Krijimi i një plani biznesi për pritjen e vizitorëve

Nick dhe Sarah Roussos-Karakaian janë një ekip bashkëshortësh Superpritësish (@nestrs) që e kanë kthyer pritjen e vizitorëve në një biznes me kohë të plotë në Kolumbus, Ohajo. Pasi publikuan në Airbnb bodrumin e tyre në qytetin e Nju Jorkut në vitin 2012, ata u magjepsën me këtë gjë. Që atëherë e kanë kthyer këtë në punën e ëndrrave të tyre. Sarah gjithashtu është bashkëdrejtuese e një podcast të titulluar "Faleminderit për vizitën", një burim informacioni, si për pritësit me përvojë ashtu edhe për ata në fillimet e tyre. Në këtë podcast ndajnë njohuritë dhe sugjerimet e tyre për hapjen e një biznesi në Airbnb.

Sarah: : “Për ne gjithçka nisi në Kuins, Nju Jork. Isha aktore. Gjithashtu, punoja shumë si banakiere.”

Nick: "Dhe unë isha praktikant, me një diplomë master në arkitekturë, që mezi arrija të fitoja bukën e gojës...”

Sarah: “Të dy kishim shumë dëshirë të blinim një pronë, por nuk dinim si t'ia bënim. Një ditë, zbulova këtë shtëpizë, më e vogla në lagje, por e shtrenjtë për ne. Gjithsesi, isha e vendosur të gjeja një mënyrë për ta blerë.”

Nick: “Me edukimin e duhur financiar, kursimet dhe mbështetjen e familjes, arritëm të merrnim një kredi.”

Sarah: “Gjatë kësaj periudhe, mora vesh nga një mik që po publikonte një dhomë të apartamentit të tij në Airbnb, gjë që e ndihmonte të paguante qiranë në Qytetin e Nju Jorkut. M'u duk thjesht gjeniale. Jo shumë njerëz e njihnin Airbnb në atë kohë. Nick ishte pak hezitues kur i tregova rreth mundësisë për të publikuar pronën tonë, por kjo gjë mua më tërhiqte shumë. E hodhëm këtë hap dhe kështu filloi gjithçka."

Nick: “Më kujtohet kur pastroja banjat dhe sa i gëzuar isha për këtë. Kjo punë paguante kredinë tonë, ndaj mendova: "Po, kjo është fantastike! Si mund të punojmë më shumë?’”

Sarah: “Mund të shfrytëzoja përvojën time në industrinë e mikpritjes nga puna në hotele luksoze dhe ndihesha me të vërtetë e lumtur. Pas katër vitesh punë me pritjen e vizitorëve dhe si pronarë banese në NYC, patëm fatin të kontaktoheshim nga një ndërtues që dëshironte të blinte ambientin tonë, së bashku me mobiliet e gjithçka tjetër.”

Nick: “Pasi reflektuam, analizuam një sërë vendesh ku mund të transferoheshim dhe udhëtuam nëpër vend duke biseduar me vendasit, e gjetëm veten në Kolumbus, Ohajo.”

Sarah: “Të kombinosh projektimin, mikpritjen, pasuritë e patundshme me lirinë për të realizuar zgjedhjet tona krijuese, s'është gjë tjetër veçse një ëndërr e bërë realitet. Për këtë arsye jemi kaq të pasionuar të ndihmojmë të tjerët të mësojnë se si të presin vizitorë.”

Sarah: "Para se të fillosh, të rekomandojmë të krijosh një deklaratë misioni për veten. Ajo do të përbëjë parimin dhe udhërrëfyesin tënd dhe është veçanërisht e dobishme gjatë atyre momenteve kur mund të ndjesh pasiguri për një drejtim apo vendim që duhet të marrësh. Deklarata e misionit të ndihmon të marrësh vendimet e duhura. Përmban gjithashtu informacione për mënyrën se si e krijon dhe e organizon hapësirën tënde."

Nick: "Kur të krijosh një deklaratë misioni, gjej kohën për t'i bërë vetes disa pyetje:

• Çfarë të motivon?
• Cilat janë vlerat e tua?
• Si dëshiron ta ushtrosh aktivitetin?
• Cili është vizioni yt?
• Cilët janë objektivat e tu?”

Sarah: "Misioni ynë është të transformojmë hapësirat që transformojnë jetë. Dhe përpiqemi ta kujtojmë këtë në gjithçka që bëjmë.”

