Udhëzime për të shkruar titullin e listimit

Titulli i listimit është një nga gjërat e para që vizitorët lexojnë në rezultatet e kërkimit dhe një mundësi për të theksuar se çfarë e bën ambientin tënd unik. Ndiq këto udhëzime për shkrimin e një titulli efektiv për të ndihmuar që listimi yt të spikatë në rezultatet e kërkimit, të ngjallë interes për të prenotuar ambientin tënd dhe të përcaktojë pritshmëritë për vizitorët.

Vizitorët kërkojnë në Airbnb me të gjitha llojet e pajisjeve me ekrane të madhësive të ndryshme. Një titull që do të ishte mirë për një shfletues interneti, do të ishte shumë i gjatë për vizitorët që kërkojnë listime përmes aplikacionit celular.

Mbajtja e një kufiri prej 32 karakteresh bën që titulli të shfaqet plotësisht si në desktop ashtu edhe në pajisjet celulare.

Ja tre shembuj të mirë të titujve të shkurtër të listimeve:

• Loft modern me pamje nga qendra

• Ambient në mal për shefa kuzhine

• Vilë plazhi pranë Año Nuevo

Nëse titulli është më i gjatë se 32 karaktere, vendos informacionin më të rëndësishëm në fillim. Titujt më të gjatë se ç'duhet shkurtohen automatikisht në rezultatet e kërkimit dhe pjesa e mbetur e titullit zëvendësohet me tre pika. Për shembull, një titull si "Kabinë fshati me pamje nga liqeni, me vatër zjarri, rampë për varka" bëhet "Kabinë fshati me pamje nga liqeni..." në rezultatet e kërkimit.

Si rregull drejtshkrimi, përdor germë të madhe vetëm në fillim të titullit. Kështu është më e lehtë për t'u lexuar dhe me ton më bashkëbisedues sesa po të shkruhet shumica e fjalëve me germë të madhe ose ME TË GJITHA GERMAT TË MËDHA.

Për t'u dhënë vizitorëve një përvojë më të mirë kërkimi, mos përdor shkronja të mëdha në fjalë të tjera të titullit, përveç rastit kur është një emër i përveçëm, siç janë emrat e qyteteve. Mund të bësh edhe përjashtime për shkurtime, si MB ose një kod aeroporti, si LHR.

Ja tre shembuj të mirë të shkrimit të titujve me drejtshkrimin e duhur:

• Kabinë buzë detit në plazhin Bondi

• Dhomë miqsh në një shtëpi romantike të stilit viktorian

• Studio ekologjike pranë LAX

Emojit dhe simbolet mund të jenë konfuze ose çorientuese, sepse ato nënkuptojnë gjëra të ndryshme për njerëz të ndryshëm në botë. Një gisht lart mund të interpretohet si shenjë miratimi, si numri një ose si gjest ofendues.

Për ta bërë titullin e listimit më tërheqës dhe më të lehtë për t'u lexuar, përdor fjalë të thjeshta dhe përshkruese për ambientin tënd. Përdorimi i karaktereve të veçanta (si !, #, ose *) është i pranueshëm, por jo përsëritja e tyre për të theksuar mendimin (si !!! ose ***). Për të ndarë mendimet, përdor presje me hapësira ose vetëm një vizë të pjerrët pa hapësira.

Ja një shembull se çfarë nuk duhet të bësh:

• ****Chalet për skijim dhe golf****!!!

Ja një mënyrë më e mirë për ta shkruar këtë:

• Chalet për skijim/golf me oborr privat

Në shumicën e rasteve, nuk është e nevojshme të rivendosësh informacionet që u shfaqen tashmë vizitorëve në rezultatet e kërkimit, si qyteti apo qyteza jote dhe numri total i krevateve. Në vend të tyre, përdore titullin e listimit për të shtuar detaje unike që ndihmojnë në tërheqjen e vëmendjes.

Për shembull, nëse listimi yt është në Buenos Aires, mund të përfshish lagjen tënde, si "Recoleta", në titullin e listimit. Nëse është në Firence, Itali, mund të specifikosh "pranë Uffizi" ose një pikë tjetër referimi pranë ambientit tënd. Ose, nëse ke një hapësirë të dedikuar për zyrë, mund të duash të theksosh në titull që është "e përshtatshme për punë". Kjo të ndihmon të qartësosh detaje të rëndësishme për vizitorët.

Mund të heqësh gjithashtu fjalën "i ri" nga titulli i një listimi të ri, sepse ky informacion u është komunikuar tashmë vizitorëve përmes një distinktivi në rezultatet e kërkimit.

Lexo Rregulloren e përmbajtjes së Airbnb

Informacioni në këtë artikull mund të ketë ndryshuar që nga publikimi.