Si të shkrepësh fotografi të shkëlqyera për një listim

Fotografitë e shkëlqyera të listimit tërheqin vëmendjen, ofrojnë pritshmëri të qarta dhe u japin vizitorëve besim për të prenotuar. Provo këto këshilla për të bërë fotografi me cilësi të lartë të ambientit tënd.

Fotografitë e detajuara i ndihmojnë vizitorët të vendosin nëse listimi yt i plotëson nevojat e tyre. Rregullo ambientin dhe planifiko seancën para se të fillosh të fotografosh.

• Pastro dhe hiq. Tregoju vizitorëve saktësisht se çfarë mund të presin. "Është e habitshme se sa njerëz harrojnë t'i pastrojnë hapësirat e tyre nga objektet e rastësishme para se të bëjnë fotografi," thotë Jeff, një fotograf dhe superpritës në Joshua Tree, Kaliforni.
• Zgjidh veçoritë që do theksosh. Çfarë do t'u pëlqejë vizitorëve nga ambienti yt? Çfarë duhet të dinë për të shmangur surprizat? Përdor fotografitë për të shfaqur detajet unike, shërbimet më të kërkuara dhe kushtet lehtësuese.
• Bëj një listë. Planifiko të fotografosh çdo dhomë dhe zonë që vizitorët mund të përdorin nga këndvështrime të ndryshme. Për shembull, fotografitë në oborrin e pasmë mund të përqendrohen në të gjithë oborrin, pishinën, oborrin me shezlongë dielli dhe shulat në portë.
• Gjej ndriçimin më të mirë. Drita e butë dhe natyrale u jep fotografive një ton të ngrohtë dhe mikpritës. Planifiko të bësh fotografi të brendshme kur dhomat e tua të kenë më shumë dritë natyrale gjatë ditës. Bëj fotografi në natyrë gjatë "orëve të arta", 60 minuta pas lindjes dhe para perëndimit të diellit.
• Konsidero të punësosh një profesionist. Fotografimi profesional është i disponueshëm përmes Airbnb në qytete të caktuara në mbarë botën.

Shumica e kamerave, duke përfshirë dhe atë në smartfonin tënd, mund të kapin fotografi tërheqëse të listimit. Ja si të sigurohesh që fotografitë e tua të duken sa më mirë në Airbnb.

• Fike blicin. Hap grilat e dritareve dhe perdet. Nëse ke shfrytëzuar të gjithë dritën natyrale dhe fotografitë e tua janë ende shumë të errëta, ndiz dritat.
• Fotografo horizontalisht. Fotot horizontale funksionojnë më mirë se vertikalet, sepse imazhet janë prerë në formë katrore në rezultatet e kërkimit dhe faqja jote e listimit shfaq fotografi në modalitetin peizazh.
• Pozicionoje subjektin në qendër të kornizës. Aktivizo rrjetat për të ndihmuar në rreshtimin e gjërave.
• Shkrepe drejt përballë. Bëj fotografi nga një pozicion neutral, pa e anuar lenten lart ose poshtë, për t'u dhënë vizitorëve një pamje reale të ambientit tënd.
• Zgjidh fotografitë. Zgjidh një varietet të imazheve me kënd të gjerë, nga një distancë e mesme dhe nga afër për të ndarë pamjen e madhe dhe detajet e vogla.
• Modifiko fotografitë. Rregullo ndriçimin, kontrastin dhe veçoritë e secilës fotografi, duke përdorur mjete si butoni i redaktimit automatik në telefonin tënd. Prit manualisht, drejto ose rrotullo imazhet (në mënyrë që të mos jenë kokëposhtë) sipas nevojës.
• Ngarko fotografi me rezolucion të lartë. Përdor fotografi që janë të paktën 1200 pikselë me 800 pikselë. Madhësitë më të mëdha të skedarëve janë më të mira - deri në rreth 10 megabajt.

Pasi të kesh ngarkuar fotografitë e tua, përdor mjetet në skedën "Listimet" për të shfaqur hapësirën tënde.

• Krijo një prezantim fotografik. Prezantimi fotografik i rendit automatikisht imazhet e tua sipas dhomës për t'i ndihmuar vizitorët të kuptojnë planimetrinë e banesës sate. Mund të lëvizësh, të heqësh dhe të shtosh fotografi.
• Shto detaje për çdo dhomë. Mund të shkruash se dhoma e gjumit ka një krevat dopio "mbretëror" ose që dhoma e ndenjjes ka një televizor 55 polësh. Mund të përfshish edhe informacione rreth kushteve lehtësuese të dhomës.
• Shkruaj diçiturat e fotografive. Shpjego se çfarë nuk tregon fotografia që mund të jetë e rëndësishme për vizitorët. Për shembull, "Tavolinë ngrënie e palosshme me deri 10 vende kur hapet plotësisht."
• Sqaro pozicionin e secilës dhomë në planimetrinë e katit. Jep kontekstin si, "Dhoma e gjumit 1 është në katin e dytë dhe ka një banjë brenda ambientit."
• Thekso veçoritë dhe shërbimet. Tërhiq vëmendjen ndaj artikujve më të preferuar. Për shembull, "Kuzhina e përbashkët ka një aparat ekspresi, një ibrik elektrik dhe rafte në frigorifer vetëm për vizitorët." Kur të mbarosh modifikimin, shtyp butonin Shfaq për të shfaqur paraprakisht listimin.

 Kur të mbarosh me modifikimin, shtyp butonin Shfaq për të shfaqur paraprakisht listimin.

Informacioni në këtë artikull mund të ketë ndryshuar që nga publikimi.