Praktikat më të mira të pritjes së vizitorëve

Si pritës i Airbnb, jo vetëm që do të fitosh të ardhura nga prona, por do të takosh edhe njerëz interesantë nga e gjithë bota. "Kemi pritur një herë një prodhues dronesh, një kantautor profesionist dhe një artist cirku" - thonë pritëset Beverlee dhe Suzie nga Oakland, Kaliforni. "Vërtet që na është pasuruar jeta." Kushdo që ka një hapësirë për të dhënë me qira, mund të bëhet pritës në Airbnb. Mjafton të sigurohesh që je gati të përmbushësh standardet bazë të përcaktuara nga Airbnb për të garantuar një përvojë të rehatshme dhe të besueshme për çdo vizitor. Këtu gjen informacionet bazë për atë bëjnë pritësit e zotë:

Duke iu përgjigjur shpejt mesazheve të vizitorëve, tregon se je një pritës i vëmendshëm dhe i kujdesshëm. Është e rëndësishme t'u përgjigjesh brenda 24 orësh mesazheve që kanë të bëjnë me prenotimet. Një niveli gatishmërie i lartë nuk është vetëm shenjë e një mikpritjeje të shkëlqyer, por edhe një nga kriteret për t'u bërë superpritës.

Konsidero të shkarkosh aplikacionin e Airbnb që t'i përgjigjesh mesazheve kudo që të jesh. Për më shumë qartësi, edhe pse është diçka pozitive për pritjen e vizitorëve nëse i përgjigjesh çdo mesazhi të vizitorëve, niveli i gatishmërisë bazohet vetëm në përgjigjet që u kthen mesazheve që kanë të bëjnë me prenotimet.

Të dhënat e Airbnb tregojnë se pritësit priren ta pranojnë shumicën e kërkesave të prenotimit që marrin për datat e tyre të disponueshme. Mund të përdorësh cilësimet e disponueshmërisë në kalendarin tënd për të bllokuar çdo ditë që nuk ke siguri se mund të presësh vizitorë.

Nëse duket se po refuzon shumë kërkesa prenotimi, Airbnb mund të supozojë se nuk je i disponueshëm për të pritur vizitorë, ndaj mund ta pezullojë përkohësisht listimin tënd, derisa të kesh më shumë kohë. Për t'u siguruar që mund të pranosh sa më shumë kërkesa të jetë e mundur, ndërsa ndihesh ende rehat me çdo rezervim, konsidero këto mundësi:

• Shto verifikimin e dokumentit zyrtar të identifikimit tek kushtet e rezervimit
• Shto Rregullat e shtëpisë për të përcaktuar pritshmëritë për vizitorët
• Nëse e ke aktiv funksionin "Prenoto në çast", mund të vendosësh si kusht që vizitorët të kenë marrë recensione pozitive nga pritës të tjerë, para se të prenotojnë

Airbnb u kushton shumë rëndësi anulimeve. Ato nuk janë vetëm tepër shqetësuese për vizitorët, pasi planet e tyre të udhëtimit varen nga ti, por lëkundin edhe besimin në gjithë komunitetin. Për këtë arsye, me përjashtim të rrethanave lehtësuese, anulimet duhet të shmangen. Për të minimizuar rrezikun e anulimeve:

• Sigurohu që disponueshmëria dhe çmimet të jenë gjithmonë të përditësuara
• Planifiko që përpara kur ka evente të veçanta ose festa, nëse do të duash ta përdorësh hapësirën tënde për arsye personale, apo të rritësh çmimin për natë
• Nëse për ndonjë arsye kalendari yt nuk është i përditësuar mirë, ose thjesht nëse preferon të miratosh çdo kërkesë prenotimi që merr, konsidero të çaktivizosh funksionin "Prenoto në çast"
• Nëse e publikon hapësirën tënde në faqe të tjera interneti, aktivizo funksionin e sinkronizimit të kalendarit për të shmangur mbivendosje prenotimesh për të njëjtat data

Në fund të çdo qëndrimi, vizitorët do të recensojnë përvojën e qëndrimit tek ti. Recensionet pozitive të ndihmojnë të marrësh më shumë prenotime dhe mund të të ndihmojnë të fitosh statusin e superpritësit. Pritësit që marrin recensione të shkëlqyera janë ata që zakonisht fokusohen në aspektet e mëposhtme:

• Pastërtia: Vizitorët presin të gjejnë një ambient të pastër dhe të rregullt, siç shfaqet në fotografitë e listimit. Sigurohu që t'i japësh vetes kohë të mjaftueshme për të pastruar ndërmjet qëndrimeve të vizitorëve, veçanërisht nëse prenotimet i ke njëri pas tjetrit.
• Kushtet minimale: Vizitorët e vlerësojnë nëse kanë disa artikuj bazë në dispozicion. Airbnb rekomandon të mbash rezerva të letrës higjienike, sapunit të duarve dhe të trupit, shtrojave/çarçafëve dhe të paktën nga një peshqir dhe jastëk për person.
• Detaje të sakta të listimit: Ndihmoji udhëtarët të kuptojnë nëse hapësira jote i plotëson nevojat e tyre duke ofruar informacion të qartë dhe detaje që duhet t'i dinë.
• Një regjistrim pa probleme: Një proces i qartë dhe i thjeshtë regjistrimi ua lehtëson punën vizitorëve pas një dite udhëtimi.
• Komunikim proaktiv: Vizitorëve u pëlqen të dinë se je në dispozicion gjatë gjithë qëndrimit të tyre. Kontaktoji vizitorët sa më herët për të koordinuar planet e mbërritjes.

Për më shumë sugjerime se si të ruash një vlerësim të përgjithshëm të lartë, hyr në faqen e mikpritjes.

Airbnb nuk pret që çdo rezervim të jetë i përkryer nga fillimi në fund, por do të mësosh shumë dhe do të zhvillosh stilin tënd të pritjes së vizitorëve ndërkohë që fiton më shumë përvojë. Ndjekja e këtyre udhëzimeve është një hap i parë i shkëlqyer drejt vizitorëve të kënaqur, recensioneve pozitive dhe një rrugëtimi përmbushës në pritjen e vizitorëve.