbnb vlerësohen duke përdorur mësimin automatik për të analizuar titujt, përshkrimet, diçiturat e fotografive dhe recensionet e vizitorëve. Prandaj është e rëndësishme të sigurohesh që informacioni i listimit tënd është i përditësuar dhe i plotë.

Vizitorët mund të shfletojnë dhe të prenotojnë, të gjitha listimet me aq fleksibilitet sa lejojnë rrethanat e tyre. Veçoria "Qëndrime të ndara" u jep më shumë pritësve të bëhen pjesë e udhëtimeve të vizitorëve.

Kur vizitorët kërkojnë një udhëtim prej një jave ose më shumë, qëndrimet e ndara shfaqen automatikisht në rezultatet e kërkimit. Ndërsa lëvizin poshtë në kategorinë "Të gjitha banesat", vizitorët mund të gjejnë mundësinë për të ndarë udhëtimin e tyre midis dy banesave në të njëjtin destinacion.

Në të kaluarën, nëse vizitorët kërkonin një udhëtim njëmujor, por ke pasur disponueshmëri vetëm për dy javë gjatë asaj kohe, banesa jote nuk do të shfaqej në rezultatet e kërkimit. Me qëndrimet e ndara, listimi yt mund të bashkohet me një tjetër për të mbuluar gjithë udhëtimin e vizitorit.

Çdo qëndrim i ndarë lidh dy prona që përputhen me vendndodhjen, llojin e pronës dhe shërbimet që rezultojnë nga kërkimi. Për shembull, nëse një familje po kërkon një banesë të plotë me kushte lehtësuese si hyrje pa shkallë ose dyer më të gjera se 81 cm, funksioni "Qëndrime të ndara" do të lidhë dy listime me këto karakteristika.

Kur vizitorët prenotojnë një qëndrim të ndarë, pritësit marrin kërkesa të veçanta për prenotim. Çmimi yt dhe rregullat e shtëpisë zbatohen për numrin e netëve të prenotuara, ashtu si për çdo rezervim tjetër.

Veçoritë e reja të Airbnb ua shfaqin banesën tënde më shumë njerëzve në më shumë vende se kurrë më parë. Ja disa mënyra se si mund të bësh që listimi yt të spikatë:

1. Vër në dukje atë që e bën banesën tënde unike me fotografi me cilësi të lartë. Fotografitë përshkruese, qoftë të bëra nga një profesionist apo me smartfonin tënd, mund ta bëjnë listimin tërheqës për vizitorët.
2. Lexo listën e shërbimeve dhe karakteristikave dhe kontrollo për çdo gjë të re. Shto ose përditëso gjithçka që ofron ambienti yt, duke pasur parasysh shërbimet më të kërkuara që duan vizitorët, në mënyrë që të përfundojë në kategoritë përkatëse.
3. Bëj testin e shpejtësisë së wifi. Qasja e besueshme në internet mund t'u japë vizitorëve sigurinë se do të mund të punojnë dhe komunikojnë në internet sipas nevojës gjatë qëndrimit të tyre.
4. Konsidero nëse listimi yt është i përshtatshëm për të gjithë udhëtarët. Shto fotografi dhe detaje të kushteve lehtësuese, të tilla si hyrjet pa shkallë dhe dyert e gjera, që e bëjnë atë mikpritës për vizitorët me nevoja të ndryshme.

Përditësimi i listimit tënd me të gjitha detajet, të mëdha dhe të vogla, mund të ndihmojë që listimi yt të arrijë një gamë më të gjerë vizitorësh. Ambienti yt mund të jetë pikërisht ajo që ata kërkojnë.

*Sipas të dhënave të testit të brendshëm të Airbnb më 14/4/2022.

Informacioni në këtë artikull mund të ketë ndryshuar që nga publikimi.