Nick: “Para se të ndërmarrësh këtë hap, është shumë e rëndësishme të bësh kërkimet e duhura dhe të njohësh konkurrencën në zonën tënde. Ky hulumtim fillestar do të të ndihmojë të kuptosh se si do ta projektosh, ta reklamosh dhe ta marketosh hapësirën tënde.

• Konsidero demografinë tënde. Kush mund ta prenotojë ambientin tënd? Për shembull, në rastin tonë, Kolumbus është qytet universitar, ndaj i kemi përshtatur hapësirat për të mirëpritur prindërit që vizitojnë fëmijët e tyre.
• Kontrollo shërbimet e tua. A i lejon kafshët shtëpiake? A ke një vend parkimi apo pishinë? A është ambienti yt i dekoruar në mënyrë unike? Çdo gjë që e bën hapësirën tënde edhe më të veçantë, të jep mundësinë të tarifosh më shumë.
• Kërko online dhe kontrollo për më shumë listime në Airbnb, hotele dhe ambiente qira afatshkurtra në afërsi. Çfarë ofrohet? Sa tarifojnë? A ka mënyra për t'u diferencuar prej tyre?
• Krijo një strategji për çmimet. Nëse je në fillimet e tua dhe do të rrisësh normën e qëndrimeve, përdor Çmimet inteligjente të Airbnb, mjet me anë të të cilit mund të ndryshosh automatikisht tarifat gjatë ditëve të javës ose fundjavës.”

Sarah: “Krjimi i një buxheti, edhe pse mund të mos jetë shumë tërheqës, është super i rëndësishëm. Rekomandojmë të përdorësh një fletë llogaritëse dhe të ndash kostot në tre kategori:

Kostot paraprake: Këto janë investimet fillestare që bën në hapësirën tënde para se dikush ta përdorë, si rinovimet, dekorimet, mobiliet dhe fotografitë.

• Kushtoi kohë dekorimit. Nuk është e rëndësishme të blesh në dyqane të shtrenjta apo të bësh çdo gjë luksoze. Thjesht bëje hapësirën mikpritëse. Vizito dyqanet e relikeve, bëhu kreativ dhe bëj diçka ndryshe me ngjyra ose me një tematikë. Këto janë detajet që do të tërheqin vëmendjen e vizitorëve te listimi yt.
• Pritësve që janë në fillimet e tyre u themi gjithmonë të investojnë në dyshekë të rehatshëm, në kolltuqe dhe çarçafë. Të gjithë rehatohen në krevat sapo të futen në një dhomë hoteli, ndaj sigurohu që të jetë i rehatshëm. Nganjëherë marrim recensione me 5 yje vetëm për shkak të krevatit, gjë që do të të ndihmonte t'i mbaje lart normat e qëndrimit.

Kostot e vazhdueshme: Artikuj kryesorë që përdoren nga vizitorët dhe që duhet të zëvendësohen, përfshirë artikujt e tualetit, letra higjienike, peshqirët prej letre, bateritë dhe llambat.

• A po vendos edhe artikuj shtesë, të tillë si ujë ose kafe?
• Bëj një listë me të gjithë artikujt e nevojshëm dhe sigurohu që t'i gjesh me çmime të përshtatshme për ty.
• Blej me shumicë për gjashtë muaj njëherësh dhe ruaji sasitë e tua në një fletë llogaritëse
• Kur bëhet fjalë për artikuj si çarçafët, mos harro të llogarisësh se sa herë në vit dëshiron t'i blesh të reja. Duhet të sigurohesh që të kesh gjithmonë çarçafë të bukur dhe të pastër për vizitorët.

Kostot e mirëmbajtjes dhe menaxhimit: Kjo mbulon çdo gjë të nevojshme për ta mbajtur hapësirën tënde të sigurt, të ngrohtë dhe të banueshme, duke përfshirë oborrin, ambientet e jashtme dhe pamjen e hapësirave të jashtme. A do të punësosh një bashkëpritës apo një person që do të kujdeset për pastrimin dhe përgatitjen e hapësirës ndërmjet qëndrimeve?

Mblidhi këto shifra dhe sigurohu që investimi është i përshtatshëm për ty dhe që objektivat e vendosur të jenë realiste. Nëse jo, atëherë ndoshta të duhet të kursesh më shumë paraprakisht, në mënyrë që të krijosh një hapësirë për të cilën ndihesh krenar.”

