Nderim për historinë e zezakëve në botë gjatë gjithë vitit

Çdo muaj ndajmë përditësimet më të fundit nga Bordi këshillimor i pritësve dhe prezantojmë anëtarët e tij që të mund t'i njohësh.

Hej, ju,

Jam Sam Reed, një superpritës nga Filadelfia, Pensilvani dhe anëtar i Bordit këshillimor të pritësve. Gjatë ditës u mësoj nxënësve të shkollave të mesme të lexojnë, të shkruajnë dhe të kuptojnë botën. Ndërsa pjesën tjetër të kohës përpiqem të kontribuoj për mirë për shoqërinë.

Në klasën time nuk përqendrohem vetëm në muajin shkurt si muaji i historisë së zezakëve, sepse historia e zezakëve është 365 ditë në vit, si Juneteenth, e cila njeh fundin e skllavërisë në SHBA.

Në nder të kësaj ngjarjeje të rëndësishme, Bordi këshillimor i pritësve donte ta ndihmonte komunitetin tonë të mësonte më shumë rreth çlirimit të zezakëve. Falë grupit të burimeve për punonjësit zezakë të Airbnb, Black@, mund të mësosh se si shërbyen kryengritjet e zezakëve në botë si katalizator për ndryshimin e shoqërisë, dhe si të marrësh pjesë në përvoja online me pritës që përqendrohen në historinë e zezakëve nga komuniteti i tyre lokal.

Bordi këshillimor i pritësve po e pozicionon veten si një zë të rëndësishëm në zhvillimin e politikave të reja të diversitetit dhe gjithëpërfshirjes dhe në përmirësimin e produktit në Airbnb.

Tashmë i kemi ndarë përshtypjet për Projektin Lighthouse dhe nisma të tjera gjithëpërfshirëse për pritjen e vizitorëve.

Duke i parë të gjitha këto në zbatim, më prek si edukator, dhe më ngazëllen ajo që po zhvillon Airbnb.

Këtë vit, klasat e mia të shkencave humane patën në fokus historinë botërore, por ne nuk mund të distancohemi nga problematikat që kanë të bëjnë me zezakët në historinë botërore.

Kemi bërë disa studime interesante rreth kolorizmit dhe se si ndikon ky fenomen tek njerëzit nga komunitetet e Karaibeve, komunitetet e Amerikës Latine, komunitetet e Afriko-amerikane dhe komunitete të tjera. Kjo ishte një pjesë e konsiderueshme e programit tonë mësimor këtë vit.

Gjëja tjetër interesante që kemi studiuar për të kaluarën ishte afrofuturizmi. Ndonjëherë historia mund të përqendrohet në traumën e popujve të cilëve nuk u janë njohur të drejtat sistematikisht. Por nëse përqendrohemi vetëm tek trauma, nuk do të arrijmë kurrë tek e ardhmja.

Si pjesë e njësisë së afrofuturizmit, fëmijët imagjinonin gjëra të tilla si një botë ndryshe me politika të tjera dhe një Afrikë me lëvizje të reja për çlirimin e saj. Ishte tejet zbavitëse.

Gruaja ime është nga Botsvana, ku kam kaluar tetë vjet si vullnetar dhe sipërmarrës i Korpusit të Paqes. Në gjuhën e saj thuhet një shprehje, "batho ke batho." Do të thotë që "njerëzit janë njerëz", pra mund të jesh ai që je sepse je njeri.

Për mua, misioni i Airbnb për përkatësinë ka të bëjë me pranimin e njerëzve për atë që janë, duke përfshirë edhe njerëzit e ndryshëm nga ti. Duke i njohur ata, ti kupton se nuk je edhe aq i ndryshëm.

Fakti që nuk u ndieva rehat në Botsvana ishte një bekim, vajtja në shtëpinë e një të huaji, në tokën e një të huaji, me të huaj që flasin një gjuhë që nuk e njeh. Përshtatja me parehatinë mund të të ndihmojë të ridimensionosh konceptin e përkatësisë.

Përvojat që kalojmë formojnë aftësinë për të pasur empati. Një nga arsyet që na mungon empatia nuk është se jemi indiferentë, por sepse është diçka që nuk e kemi përjetuar në jetën tonë.

Të qenit empatik ka qenë diçka me shumë vlerë dhe rëndësi për mua në jetë. Dhe empatia që ke për të tjerët është diçka reciproke.

Krijimi i një përvoje ku vizitori të ndijë një lloj lidhjeje varet nga ti vetë, mënyra si organizon hapësirën tënde dhe të qenit mikpritës. Për mua, të qenit një pritës mikpritës është edhe të menduarit se çfarë do të më bënte mua vetë të ndihesh rehat si vizitor dhe të ofroja të njëjtën gjë.

Rituali im i së dielës është të përgatis supë dhe të mirëpres çdo vizitor që dëshiron ta shijojë. Si mund të të japë dikush një recension të keq? Kjo supë ka brenda dashuri.

Pasi mora diplomën MBA, hyra në Korpusin e Paqes e më pas nisa një biznes. Fillimisht më eci mbarë, më pas dështoi dhe falimentova.

U ktheva në Shtetet e Bashkuara nga Botsvana, riorganizova jetën time dhe u bëra edukator. Kam pasur gjithmonë një frymë sipërmarrëse, prandaj tani e quaj veten edukator-sipërmarrës.

Filozofia ime e punës është të mbështes njerëzit. Për shkak të pandemisë dhe pritjes së vizitorëve gjatë kësaj periudhe trazirash racore, fillova të fokusohem shumë më tepër në barazinë racore në këndvështrimin e fuqizimit ekonomik. Me Airbnb, i kam ndihmuar pritësit në komunitetin tim të përfitojnë ndihmë financiare gjatë COVID, si për shembull financime nga Administrata e Biznesit të Vogël ("Small Business Administration").

Krijova gjithashtu programin "Side Hustle Accelerator" për të ndihmuar nxënësit e shkollave të mesme dhe sipërmarrësit e rritur që të zhvillonin dhe të fillonin biznese. Ndihem i bekuar dhe dua t'ua përcjell bekimet e mia edhe të tjerëve.

Mëso më shumë se çfarë ka bërë Bordi këshillimor i pritësve dhe ndiq përditësimet mujore dhe sugjerimet nga anëtarët e bordit.