Kërkesat e shëndetit dhe të sigurisë për qëndrimet në Airbnb

Gjatë pandemisë së COVID-19, është e rëndësishme të mendosh për shëndetin dhe sigurinë. Në bazë të udhëzimeve të marra nga Organizata Botërore e Shëndetësisë dhe nga Qendra Amerikane për Kontrollin e Sëmundjeve, kemi krijuar një sërë praktikash të detyrueshme sigurie ndaj COVID-19 për pritësit dhe vizitorët e listimeve të Airbnb. Përveç kësaj, duhet të njihesh me udhëzimet e përgjithshme të shëndetit dhe të sigurisë për mbrojtjen nga COVID-19, të vazhdosh të monitorosh kufizimet dhe këshillat zyrtare të udhëtimit dhe të ndjekësh të gjitha udhëzimet kombëtare dhe lokale.

Airbnb ka prezantuar udhëzime dhe programe për trajtimin e çështjeve të shëndetit dhe të sigurisë, por këto masa nuk mund ta eliminojnë rrezikun tërësisht. Veçanërisht nëse bën pjesë në një kategori me rrezikshmëri më të lartë (p.sh.: persona mbi 65 vjeç ose me probleme ekzistuese shëndetësore si diabeti ose probleme me zemrën), rekomandojmë të ndjekësh udhëzime të posaçme nga profesionistët dhe të marrësh masa parandaluese shtesë kur planifikon të prenotosh një qëndrim ose përvojë në Airbnb. Mëso më shumë rreth udhëzimeve të shëndetit dhe të sigurisë për pritësit dhe vizitorët e Përvojave në Airbnb.

Praktikat e sigurisë për COVID-19 (të detyrueshme)

Vër maskë dhe praktiko distancimin social kur kërkohet nga ligjet dhe udhëzimet lokale

Kur kërkohet nga ligjet ose udhëzimet lokale, të gjithë pritësit dhe vizitorët duhet të bien dakord me sa më poshtë:

• Vër maskë ose mbulesë fytyre kur bashkëvepron personalisht
• Mbani 2 metra distancë nga njëri-tjetri gjatë gjithë kohës

Ndiq procesin e pastrimit të përparuar me 5 hapa të Airbnb midis çdo qëndrimi

Të gjithë pritësve dhe vizitorëve u kërkohet të ndjekin praktikat e sigurisë ndaj COVID-19 të përshkruara më sipër, sipas rastit, duke përfshirë procesin e pastrimit të përparuar me 5 hapa të Airbnb, midis qëndrimeve të vizitorëve. Çdo pritës apo vizitor që i shkel në mënyrë të përsëritur këto udhëzime mund të përballet me pasoja të tjera, duke përfshirë pezullimin e llogarisë ose largimin nga komuniteti.

Udhëzime shtesë për të udhëtuar dhe për të pritur vizitorë gjatë COVID-19

Mos udhëto dhe mos prit vizitorë nëse je ekspozuar së fundmi ndaj COVID-19 ose ke simptoma të tij

Për të mbrojtur shëndetin dhe sigurinë e komunitetit tonë, pritësit (dhe gjithë personat që mund të jenë të pranishëm në listim para ose gjatë një qëndrimi) nuk duhet të hyjnë në listimet e tyre ose të ndërveprojnë me vizitorët, si dhe këta të fundit nuk duhet të regjistrohen në një listim nëse ndodh një nga situatat e mëposhtme:

• Je ende i infektuar ose ke rezultuar së fundmi pozitiv me COVID-19
• Dyshon se je sëmurë ose je ekspozuar dhe po pret rezultatet e testit për të konfirmuar ose për të hedhur poshtë diagnozën e COVID-19
• Po shfaq simptoma ose je shqetësuar për një infektim të mundshëm me COVID-19
• Kohët e fundit ke pasur kontakte të ngushta dhe të vazhdueshme me një person të konfirmuar ose të dyshuar si i infektuar me COVID-19

Për më shumë detaje rreth si të udhëtosh me përgjegjësi gjatë pandemisë së COVID-19, lexo artikullin tonë për qëndrimet e karantinës dhe izolimit.

Laji duart rregullisht

Sigurohu që t'i lash duart shpesh, veçanërisht nëse je në kontakt me njerëz që nuk janë pjesë e rezervimit tënd dhe nëse prek sipërfaqe dhe enë në një ambient të përbashkët ose në një hapësirë të përbashkët.

• Laji duart mirë me ujë e sapun për të paktën 20 sekonda
• Nëse nuk ka sapun dhe ujë, përdor një solucion dezinfektues duarsh që përmban të paktën 60% alkool. Mbuloji duart dhe fërkoji ato me njëra-tjetrën derisa të thahen.

Ndiq ligjet dhe udhëzimet lokale për maskat dhe distancimin social në hapësirat dhe ambientet e përbashkëta

Kur ndodhesh në një hapësirë ose ambient të përbashkët (si pritës ose si vizitor), respekto ligjet dhe udhëzimet lokale për mbajtjen e maskës dhe të distancimit social nga kushdo që nuk është pjesë e rezervimit tënd. Pritësit duhet të konsiderojnë të ofrojnë një regjistrim pa kontakt, nëse është e mundur.

Ki parasysh se nëse nuk ndihesh rehat të qëndrosh në një dhomë private apo një ambient të përbashkët, konsidero më mirë të prenotosh një ambient të plotë. Nëse nuk je rehat me idenë e pritjes së vizitorëve në një dhomë private ose një ambient të përbashkët, mund të publikosh gjithë ambientin ose, nëse kjo nuk është e mundur, mund të ndërpresësh pritjen e vizitorëve.

Pritësit duhet të ndjekin gjithashtu udhëzimet lokale për pritjen e vizitorëve në dhoma private, ambiente të përbashkëta dhe për numrin total të lejuar të personave që mund të mblidhen në listim.

Udhëzime shtesë për pritësit e dhomave private dhe ambienteve të përbashkëta

Pritësit e listimeve të dhomave private ose të ambienteve të përbashkëta duhet gjithashtu:

• Të kufizojnë numrin e vizitorëve sipas nevojës për të mundësuar distancimin social në të gjitha hapësirat e përbashkëta, kur kërkohet nga ligjet ose udhëzimet lokale
• Të ajrosin hapësirat e përbashkëta gjatë qëndrimit, kur kjo gjë është e sigurt, siç specifikohet në procesin e pastrimit të përparuar me 5 hapa
• Të pastrojnë dhe të higjienizojnë ambientet e përbashkëta (si banjat dhe kuzhinat) sa më shpesh të jetë e mundur

Disa shtete mund të vendosin kufizime për pritjen e vizitorëve në dhoma private apo të përbashkëta ose mund të vendosin detyrime ose kritere shtesë për këto hapësira. Sigurohu që të lexosh dhe të ndjekësh çdo udhëzim shtesë për sigurinë dhe pastrimin nga autoritetet qeveritare dhe/ose shëndetësore në juridiksionin tënd lokal.

Çfarë duhet të bësh nëse rezulton pozitiv me COVID-19 gjatë ose pas qëndrimit tënd

Nëse kohët e fundit ke rezultuar pozitiv me COVID-19 ose ke filluar të ndjesh simptoma të COVID-19, kontakto mjekun dhe informo autoritetet lokale përkatëse si dhe këdo që mund të jetë prekur ose ekspozuar.