Sarah: “Një prej sugjerimeve të preferuara për pritësit është: fto një mik të sinqertë e të drejtpërdrejtë të qëndrojë në hapësirën tënde. Duke qenë vazhdimisht në kontakt me hapësirën, mund të harrosh gjërat që i nevojiten një udhëtari, siç janë furçat e pastat e dhëmbëve, ose probleme me projektimin që mund të të kenë shpëtuar. Një mik mund të të ndihmojë me sugjerime për këto detaje të bezdisshme, por të rëndësishme. Nuk do të doje që një vizitor me pagesë t'i vërë në dukje këto probleme.”

Nick: "Na pëlqen të lëmë një shportë të quajtur ‘Harrove diçka?’ me artikuj tualeti dhe sende që vizitorët mund të kenë nevojë në minutën e fundit. Mentaliteti mikpritës duhet të jetë thelbi i biznesit tënd për të pasur sukses. Kjo është arsyeja pse njerëzit shkojnë në hotele të markave të ndryshme që u pëlqejnë. Ata e dinë se çfarë të presin: hapësirë që duket sikur ata janë të parët që po e përdorin, peshqirë të palosur me kujdes dhe detaje të tjera, si karikues telefoni pranë komodinës, që vizitorët e dinë që do t'i gjejnë gjithmonë. Duhet t'i ofrosh vizitorëve të njëjtin nivel shërbimi, në mënyrë që ata të kthehen vazhdimisht.”

Nick : “Pritja e vizitorëve është sfiduese, por gjërat kanë ndryshuar tani në krahasim me kur Airbnb sapo kishte filluar aktivitetin. Ekzistojnë më shumë lloje teknologjish, mjetesh, materiale burimore dhe asistencë që të ndihmojnë të organizosh procesin dhe ta lehtësojnë jetën si pritës.”

Sarah: "Kur pritësit janë në fillimet e tyre, rekomandojmë të testojnë nga fillimi deri në fund procesin për secilin qëndrim: nga mesazhi fillestar i prenotimit, te përshëndetja me vizitorët, te pastrimi dhe përgatitje ndërmjet qëndrimeve. Pasi të kesh kuptuar çdo gjë, mund ta automatizosh listimin në mënyra të ndryshme. Për shembull:

• Aplikacione të bazuara në internet: Ka aplikacione që mund t'i përdorësh (si IFTTT) për të programuar aktivizuesit e ngjarjeve dhe për të lidhur mjetet dixhitale. Për shembull, kur merr një email konfirmues për prenotimin në kutinë e mesazheve, mund të dërgojë një rikujtesë automatike tek kalendari për ty, partnerin ose personin që merret me pastrimin .
• Bravat inteligjente ndryshojnë gjithçka. Vizitorëve mund t'u dërgohet një kod unik me të njëjtën kohëzgjatje sa të udhëtimit. Kodet i lejojnë vizitorët të regjistrohen vetë, prandaj nuk është e nevojshme të koordinojmë kohën për t'i pritur në apartament. Thjesht, mund t'i kontaktojmë gjatë qëndrimit të tyre.
• Lista e zakonshme: Kam përgatitur një listë kontrollesh semestrale për çdo banesë, me gjërat që duhet të bëj për sigurinë dhe mirëmbajtjen, gjëra të tilla si kontrolli i filtrave të furrës, kontrolli i baterive të alarmeve të zjarrit dhe pastrimi poshtë krevateve. E printoj listën dhe e var në një dollap, në mënyrë që sa herë ta vizitoj pronën, të di si është gjendja për këtë vit.”

Nick: “Duhet shumë punë për të krijuar një biznes në Airbnb. Gjithsesi, shpresojmë t'u tregojmë njerëzve se është e mundur, nëpërmjet shumë mënyrave, të kesh në pronësi një banesë dhe ta bësh këtë punë me kohë të plotë.”

Sarah: "E di që ndryshova karrierë dhe isha e frikësuar se nuk do të gjeja asgjë tjetër që ta doja po aq sa aktrimin. Por Airbnb na ka ndryshuar jetën. Mund të bëjmë zgjedhjet tona krijuese, të jemi shefat e vetes dhe për këto arsye bëhet edhe më i veçantë.”

Nick: "Kjo na lejon të jemi fleksibël dhe të shijojmë jetën tonë pak më shumë. Shpresojmë që të gjesh një mënyrë për të filluar një biznes në Airbnb dhe ta bësh tëndin. Nëse të nevojiten më shumë këshilla, na kontakto.”

Pritje të mbarë vizitorësh!
Nick + Sarah, Nestrs