Sugjerime për pastrimin nga pritës me përvojë

Një ambient i pastër mund të çojë në recensione të shkëlqyera. Sipas të dhënave të Airbnb, mungesa e pastërtisë është një nga arsyet kryesore për dhënien e një recensioni negativ. Provo këto sugjerime nga pritës të suksesshëm për ta mbajtur ambientin të pastër xixë.

Pavarësisht nëse e bën pastrimin vetë apo punëson pastrues, është shumë e rëndësishme që hapësira jote të pastrohet thellësisht midis çdo qëndrimi, çdo herë.

"Është e rëndësishme të kesh konsistencë dhe lista kontrollesh për pastruesit", thotë Juliette, një anëtare e Bordit këshillimor të pritësve në Nairobi, Kenia. "Kjo i ndihmon ata, sepse kështu bëhet rutinë. Mirëmbajtja siç duhet e shtëpisë funksionon vërtet".

Nëse punëson një pastrues, zbatoje vetë procesin e pastrimit, në mënyrë që të dish saktësisht se çfarë duhet bërë dhe çfarë duhet të përfshish në listat e kontrolleve. Sigurohu që të kesh programuar kohë të mjaftueshme midis prenotimeve për të bërë një pastrim të plotë dhe gjej një person të dytë që merret me pastrime ose bëj një plan rezervë nëse personi yt nuk punon dot një ditë.

Pastrimi për vizitorët kërkon më shumë vëmendje ndaj detajeve sesa do t'i kushtoje po të ishe duke pastruar për veten. Konsidero të bësh vazhdimisht pastrime të thelluara në mënyrë që detyrat rutinë midis prenotimeve të jenë më pak intensive dhe më shumë efikase.

Juliette thekson rëndësinë e pastrimit duke përqendruar në hapësira të caktuara.

• Fillo me hapësirat që përdoren më së shumti. "Kuzhina dhe banjat janë vërtet shumë të rëndësishme, sepse janë hapësirat më të përdorura", thotë Juliette. Pasi banjat të jenë bërë xixë, punonjësit e pastrimit kalojnë në kuzhinë ku lajnë të gjitha enët. "Bëjmë një pastrim vërtet të thelluar", thotë ajo.
• Hapi tjetër: Dhomat e gjumit. Punonjësit e pastrimit të Juliette hapin sirtarët, kontrollojnë poshtë krevateve dhe sigurohen që të mos lënë asgjë pa bërë. "Më pas heqim shtrojat nga krevati, ajrosim shtëpinë, hapim tërësisht dritaret dhe lajmë shtrojat", thotë ajo.
• Së fundi, rregullojmë krevatet. Si është rutina e Juliette? "Dyshekët kanë mbrojtëse, jastëkët kanë mbrojtëse dhe ti e ndryshon të gjithë kompletin", thotë ajo.

Mendo si vizitor. Për shembull, Tammi, një pritës në Siatëll, thotë: "Perdja e dushit shpesh harrohet. Kam një perde plastike që e spërkas dhe e fshij pas qëndrimit të çdo vizitori. Gjithashtu, e zëvendësoj atë çdo një a dy muaj".

Në mënyrë të ngjashme, mos harro sipërfaqet që preken shpesh, si çelësat e dritave. "Ato mund të bëhen shumë pis, por nuk vërehen sepse mësohesh me to ashtu", thotë Adam, pritës në Atlanta. "Pastrimi me pak alkool do të ishte i mjaftueshëm".

Vizitorët nuk duan të gjejnë kurrë flokët e dikujt tjetër në ambientin e tyre. Sue dhe John, pritës në Salt Lake City, kanë një sugjerim për të zgjidhur problemin me flokët e rënë: "Pasi i lajmë të gjitha shtrojat e krevatit, kalojmë një rul pastrues mbi çarçafë, këllëfët e jastëkëve dhe batanije", thonë ata.

Laura, një pritëse në Cottonwood, Arizona, sugjeron ndërrimin e shtupës. "Pastro dyshemetë e banjës duke u ulur në gjunjë", thotë ajo, duke përdorur një furçë pastrimi ose një leckë me mikrofibra. "Është më e shpejtë dhe më e lehtë, dhe nuk do të mbetet asnjë fije floku". Dhe mos harro të pastrosh tubat shkarkues të banjës midis çdo qëndrimi.

Ja disa ide frymëzuese për pastrimin nga pritës me përvojë:

• Së pari, bëj lavatriçen. "Gjëja e parë që bëj është të marr të gjithë çarçafët dhe peshqirët dhe t'i fus në lavatriçe, dhe ato lahen ndërsa vazhdoj me pjesën tjetër të pastrimit", thotë Emma-Kate në San Francisko. "Është efikase".
• Pastro dyshemetë prej druri. "Kam dysheme prej druri. I pastroj rregullisht në mënyrë që të jenë duke xixëlluar kur vizitorët të hyjnë brenda", thotë Tammi në Siatëll. "Kjo gjë krijon një ndjesi të përgjithshme pastërtie që të qetëson".
• Palos letrën higjienike. "E palos cepin e letrës higjienike", thotë Emma-Kate. "Është diçka e vogël në dukje, por krijon idenë e diçkaje të pastër dhe tregon se bën kujdes me gjërat".
• Mbush shishet e sapunit të duarve dhe të shampos. "Është mirë të kesh artikuj banje që duken si të rinj", thotë Alex në San Francisko. Një shishe plot dhe e pahapur e bën vizitorin të ndihet si personi i parë që e përdor atë".