Ki parasysh zonën dhe rrethanat e tua kur vendos çmimin

Si pritës, je gjithmonë ti që e vendos strategjinë e çmimeve. Ti zgjedh çmimin që vendos, si e vendos atë dhe si e rregullon me kalimin e kohës.

Një faktor i rëndësishëm për t'u marrë në konsideratë është kërkesa lokale. Nëse ambienti yt ka çmime më të larta sesa listimet e ngjashme në afërsi, ka gjasa që të humbasësh prenotime. Nëse ambienti yt ka çmime konkurruese, ka më shumë gjasa të tërheqësh vizitorë, gjë që mund të çojë në një rritje të fitimeve të tua në Airbnb.

Të dish se cilat listime të ngjashme në zonën tënde po prenotohen mund të të shërbejë si udhëzues për strategjinë e çmimeve.

Për të krahasuar çmimet, zgjidh çdo datë të lirë në kalendar, ose mund të zgjedhësh një interval datash deri në gjashtë net. Shtyp ose kliko mbi çmimin tënd për natë dhe më pas shtyp ose kliko butonin poshtë tij që tregon një ikonë harte dhe fjalët "krahaso çmimin".

Do të marrësh një hartë të çmimeve mesatare për listime të ngjashme që vizitorët kanë prenotuar në afërsi. Mund të kontrollosh edhe çmimet e listimeve të ngjashme që janë ende të disponueshme.

Çmimet e paraqitura në hartë pasqyrojnë çmimin mesatar të çdo listimi të prenotuar ose të paprenotuar për datat e zgjedhura. Faktorët që përcaktojnë se cilat listime janë të ngjashme përfshijnë vendndodhjen, madhësinë, veçoritë, shërbimet, vlerësimet, recensionet dhe listimet e tjera që shfletojnë vizitorët kur vizitojnë faqen e listimit tënd.

"Duke ditur se çfarë po ndodh në zonën time do të më japë shumë më tepër besim në çmimin tim", thotë Felicity, një anëtare e Bordit këshillimor të pritësve dhe superpritëse në New South Wales, Australi. "Do ta di nëse kam çmimin më të mirë, në mënyrë që ta mbaj në atë nivel, ose nëse jam duke u treguar pak sqimatare dhe me duhet ta ul çmimin".

Gjithashtu, mund t'i përgjigjesh kërkesës lokale duke ndjekur:

• Eventet speciale. Konferencat, festivalet dhe evente të tjera të mëdha bëjnë që kërkesa të jetë tepër e lartë. Bashkoju grupeve në mediat sociale, ndiq zyrën lokale të turizmit ose regjistrohu në faqet e shitjeve të biletave të eventeve për të të ndihmuar të planifikosh paraprakisht.
• Ndryshimet sezonale. Në vendet që tërheqin turma në periudha të caktuara të vitit, pritja e vizitorëve gjatë sezonit të pikut të zonës sate mund të të ndihmojë të fitosh më shumë, ndërsa ulja e çmimit gjatë sezonit të ulët mund të tërheqë më shumë vizitorë.

Çmimet konkurruese të ambientit tënd mund të ndihmojnë edhe me renditjen e listimit më lart në rezultatet e kërkimeve në Airbnb. Rezultatet marrin parasysh vlerën dhe cilësinë e një listimi krahasuar me listime të ngjashme në afërsi.

Kostot e tua të pritjes së vizitorëve mund të të ndihmojnë të mendosh edhe për çmimin tënd. Daniel, një superpritës i Airbnb dhe anëtar i Bordit këshillimor të pritësve në Tenerife në Ishujt Kanarie, thotë se ai gjurmon atë që ai e quan faktorin "e brendshëm" të shpenzimeve të tij për pritjen e vizitorëve së bashku me faktorin "e jashtëm" të kërkesës.

Daniel thotë se i balancon shpenzimet e tij me atë që janë të gatshëm të paguajnë vizitorët, në mënyrë që të vendosë pritshmëri të arsyeshme për sa mund të tarifojë dhe të fitojë.

Shembuj të shpenzimeve të pritjes së vizitorëve mund të përfshijnë hipotekën ose qiranë, mirëmbajtjen, taksat dhe tarifat e pastrimit. Disa kosto mund të mos jenë të qarta për vizitorët dhe mund të të ndihmojnë për të shpjeguar çmimin e caktuar. Mund të nxjerrësh në pah çdo vlerë të shtuar që ofron në përshkrimin e listimit, si produktet luksoze të banjës ose shërbimet e transmetimit.

Kur Pamellah, një sipërmarrëse dhe ish-anëtare e Bordit këshillimor të pritësve në Malindi, Kenia, filloi të presë vizitorë, ajo thotë se u përqendrua shumë në kostot e saj. Ajo vendosi çmimin e saj "aq të lartë, bazuar në atë se sa kisha investuar në të" dhe nuk mori asnjë prenotim.

"Dy orë pasi ula çmimin, filloi pritja e vizitorëve që nuk ka reshtur që atëherë", thotë Pamellah. Megjithëse përvoja e saj mund të mos jetë tipike, ajo arriti ta rrisë shpejt çmimin e saj. Falë prenotimeve të vazhdueshme dhe recensioneve pozitive të vizitorëve, ajo u bë superpritëse më pak se tre muaj më vonë.

Monitoro shpenzimet dhe fitimet gjatë gjithë rrugëtimit tënd të pritjes së vizitorëve. "Kam krijuar një llogari bankare të veçantë për të monitoruar shpenzimet e mia, kështu që kur vjen momenti i pagimit të taksave, nuk e kam problem", thotë Reed, mësues, sipërmarrës dhe ish-anëtar i Bordit këshillimor të pritësve në Filadelfia.

Avokatët vendas ose profesionistët e taksave mund të japin këshilla rreth taksave dhe ligjeve që zbatohen për pritësit në zonën tënde. Ki parasysh se Airbnb nuk jep udhëzime profesionale. "Nëse të duhet të marrësh një këshilltar për taksat apo të bësh pak kërkime për të kuptuar se si funksionojnë shifrat, bëje këtë", thotë Reed.

Nëse je një pritës i ri që kërkon asistencë individuale për çmimet, do të të gjejmë një ambasador superpritës që mund të të ndihmojë.

Informacioni në këtë artikull mund të ketë ndryshuar që nga publikimi.