Si të shkruash një përshkrim fantastik të ambientit tënd
Një përshkrim i shkëlqyer është një nga mënyrat më të mira për të tërhequr vizitorë. Nuk është nevoja të shkruash pa fund, mjafton t'u thuash njerëzve se çfarë të presin në ambientin tënd.
Për të filluar, zgjidh deri në dy karakteristika të spikatura dhe do të sugjerojmë një frazë hyrëse. Për shembull, nëse zgjedh "Paqësore" dhe "Elegante", mund të propozojmë "Shkëputu dhe rehatohu në këtë hapësirë të qetë dhe elegante."
Kjo frazë hyrëse është thjesht një ide, me qëllim që të të frymëzojë. Të rekomandojmë ta zëvendësosh frazën tonë me fjalët e tua dhe të shtosh detaje të tjera të rëndësishme për hapësirën tënde. E dimë që mund ta bësh shumë mirë!
Provo këto sugjerime për të krijuar një përshkrim tëndin sa më bindës për ambientin tënd:
1. Nxirr në pah karakteristikat e veçanta. Çdo hapësirë është e ndryshme, prandaj trego se çfarë e dallon tënden. Për shembull:
- A është kuzhina e furnizuar mirë? "Përgatit një ushqim të shpejtë ose një banket fantastik në kuzhinën e shefit të kuzhinës me gjithë pajimet e nevojshme."
- Ka pamje fantastike? "Sodit diellin teksa perëndon mbi liqen, ndërsa rehatohesh në ndenjësen pranë dritares që sheh nga bregu.”
- Ofron qasje të lehtë? "Në hyrjen tonë pa shkallë, mund të hysh përmes një shtegu të gjerë e të shtruar nga rrugica e makinave."
2. Jep detaje konkrete. Përfshi detaje praktike që mund t'i ndihmojnë vizitorët të planifikojnë që përpara. Informohu paraprakisht për çdo pikë të fortë të hapësirës sate, për të përcaktuar pritshmëritë. Për shembull:
- A është një nga krevatet e tua një kolltuk? "Divani me hapje ka një dyshek me susta me madhësi dopio "queen".”
- Ndodhet në një qytet të zhurmshëm? "Ambienti ndodhet në qendër, ndaj merr parasysh pak zhurmë nga trafiku i qytetit."
- Është i dobët sinjali i celularit? “Jemi pak larg pikave kryesore, prandaj printoji udhëzimet tona para se të nisesh".
3. Trego historinë e hapësirës sate. Përmes detajeve që jep, ndihmoji vizitorët të imagjinojnë sikur janë heronjtë e aventurës së tyre. Për shembull:
- Ke restauruar një banjë antike? "Rehatohu në vaskën me këmbët si kthetra dhe lër çdo shqetësim të venitet."
- Ke instaluar një aksesor për ushqimin e zogjve? "Filloje ditën tuaj me cicërimat e zogjve!"
4. Shkruaj shkurtimisht. Shkruaj përmbledhtas duke u përqendruar në detaje të rëndësishme që nuk i ke specifikuar më parë. Për shembull:
- Krenar për lojrat që ke? "Provoji aftësitë e tua në shah, luaj një lojë tavoline ose provo librat me ngjyrosje. Argëtim për të gjitha moshat!"
- Ke krevat luksoz? "Zhytu në dyshekun me sfungjer dhe çarçafë pambuku egjiptiane."
Ki parasysh se mund ta përditësosh përshkrimin tënd më vonë. Shumë pritës i perfeksionojnë ato me kalimin e kohës.