Si të tejkalosh pritshmëritë e klientëve

Vlerësimet më të mira dhe recensionet pozitive mund të sjellin më shumë prenotime dhe fitime më të larta. Përdor përshtypjet e klientëve për të vazhduar të përmirësosh shërbimin.

Seksioni i informacioneve shfaq vlerësimin e përgjithshëm, recensionet publike, shënimet private dhe vlerësimet e detajuara për mikpritjen, vendndodhjen (kur aplikohet), besueshmërinë dhe raportin cilësi/çmim.

Klientët e vlerësojnë ndjenjën e përkujdesjes dhe mirëseardhjes. Bëj më të mirën tënde për të realizuar një ofertë me cilësi të lartë dhe për t'iu paraprirë nevojave të tyre.

• Planifiko një mesazh mirëseardhjeje. Sigurohu që klientët të kenë informacionin që iu duhet përpara shërbimit. Një fotograf mund të ndajë një parashikim të detajuar dhe informacione për veshjet.
• Mëso rreth klientëve të tu. Dërgo një mesazh për të pyetur rreth preferencave të një klienti dhe nevojave që ka për të personalizuar shërbimin. Një ofrues shërbimi kateringu mund të pyesë për alergjitë dhe personalizimet e menusë.
• Konsidero perspektivën e klientit. Disa klientë mund të jenë të rinj në qytetin ose vendin tënd. Atyre mund t'u duhet ndihmë shtesë për të lëvizur në zonë ose për të kuptuar zakonet lokale. Mundohu të tregosh ngrohtësi, të ofrosh ndihmë dhe të komunikosh me respekt.
• Sill furnizime shtesë. Sigurohu që të jesh gati për probleme të mundshme, si p.sh.: nëse mjetet ose pajisjet prishen ose nëse një klient harron një artikull të rëndësishëm. Një trajner personal mund të paketojë tapet rezervë joge.
• Kontakto në vazhdim. Dërgo një mesazh për t'i falënderuar klientët dhe për të folur rreth hapave të ardhshëm. Kjo mund të përfshijë një afat kohor se kur do të jenë të disponueshme fotografitë ose një recetë që u ka pëlqyer veçanërisht klientëve.

Nëse pret klientë në biznes ose në hapësirë publike, klientëve iu kërkohet të vlerësojnë vendndodhjen. Një estetist mund të ofrojë një trajtim fytyre në spa ose një fotograf mund të ofrojë një seancë në një park. Klientëve u pëlqejnë hapësirat e ngrohta që janë të pastra e të mirëpajisura.

• Jepi përparësi rehatisë së klientëve. Ofrimi i një hapësire të sigurt dhe të pastër i ndihmon klientët të shijojnë shërbimin. Një masazhier do të duhet të ofrojë një banjë pa njolla në mënyrë që klientët të mund të relaksohen gjatë një trajtimi të indeve të thella.
• Dërgo udhëzime të hollësishme. Shpjego qartë se çfarë mund të presin klientët nga vendndodhja jote dhe ku do të takoheni. Mendo për probleme të mundshme parkimi dhe të transportit publik. Përfshi udhëzimet e regjistrimit nëse je në një hapësirë të përbashkët. Duhet të kihen parasysh edhe kushtet lehtësuese. Për shembull, a është karrigia me rrota e përshtatshme për vendndodhjen e sesionit fotografik?

Klientëve nuk do t'iu kërkohet të japin përshtypjet e tyre për ambientin nëse ti udhëton për në vendndodhjen e tyre.

Klientët presin që pritësi të ofrojë një shërbim të përsosur. Kjo do të thotë të vendosësh pritshmëri të qarta për klientët, të komunikosh në kohë dhe qartë dhe të kesh mirëorganizim.

• Jepi përparësi saktësisë. Sigurohu që përshkrimet dhe fotografitë të tregojnë saktësisht se çfarë marrin klientët. Një stilist flokësh mund të përshkruajë produktet dhe teknikat që përdor dhe të përfshijë fotografi të llojeve të stilimeve të flokëve me kapje dhe gërshetave që ofron.
• Tregohu aktiv në përgjigje. Cakto oraret e tua të zakonshme në skedën "Listimet" për ta bërë të qartë kur ke disponueshmëri. Aktivizo njoftimet në aplikacionin e Airbnb dhe në cilësimet e pajisjes, në mënyrë që të mund të shohësh menjëherë mesazhet e klientëve dhe të përgjigjesh shpejt.
• Planifiko paraprakisht. Përgatit çdo furnizim paraprakisht për t'u siguruar që shërbimi të zhvillohet në orar. Një shef kuzhine mund t'i presë perimet paraprakisht për supën që do të gatuajë në ambientin e klientit.
• Sill çdo ndihmë që të duhet. Mund të të bashkohet një asistent nëse po organizon për një grup të madh ose po ofron një shërbim më të ndërlikuar. Duhet t'u tregosh klientëve nëse një asistent do të të ndihmojë gjatë shërbimit me një njoftim paraprak të mjaftueshëm për të anuluar pa pagesë.
• Paraqitu në kohë. Nëse do të udhëtosh për në vendndodhjen e klientit, ki parasysh rrugën që do të ndjekësh dhe llogarit trafikun.
• Respekto pronën. Nëse po ofron shërbimin në banesën e dikujt tjetër, lëre ambientin siç e ke gjetur.

Klientët kërkojnë shërbime që ofrojnë cilësi të jashtëzakonshme për çmimin që paguajnë. Mendo se si t 'i bësh ofertat e tua edhe më të veçanta dhe që t'ia vlejnë për çmimin që paguajnë klientët.

• Përfshi një sërë alternativash. Shto të paktën 3 oferta me çmime të ndryshme për t'iu dhënë klientëve më shumë alternativa dhe për të arritur objektivat e tua të fitimit. Praktika më e mirë është vendosja e ofertave me çmime fillestare, standarde dhe premium. Për shembull, një fotograf në SHBA mund të ofrojë një sesion gjysmë ore që kushton më pak se 50 dollarë, një sesion të personalizuar portreti që kushton midis 50 dhe 150 dollarë dhe një sesion familjar që kushton më shumë se 150 dollarë.
• Personalizo ofertat e tua. Mjetet e shkëmbimit të mesazheve të Airbnb të ndihmojnë të komunikosh me klinetët për të personalizuar ofertat e tua dhe për të vendosur çmime të personalizuara.
• Ofro një shërbim të shkëlqyer. Përdorimi i materialeve me cilësi më të lartë dhe shtimi i detajeve shtesë që e bëjnë ofertën tënde edhe më të veçantë mund të ndihmojë shumë. Një estetist mund të përfshijë një vaj esencial falas.

Të gjithë pritësit, fotografitë dhe detajet e listimit duhet të përmbushin standardet dhe kriteret për Shërbimet në Airbnb.

Informacioni në këtë artikull mund të ketë ndryshuar që nga publikimi.